ദക്ഷിണേന്ത്യയില്‍ തന്നെ ഏറെ ശ്രദ്ധ നേടി വിവാഹിതരായ താര ദമ്പതികളാണ് നടി അമലാ പോളും സംവിധായകന്‍ എഎല്‍ വിജയിയും. ഇവര്‍ പിരിയുന്നുവെന്ന വാര്‍ത്ത മലയാളം തമിഴ് പ്രേക്ഷകരെ ഒന്നടങ്കം അത്ഭുതപ്പെടുത്തി. വിവാഹശേഷം അമലാപോള്‍ ഒരു ബ്രേക്ക് പോലും എടുക്കാതെ തുടര്‍ച്ചയായി ചിത്രങ്ങളില്‍ അഭിനയിച്ചതാണ് ഭര്‍തൃ വീട്ടുകാരെ പ്രകോപിപ്പിച്ചതും അത് ഒടുവില്‍ എഎല്‍ വിജയിയുമായുള്ള വിവാഹ മോചനത്തില്‍ വരെ എത്തിയെന്നുമാണ് വാര്‍ത്തകള്‍.

അമല കുടുംബത്തെ ശ്രദ്ധിക്കാതെ സ്വന്തം പ്രഫഷന് മാത്രം പ്രാധാന്യം നല്‍കിയെന്നാണ് സകലരും കുറ്റപ്പെടുത്തുന്നത്. എന്നാല്‍ അമലയെ ഇക്കാര്യത്തില്‍ പഴി പറയരുതെന്ന് ആവശ്യപ്പെട്ടുകൊണ്ട് സിനിമാരംഗത്തു നിന്നു തന്നെയുള്ള ഒരു വ്യക്തി രംഗത്തു വന്നിരിക്കുകയാണ്. മറ്റാരുമല്ല ദക്ഷിണേന്ത്യയിലെ താര സുന്ദരി പ്രിയാ മണി തന്നെയാണ് അമലയ്ക്ക് പിന്തുണയുമായി വന്നിരിക്കുന്നത്.

വിവാഹം കഴിഞ്ഞെന്നു കരുതി കുടുംബത്തില്‍ കിടന്ന് ശ്വാസം മുട്ടുന്നത് പണ്ടത്തെ കാലമാണ്. കുടുംബത്തെയും കുഞ്ഞുങ്ങളെയും ശ്രദ്ധിച്ചുകൊണ്ട് തന്നെ അഭിനയത്തില്‍ തുടരാന്‍ സാധിയ്ക്കും. അല്ലാതെ സമൂഹത്തിന്റെ പേര് പറഞ്ഞ് നടിമാരുടെ സ്വപ്നങ്ങളെ കൊല്ലരുത് പ്രിയാമണി വെട്ടിത്തുറന്നു പറയുന്നു.

'ജോലിക്ക് പോകുന്ന ഓരോ സ്ത്രീകളും അവരുടെ തൊഴിലില്‍ മുന്നേറുകയാണ്. ഓരോ തൊഴിലിലും അവരവരുടെ നൈപുണ്യം തെളിയിച്ചവരാണ്. കുടുംബത്തെയും ജോലിയെയും വേര്‍തിരിച്ച് കാണാന്‍ അവര്‍ക്ക് സാധിയ്ക്കുന്നു. അഭിനയവും ഒരു തൊഴിലാണ്.' പ്രിയാ മണി പറഞ്ഞു.നടിയുടെ വാക്കുകള്‍ പ്രസക്തമാണെന്നാണ് ചില ഉദാഹരണങ്ങള്‍ കാണിക്കുന്നത്.

വിവാഹ ശേഷം അഭിനയ ലോകത്തേക്കു വന്ന ആശ ശരത്തും വിവാഹശേഷവും അഭിനയം തുടരുന്ന റിമ കല്ലിങ്കലും ബോളിവുഡില്‍, കരീന കപൂര്‍, വിദ്യാ ബാലന്‍, ഐശ്വര്യ റായി തുടങ്ങിയ നീണ്ട നിരയും വിവാഹമോചനത്തിനു ശേഷം മലയാളത്തിലെ താരപദവി തിരിച്ചു പിടിച്ച മഞ്ജു വാര്യരും കാവ്യാ മാധവനുമൊക്കെ നല്ല വേഷങ്ങള്‍ ചെയ്തു കൊണ്ടിരിക്കുകയാണ്.

തമിഴിലാകട്ടെ ജ്യോതികയും നല്ലൊരുദാഹരണമാണ്. വിവാഹ ശേഷം പ്രേക്ഷകര്‍ക്കിടയില്‍ നായികമാരുടെ താരമൂല്യം കുറയുമെന്ന വാദത്തിന് പ്രസക്തിയില്ലെന്ന് ഇവര്‍ ഓരോരുത്തരും തെളിയിച്ചിരിക്കുകയാണ്.