പഴയ ശ്രീനിവാസനും പുതിയ ശ്രീനിവാസനും തമ്മില്‍ ഒരുപാട് വ്യത്യാസമുണ്ടെന്നാണ് സിനിമാക്കാര്‍ പറയുന്നത്. പണ്ട് ആരെയും വെറുപ്പിക്കാനോ മോശമായ അഭിപ്രായങ്ങള്‍ ആരെക്കൊണ്ടെങ്കിലും പറയിപ്പിക്കാനോ താരം തയ്യാറായിരുന്നില്ല. ശ്രീനിവാസനെ കുറിച്ച് പലരും പല കഥകളും മെനയാറുണ്ടായിരുന്നു. എന്നാല്‍ താരം അതിന് മറുപടി സിനിമകളിലൂടെയാണ് പലപ്പോഴും നല്‍കിയിരുന്നത്. അത് പറഞ്ഞതിന്റെ മുതലും പലിശയും ചേര്‍ന്നുള്ള സംഭവങ്ങളായിരുന്നു. അത് പലരെയും ചിരിപ്പിക്കുകയും ചിന്തിപ്പിക്കുകയും ചെയ്തു. സിനിമകളുടെ രീതി മാറിയപ്പോള്‍ ശ്രീനിവാസന്‍ തന്റേതായ ഇടം കണ്ടെത്തി.

ഇപ്പോള്‍ പുതിയ ശ്രീനിവാസനാണ്. സിനിമയ്ക്കിടയില്‍ ജൈവകൃഷി തുടങ്ങി. ഏക്കറു കണക്കിന് കൃഷി ചെയ്തു. അല്ലറ ചില്ലറ അവാര്‍ഡും തരപ്പെടുത്തി. എവിടെയെങ്കിലും ഉദ്ഘാടനത്തിന് വിളിച്ചാല്‍ പ്രതിഫലം വാങ്ങില്ലെന്നാണ് സിനിമാക്കാര്‍ പറയുന്നത്. പകരം ചില ഡിമാന്റുകള്‍ വയ്ക്കും. 

താരം പങ്കെടുക്കുന്ന പരിപാടികളില്‍ ചുരുങ്ങിയത് 60 കര്‍ഷകരെയെങ്കിലും പങ്കെടുപ്പിക്കണം. മാത്രമല്ല, അവരെയെല്ലാം സ്‌റ്റേജില്‍ ആദരിക്കണം. കര്‍ഷകരുടെ തലയില്‍ പാളത്തൊപ്പി നിര്‍ബന്ധമായി വച്ചിരിക്കണം. അവരുടെ ശരീരത്ത് ചേറ് പുരണ്ടിരിക്കണം. അതിന്റെ ഗന്ധം സ്‌റ്റേജിലിങ്ങനെ നിറഞ്ഞ് നില്‍ക്കണം. ഇക്കാര്യങ്ങള്‍ പരിഗണിച്ചില്ലെങ്കില്‍ ഉദ്ഘാടനത്തിന് ശ്രീനിവാസനെ വിളിക്കണ്ടെന്നാണ് സഹപ്രവര്‍ത്തകര്‍ പറഞ്ഞുപരത്തിയിരിക്കുന്നത്. 

എന്തായാലും ഇതിനുള്ള ശ്രീനിവാസന്റെ മറുപടിക്കായി കാത്തിരിക്കുകയാണ് സിനിമാ ലോകവും പ്രേക്ഷകരും.