അടുത്തവര്‍ഷം ഏപ്രിലില്‍ ബാഹുബലിയുടെ രണ്ടാം ഭാഗം എത്തുമെന്ന് നേരത്തെ തന്നെ ബാഹുബലിയുടെ അണിയറ പ്രവര്‍ത്തകര്‍ അറിയിച്ചിരുന്നു. അതിനായി തിരക്കിട്ട ഷൂട്ടിംഗിലും അണിയറ പ്രവര്‍ത്തനത്തിലുമാണ് ചിത്രത്തിന്റെ സംവിധായകന്‍ എസ്എസ് രാജമൗലിയും സംഘവും.പ്രതികൂല കാലാവസ്ഥയും സമയക്കുറവും ഒക്കെ മറികടന്ന് ലക്ഷ്യത്തില്‍ എത്താം എന്നാണ് രാജമൗലിയും സംഘവും പ്രതീക്ഷിക്കുന്നത്. എന്നാല്‍ ഇപ്പോള്‍ രാജമൗലിയെ നിരാശപെടുത്തുന്നത് അനുഷ്‌കയാണ്.വിചാരിച്ച കാര്യങ്ങള്‍ അതേപോലെ നടക്കാത്തതിന്റെ ആകുലതയിലാണ് രാജമൗലി ഇപ്പോള്‍.ബാഹുബലി ആദ്യഭാഗത്തില്‍ പ്രായം ചെന്ന ദേവസേന എന്ന കഥാപാത്രത്തെയാണ് അനുഷ്‌ക അവതരിപ്പിച്ചത്. രണ്ടാം ഭാഗത്തില്‍ പ്രഭാസിനൊപ്പം ചെറുപ്പത്തിന്റെ ചുറുചുറുക്കുമായാണ് അനുഷ്‌ക എത്തേണ്ടത്.അനുഷ്‌കയുടെ ചില രംഗങ്ങള്‍ ഒന്നാം ഭാഗം ചിത്രീകരിച്ചപ്പോള്‍ തന്നെ രാജമൗലി ചിത്രീകരിച്ചിരുന്നു. അതിന്റെ കൃത്യമായ തുടര്‍ച്ചയാണ് രാജമൗലി രണ്ടാം ഭാഗത്തിലും ചെയ്യാന്‍ ഉദ്ദേശിക്കുന്നത്.എന്നാല്‍ അനുഷ്‌കയ്ക്ക് തടി കൂടിയത് ഈ ആഗ്രഹത്തിന് തടസമാകുകയാണ്. സൈസ് സീറോ എന്ന ചിത്രത്തിന് വേണ്ടി അനുഷ്‌ക്ക തടി വെച്ചിരുന്നു.സ്ത്രീകളിലെ തടികൊണ്ട് ഉണ്ടാകുന്ന ബുദ്ധിമുട്ടായിരുന്നു സിനിമയുടെ പ്രമേയം. എന്നാല്‍ ഇതിന് ശേഷം ജിമ്മിലും മറ്റും കഠിനമായ വര്‍ക്കൗട്ട് നടത്തിയിട്ടും ഉദ്ദേശിച്ചത്ര ശരീരഭാരം കുറക്കാന്‍ അനുഷ്‌കയ്ക്ക് കഴിഞ്ഞില്ല.അതുകൊണ്ട് തന്നെ എത്രയും പെട്ടന്ന് എന്തുവില കൊടുത്തും ശരീരഭാരം കുറക്കാനാണ് സംവിധായകന്‍ അനുഷ്‌കയോട് പറഞ്ഞിരിക്കുന്നത്.