ബോളിവുഡിലെ ബിഗ് ബിയുടെ പ്രിയ പത്‌നിയും ആദ്യകാല നടിയുമായ ജയ ബച്ചന്റെ കര്‍ക്കശ സ്വഭാവം പലപ്പോഴും സംസാരമായിട്ടുണ്ട്. പക്ഷെ കഴിഞ്ഞ ദിവസം ഒരു കോളേജ് പരിപാടിയ്ക്കിടെ ജയ ബച്ചന്‍ പൊട്ടിത്തെറിച്ചത് തികച്ചും ന്യായമായ കാരണത്തിനാണെന്ന് വേണമെങ്കില്‍ പറയാം. സെലിബ്രിറ്റികളെ അടുത്ത് കിട്ടുപ്പോള്‍ മൊബൈല്‍ ഫോണില്‍ ഫോട്ടോ എടുക്കാനുള്ള ആര്‍ത്തിരമ്പലുണ്ടാവുന്നത് സ്വാഭാവികമാണ്. എന്നാല്‍ ഇത് ജയ ബച്ചനെ സംബന്ധിച്ച് പ്രഷറ് കൂട്ടുന്ന സംഭവമായിരുന്നു. താരം പരിസരം മറന്ന് പൊട്ടിത്തെറിച്ചു.

മുംബൈയില്‍ വച്ച് കഴിഞ്ഞ ദിവസം നടന്ന കോളേജ് ഫെസ്റ്റിവലില്‍ അതിഥിയായിരുന്നു ജയാ ബച്ചന്‍. പരിപാടിയിലെ അഭിമുഖം സെക്ഷനില്‍ തന്റെ ഫോട്ടോ മൊബൈല്‍ ഫോണില്‍ പകര്‍ത്തിയവരോട് 68 കാരിയായ താരപത്‌നി പൊട്ടിത്തെറിച്ചു. തുടക്കം മുതലേ ജയാ ബച്ചന്‍ ദേഷ്യത്തിലായിരുന്നുവത്രെ. ഫോട്ടോ എടുക്കാന്‍ തുടങ്ങിയതോടെ, എനിക്കിത് ഇഷ്ടപ്പെടുന്നില്ല നിര്‍ത്തൂ എന്ന് ആവശ്യപ്പെട്ടു.മൊബൈല്‍ ഫോണിന്റെ വെളിച്ചം കണ്ണിന് ബുദ്ധിമുട്ടാകുന്നു എന്ന് ജയ പറഞ്ഞു. നിങ്ങള്‍ക്കെല്ലാം ഫോണും ക്യാമറയും ഉണ്ടെന്ന് കരുതി ആരുടെ ഫോട്ടോയും എടുക്കാനുള്ള അധികാരം തന്നത് ആരാണ് എന്ന് ചോദിച്ച ജയ ബച്ചന്‍ എല്ലാവരോടും ഫോണ്‍ താഴെ വയ്ക്കാനും ആവശ്യപ്പെട്ടുവത്രെ. ഇത്തരം അടിസ്ഥാന മര്യാദകളാണ് വീട്ടിലും സ്‌കൂളിലും കോളേജുകളിലുമൊക്കെ പഠിപ്പിക്കേണ്ടത്. ഞാനിവിടെ നിങ്ങളുടെ ചോദ്യത്തിന് ഉത്തരം പറയാന്‍ തയ്യാറായി നില്‍ക്കുമ്പോള്‍ ഫോട്ടോ എടുക്കുന്ന തിരക്കിലാണോ നിങ്ങള്‍. അച്ചടക്കമില്ലായ്മ തനിക്കിഷ്ടമില്ലാത്ത കാര്യമാണെന്നും ജയ ബച്ചന്‍ പറഞ്ഞു.

ബോളിവുഡ് ലൈഫ് ഡോട്ട് കോം പുറത്തുവിട്ട് വീഡിയോ കാണാം. ഫോട്ടോ എടുക്കുന്നതിനൊന്നും താന്‍ എതിരല്ല എന്നും, എന്നാല്‍ അതിന് സമയവും പരിഥിയും ഉണ്ടെന്ന് നടി പറയുന്നു.