ദിലീപുമായുള്ള വിവാഹ മോചന സമയത്ത് മഞ്ജു വാര്യരെഴുതിയ എഴുതിയ കത്ത് വീണ്ടും ചര്‍ച്ചയാകുകയാണ്. മലയാളികള്‍ വളരെയേറെ വേദനയോടെ കേട്ട ആ വിവാഹ മോചന വാര്‍ത്ത സമയത്ത് തന്നെയാണ് മഞ്ജു ആ കത്തെഴുതിയത്. എല്ലാം ഉള്ളിലൊതുക്കിക്കൊണ്ടുള്ള ആ കത്തില്‍ ദിലീപിനേയും മകളേയും ആത്മാര്‍ത്ഥ സുഹൃത്തുക്കളേയും മഞ്ജു പരാമര്‍ശിക്കുന്നുണ്ട്. തന്റെ സുഹൃത്തുക്കളല്ല ഇതിന് ഉത്തരവാദികളെന്ന് മഞ്ജു വ്യക്തമായി പറയുന്നു. ഇതിന്റെ പേരില്‍ അവര്‍ പഴി കേള്‍ക്കരുതെന്ന് നിര്‍ബന്ധമുണ്ടെന്നും മഞ്ജു പറഞ്ഞു.

മഞ്ജുവിന്റെ അന്നത്തെ ഫേസ്ബുക്ക് പോസ്റ്റിന്റെ പൂര്‍ണ രൂപം

വ്യക്തി ജീവിതത്തിലെ സ്വകാര്യത നിങ്ങളെപ്പോലെ തന്നെ വളരെയധികം വിലമതിക്കുന്ന ആളാണ് ഞാനും. അത് നമ്മുടെ മാത്രം സങ്കടങ്ങളാണ്. സന്തോഷങ്ങളും. പിന്നെയെന്തിന് ഞാന്‍ ഇങ്ങനെയൊരു കുറിപ്പെഴുതുന്നു . നമ്മുടെ ജീവിതത്തില്‍ ഉണ്ടാകുന്ന തികച്ചും സ്വകാര്യമായ സംഭവങ്ങള്‍ മറ്റു ചിലരുടെ ജീവിതത്തെക്കൂടി ബാധിക്കുന്നത് കാണുമ്പോള്‍ ചില സാഹചര്യങ്ങളില്‍ ചില വെളിപ്പെടുത്തലുകള്‍ ആവശ്യമായി വരും. അത് നമ്മളെ സ്‌നേഹിക്കുന്നവരുടെ നമ്മുടെ സന്തോഷത്തിലും വേദനയിലും ഒരു പോലെ കൂടെ നിന്നവരുടെ വേദന അകറ്റുവാന്‍ അവരെ കുറിച്ച് ചിലര്‍ ഉണ്ടാക്കിയ തെറ്റിദ്ധാരണകള്‍ അകറ്റുവാന്‍ ഉപകരിക്കുകയാണെങ്കില്‍ പ്രത്യേകിച്ചും.

ഞാനും ദിലീപേട്ടനും ഞങ്ങളുടെ പതിനാറ് വര്‍ഷത്തെ വിവാഹ ജീവിതം അവസാനിപ്പിക്കാന്‍ സംയുക്തമായി കുടുംബ കോടതിയെ സമീപിച്ചിരുക്കുയാണ്. ഞങ്ങള്‍ എടുത്ത ആ തീരുമാനം തികച്ചും വ്യക്തിപരമാണ്. ആ തീരുമാനത്തിന് പിന്നിലെ കാരണമെന്ത്, കാരണക്കാര്‍ ആര് എന്നൊക്കെ വ്യാപകമായി ചര്‍ച്ച ചെയ്യപ്പെടുന്നുണ്ട്. എന്നാല്‍ അതൊക്കെ ഞങ്ങളുടെ മാത്രം സ്വകാര്യതയില്‍ ഒതുക്കി നിര്‍ത്താനാണ് എനിക്ക് താത്പര്യം. ആ സ്വകാര്യതയെ ദയവു ചെയ്ത് മാനിക്കുക. 

എന്റെ സങ്കടങ്ങളിലും സന്തോഷങ്ങളിലും ഒപ്പം നിന്ന കുറച്ച് സുഹൃത്തുക്കള്‍ ഉണ്ട് എനിക്ക്. ഗീതു, സംയുക്ത, ഭാവന, പൂര്‍ണിമ, ശ്വേതാ മേനോന്‍ തുടങ്ങിയവര്‍. എന്റെ വ്യക്തി ജീവിതത്തില്‍ സംഭവിച്ച കാര്യങ്ങള്‍ ഇവരാണ് ഉത്തരവാദികള്‍ എന്ന് ചില പ്രചാരണങ്ങള്‍ ഉണ്ടാകുന്നു. അത് അവരെ വേദനിപ്പിക്കുന്നു എന്നെയും. എന്റെ തീരുമാനങ്ങള്‍ എന്റേതും അതിന്റെ പ്രത്യാഘാതങ്ങള്‍ക്ക് ഉത്തരവാദി ഞാന്‍ മാത്രവും ആണ്. അവരുടെ പ്രേരണയോ നിര്‍ബന്ധമോ ഇതിനു പിന്നിലില്ല. ഇവരാരും ഇതിന്റെ പേരില്‍ പഴി കേള്‍ക്കുകയോ ആരുടെയെങ്കിലും ശത്രുതയ്ക്ക് ഇരയാകുകയോ ചെയ്യരുത് എന്നെനിക്ക് നിര്‍ബന്ധമുണ്ട്. മറിച്ചുള്ള പ്രചരണങ്ങള്‍ അവരുടെ വ്യക്തി ജീവിതത്തെയും കലാജീവിതത്തെയും കൂടി ബാധിക്കാന്‍ തുടങ്ങിയിരിക്കുന്നു. ഈ കുറിപ്പോടു കൂടി അത്തരം തെറ്റിദ്ധാരണകള്‍ അവസാനിക്കും എന്ന് കരുതുന്നു. ഞാന്‍ കാരണം എന്റെ തീരുമാനങ്ങള്‍ കാരണം അവര്‍ക്കുണ്ടായ എല്ലാ വേദനകള്‍ക്കും ഞാന്‍ നിര്‍വ്യാജം ക്ഷമ ചോദിക്കുന്നു. 

ദിലീപേട്ടന്റെ വ്യക്തി ജീവിതത്തില്‍ അദ്ദേഹം എടുക്കുന്ന എല്ലാ തീരുമാനങ്ങളും നല്ലതാവട്ടെ എന്നും കലാജീവിതത്തില്‍ ഇനിയും ഉയരങ്ങള്‍ കീഴടക്കാന്‍ അദ്ദേഹത്തിന് കഴിയട്ടെ എന്നും ഞാന്‍ പ്രാര്‍ത്ഥിക്കുന്നു. മീനൂട്ടിക്ക് അച്ഛനോടുള്ള സ്‌നേഹം മറ്റാരെക്കാളും എനിക്കറിയാം. അവള്‍ അദ്ദേഹത്തിന്റെ സംരക്ഷണത്തില്‍ എന്നും സന്തുഷ്ടയും സുരക്ഷിതയും ആയിരിക്കും. അതുകൊണ്ടു തന്നെ അവളുടെ മേലുള്ള അവകാശത്തിന്റെ പിടിവലിയില്‍ അവളെ ദുഖിപ്പിക്കുന്നത് എനിക്കിഷ്ടമല്ല അവള്‍ക്ക് ഈ അമ്മ എന്നും ഒരു വിളിപ്പാടകലെയുണ്ട്. അവള്‍ അകലെയാണെന്ന് എനിക്ക് തോന്നുന്നില്ല. കാരണം അമ്മയുടെ അകത്തു തന്നെയാണല്ലോ മകള്‍ എന്നും...

എല്ലാം ഒന്നില്‍ നിന്നും തുടങ്ങുകയാണ് ഞാന്‍. ജീവിതവും സമ്പാദ്യവും എല്ലാം ഒരു തരത്തില്‍ പറഞ്ഞാല്‍ ഒരു പുനര്‍ജനിക്കല്‍ ഒരു സിനിമയുടെ വിജയം ജീവിത വിജയത്തിന്റെ അളവുകോല്‍ അല്ല എന്ന് മറ്റാരെക്കാളും നന്നായി എനിക്കറിയാം . 

*********
രണ്ടാംമൂഴത്തില്‍ ഒരുപാട് വിമര്‍ശനങ്ങളും അഭിനന്ദനങ്ങളും ആശംസകളും സ്‌നേഹവും ലഭിച്ചിട്ടുണ്ട്. എല്ലാത്തിനും നന്ദിയുണ്ട്. ഒരു കടലോളം എവിടെയോ എന്നോ വായിച്ച ഒരു വരി ഓര്‍മ്മ വരുന്നു...
you never realize how strong you are, until being strong is the only option you have left...