നല്ല സിനിമയുടെ അമരക്കാരന്‍ എന്നാണ് അടൂര്‍ ഗോപാലകൃഷ്ണന്‍ അറിയപ്പെടുന്നത്. തമാശകളോ ഏച്ചുകെട്ടലുകളോ, എന്തിനേറെ പറയുന്നു ഒരു പാട്ട് രംഗം പോലും ഇല്ലാതെയാണ് അടൂരിന്റെ ചിത്രങ്ങള്‍ പ്രേക്ഷകരിലേക്ക് എത്തുക. ആ ചിത്രങ്ങളെല്ലാം പച്ചയായ ജീവിതത്തിന്റെ നേര്‍സാക്ഷ്യങ്ങളും ആയിരുന്നു.

കെപിഎസി ലളിത ഒരിക്കല്‍ പറഞ്ഞിട്ടുണ്ട് തമാശ കേട്ടാല്‍ പോലും ചിരിക്കാത്തയാളാണ് അടൂര്‍ എന്ന്. എന്നാല്‍ കഴിഞ്ഞ ദിവസം പ്രസ് ക്ലബ്ബില്‍ 'പിന്നെയും' എന്ന ചിത്രത്തെക്കുറിച്ച് സംസാരിക്കവെ 'സി.ഐ.ഡി മൂസ'യാണ് തനിക്ക് ഏറ്റവും ഇഷ്ടപ്പെട്ട ദിലീപ് ചിത്രം എന്ന് അടൂര്‍ പറഞ്ഞു. അടുത്തിരുന്ന സാക്ഷാല്‍ ദിലീപ് പോലും ഞെട്ടിപ്പോയ ഒരു അഭിപ്രായ പ്രകടനം.

കാരണം തമാശകേട്ടാല്‍ ചിരിക്കാത്ത, വാണിജ്യ സിനിമകളോട് അയിത്തമുള്ള, കടുംപിടുത്തക്കാരന്റെ ഒരു ഇമേജാണ് അടൂരിനുള്ളത്.
തമാശ വളരെ ഇഷ്ടപ്പെടുന്ന ആളായതിനാല്‍ 'സി.ഐ.ഡി മൂസ'യുടെ ഓരോ സീനും താന്‍ ആസ്വദിച്ചാണ് കണ്ടതെന്ന് പറഞ്ഞ അടൂര്‍ വളിപ്പുകള്‍ക്ക് മാത്രമെ ചിരിക്കില്ലാത്തതൊള്ളുവെന്നും നല്ല തമാശകള്‍ എന്നും ആസ്വദിക്കാറുണ്ടെന്നും വ്യക്തമാക്കി.