ആരാധകരെ ആവേശം കൊള്ളിക്കാന്‍ ഉലകനായകന്‍ കമലഹാസനും മെഗാസ്റ്റാര്‍ മോഹന്‍ലാലും വ്യത്യസ്ഥമായ രണ്ടു വേഷങ്ങളില്‍ എത്തുകയാണ്. തമിഴ്, തെലുങ്ക് ഭാഷകളില്‍ പുറത്തിറങ്ങുന്ന ഈ ചിത്രം സംവിധാനം ചെയ്യുന്നത് കമലഹാസന്‍ തന്നെയാണ്. അക്ഷയ് കുമാര്‍, പരേഷ് റാവല്‍ എന്നിവര്‍ പ്രധാന വേഷങ്ങള്‍ അവതരിപ്പിച്ച ബോളിവുഡ് ചിത്രം ഓ മൈ ഗോഡിന്റെ റീമേക്കാണിത്.

ഇന്ത്യന്‍ സിനിമ കണ്ട ഏറ്റവും മികച്ച താരങ്ങളായ കമലഹാസനും മോഹന്‍ലാലും ഒന്നിക്കുമ്പോള്‍ ഓ മൈ ഗോഡ് മറ്റൊരു തലത്തിലെത്തും. കമലിന്റെ നിര്‍മ്മാണ കമ്പനിയായ രാജ് കമല്‍ ഫിലിംസ് ഇന്റര്‍നാഷണലാണ് ചിത്രം നിര്‍മ്മിക്കുന്നത്. ഷൂട്ടിംഗ് തീയതിയെ കുറിച്ച് അന്തിമ തീരുമാനമായിട്ടില്ല. ദൈവങ്ങളുടെ പ്രതിമ വില്‍ക്കുന്ന നിരീശ്വരവാദിയായ കച്ചവടക്കാരന്റെ വേഷമാണ് കമല്‍ കൈകാര്യം ചെയ്യുന്നത്.ദൈവമായാണ് മോഹന്‍ലാല്‍ എത്തുന്നത്.

2008ല്‍ പുറത്തിറങ്ങിയ ഓ മൈ ഗോഡ് സംവിധാനം ചെയ്തത് ഉമേഷ് ശുക്ലയാണ്. പ്രമേയത്തിന്റെ പ്രത്യേകത കൊണ്ട് ശ്രദ്ധ നേടിയ ചിത്രം 180 കോടിയാണ് ബോക്‌സോഫീസില്‍ കൊയ്തത്. മുംബയിലെ ചോര്‍ ബസാറില്‍ ദൈവങ്ങളുടെ പ്രതിമയും മറ്റും കച്ചവടം നടത്തുന്നയാളാണ് നിരീശ്വരവാദിയായ കാഞ്ചിഭായ്. ഒരു ദിവസം മുംബയ് നഗരത്തില്‍ ഭൂകമ്പം ഉണ്ടാവുകയും ചോര്‍ബസാറില്‍ കാഞ്ചി ഭായിയുടെ കട മാത്രം നശിക്കുകയും ചെയ്യുന്നു. ദൈവത്തെ കളിയാക്കിയതിന് ലഭിച്ച ശിക്ഷയാണിതെന്ന് എല്ലാവരും അയാളോട് പറയുന്നു.

നഷ്ടപരിഹാരത്തിനായി ഇന്‍ഷ്വറന്‍സ് കമ്പനിയെ സമീപിക്കുന്ന കാഞ്ചി ഭായിക്ക് ദൈവത്തിന്റെ പ്രവര്‍ത്തി കാരണം ഉണ്ടാകുന്ന നാശങ്ങള്‍ക്ക് നഷ്ടപരിഹാരം ലഭിക്കില്ലെന്ന മറുപടിയാണ് കിട്ടുന്നത്. എന്നാല്‍ ദൈവം തനിക്ക് നഷ്ടപരിഹാരം നല്‍കണം എന്നാവശ്യപ്പെട്ട് കാഞ്ചിഭായ് കോടതിയെ സമീപിക്കുകയും ദൈവങ്ങള്‍ക്ക് ഹാജരാകാന്‍ പറ്റാത്തതിനാല്‍ പ്രതി പുരുഷനാണ് എന്ന് അവകാശപ്പെടുന്ന ആള്‍ ദൈവങ്ങള്‍ക്കെതിരെ കേസ് കൊടുക്കുകയും ചെയ്യുന്നു. ഇതേ നിയമത്തിന്റെ പേരില്‍ നഷ്ടപരിഹാരം ലഭിക്കാത്ത ആളുകളുടെ പിന്തുണയും കാഞ്ചിഭായിക്ക് കിട്ടുന്നു.

തുടര്‍ന്ന് മതമൗലികവാദികളുടെ ആക്രമണത്തിന് ഇരയാകുന്ന കാഞ്ചിയുടെ രക്ഷകനായി കൃഷ്ണ വാസുദേവ് യാദവ് എന്നയാള്‍ എത്തുന്നു. കൃഷ്ണ വാസുദേവ് ഭഗവാന്‍ കൃഷ്ണനാണെന്ന് കാഞ്ചി മനസിലാക്കുന്നതും തുടര്‍ന്നുള്ള സംഭവവികാസങ്ങളുമാണ് ചിത്രത്തില്‍ അവതരിപ്പിച്ചത്. തമിഴ്, തെലുങ്ക് റീമേക്കില്‍ കഥാപാത്രങ്ങളുടെ പേരും പശ്ചാത്തലവും മാറും. ചിത്രത്തിന്റെ തിരക്കഥയും സംഭാഷണവും കമല്‍ തന്നെയാണ് എഴുത്തുന്നത്. 2009ല്‍ റിലീസ് ചെയ്ത ഉന്നയ് പോല്‍ ഒരുവന്‍ എന്ന ചിത്രത്തിലാണ് കമലും മോഹന്‍ലാലും മുമ്പ് ഒന്നിച്ചഭിനയിച്ചത്.