മലയാള സിനിമയിലെ ആകാശസുന്ദരി ആരാണെന്ന് ചോദിച്ചാല്‍ ഒരു ഉത്തരമേ ഉള്ളൂ, റീനു മാത്യുസ്. എയര്‍ഹോസ്റ്റസായ റീനു ഇപ്പോള്‍ അഭിനയിക്കുന്നില്ല. എന്നാല്‍ നല്ല വേഷങ്ങള്‍ ലഭിച്ചാല്‍ തീര്‍ച്ചയായും പറന്ന് വരും. ചെറുപ്പത്തില്‍ അധ്യാപിക ആവാനായിരുന്നു ആഗ്രഹം. പക്ഷെ, അത് നടക്കാതെ പോയി. പിന്നീട് മോഡലിംഗിലേക്ക് തിരിഞ്ഞു. ആ കാലത്ത് തന്നെ ഏയര്‍ഹോസ്റ്റസ് ആവണമെന്ന മോഹം ഉണ്ടായി. ഇഷ്ടപ്പെട്ട ജോലി കിട്ടിയെങ്കിലും ആദ്യം ഇട്ടെറിഞ്ഞിട്ട് പോരാനാണ് തോന്നിയത്. പരിശീലന ക്ലാസ് കഴിഞ്ഞപ്പോഴേ അമ്മയെ വിളിച്ച് പറഞ്ഞു, മടങ്ങിവരുകയാണെന്ന്. എന്നാല്‍ അമ്മ തന്ന ആത്മവിശ്വാസത്തിലാണ് പരിശീലനം പൂര്‍ത്തിയാക്കിയത്.

സജിസുരേന്ദ്രന്റെ ഡിസംബര്‍ മിസ്റ്റ് എന്ന ഷോര്‍ട് ഫിലിമിലാണ് ആദ്യം അഭിനയിച്ചത്. അനൂപ്‌മേനോനായിരുന്നു നായകന്‍. അതിന് ഒരുപാട് അവാര്‍ഡുകള്‍ ലഭിച്ചു. അതിന് ശേഷം സിനിമയില്‍ അഭിനയിക്കണമെന്നുണ്ടായിരുന്നു. എന്നാല്‍ അവസരം ലഭിച്ചില്ല. പിന്നീട് പട്ടാളത്തിലേക്ക് ലാല്‍ജോസ് വിളിച്ചെങ്കിലും അപ്പോഴേക്കും എയര്‍ഹോസ്റ്റസായി ജോലി ലഭിച്ചിരുന്നു.

പിന്നീട് പല ഓഫറുകളും ലഭിച്ചെങ്കിലും ജോലിത്തിരക്ക് കാരണം പറ്റിയില്ല. 2013ലാണ് പിന്നീട് അവസരം ലഭിച്ചത്. ഇമ്മാനുവലില്‍. അടുത്ത സിനിമയും മമ്മൂട്ടിക്ക് ഒപ്പമായിരുന്നു. പ്രയ്‌സ് ദ ലോര്‍ഡ്. പിന്നെ മോഹന്‍ലാലിന്റെ സത്യന്‍ അന്തിക്കാട് ചിത്രം എന്നും എപ്പോഴിലും അഭിനയിച്ചു. പൃഥ്വിരാജിന്റെയും നായികയായി.

സിനിമ ഇഷ്ടമാണെങ്കിലും അതിനേക്കാളേറെ എയര്‍ഹോസ്റ്റസ് ജോലി ഇഷ്ടപ്പെടുന്നു. ലോകത്തിലെ ഏറ്റവും വലിയ വിമാനകമ്പനിയായ എമറൈറ്റ്‌സിലാണ് ജോലി ചെയ്യുന്നത്. പല രാജ്യങ്ങളും സന്ദര്‍ശിക്കാം. അവിടുത്തെ കാഴ്ചകളും സംസ്‌കാരവും മനസിലാക്കാം. പലതരം ആളുകളെ കാണാം. ജീവിതം മനസിലാക്കാം. അതൊരു പ്രത്യേക സുഖമാണ്. താമസിക്കാതെ മലയാളത്തില്‍ അഭിനയിക്കും അതിനുള്ള ശ്രമങ്ങള്‍ നടന്ന് വരുകയാണ്.