ദിലീപ് നായകനാകുന്ന കുമാരസംഭവത്തിലൂടെ തെന്നിന്ത്യന്‍ താരം തമന്ന ഭാട്ടിയ മലയാളത്തില്‍ അരങ്ങേറ്റം കുറിയ്ക്കുന്നു. ചിത്രത്തില്‍ അഭിനയിക്കുന്നത് സംബന്ധിച്ചുള്ള കരാര്‍ തമന്ന ഉടന്‍ ഒപ്പുവയ്ക്കുമെന്നാണ് റിപ്പോര്‍ട്ടുകള്‍.

തമന്നക്ക് പുറമെ തെന്നിന്ത്യന്‍ താരം സിദ്ധാര്‍ത്ഥും മലയാളത്തില്‍ അരങ്ങേറ്റം കുറിക്കുന്ന ചിത്രം കൂടിയാണിത്. രതീഷ് അമ്പാട്ട് സംവിധാനം ചെയ്യുന്ന ചിത്രത്തിന്റെ തിരക്കഥ രചിക്കുന്നത് മുരളീ ഗോപിയാണ്.

കുഞ്ഞിക്കൂനന്‍, ചാന്തുപൊട്ട്, മായാമോഹനി തുടങ്ങിയ സിനിമകളില്‍ വ്യത്യസ്ത കഥാപാത്രങ്ങള്‍ ഏറ്റെടുത്ത് വിജയിപ്പിച്ച ദിലീപ് വീണ്ടും മറ്റൊരു വ്യത്യസ്തതയുമായി എത്തുന്നു. 90 വയസുള്ള ഒരാളുടെ ഗെറ്റപ്പിലും ദിലീപ് എത്തുന്നുവെന്നാണ് റിപ്പോര്‍ട്ടുകള്‍.