കുട്ടികള്‍ എന്തുപറഞ്ഞാലും അവരുടെ സുരക്ഷയെ കുറിച്ച്‌ ഓർത്ത് 'നോ' പറയുന്ന മാതാപിതാക്കളോട് യെസ് എന്ന് പറയാനും അവരുടെ കുട്ടിക്കാലം ആസ്വദിക്കാന്‍ അവരെ അനുവദിക്കാനും നിര്‍ദേശിച്ചുകൊണ്ട് (#yesmom) എന്നൊരു ക്യാമ്പയിനിനു തുടക്കം കുറിച്ചിരിക്കുകയാണ് ഇമ്മ്യൂണോബൂസ്റ്റേഴ്സ് ഡോട് ഇന്‍ എന്ന വെബ്സൈറ്റ്. കുട്ടികളുടെ ആരോഗ്യത്തെ കുറിച്ച്‌ ചിന്തിച്ച്‌ അവര്‍ക്കിഷ്ടമുള്ള കാര്യങ്ങളില്‍ നിന്ന് കുട്ടികളെ വിലക്കുമ്പോൾ പ്രതിരോധ ശക്തി വര്‍ധിക്കാനുള്ള സാധ്യത കുറയുമെന്നും അതേ സമയം അവരുടെ ഇഷ്ടങ്ങള്‍ക്കൊപ്പം വിടുകയാണെങ്കില്‍ സാഹചര്യങ്ങള്‍ക്കൊപ്പം വളരാന്‍ അവരിലെ ശേഷികള്‍ വികസിക്കാന്‍ അത് സഹായകമാകുമെന്നും ഇവര്‍ പറയുന്നു.

പ്രശസ്ത ബോളിവുഡ് നടി സുസ്മിത സെന്‍ ക്യാമ്പയിന് പൂർണ പിന്തുണ പ്രഖ്യാപിച്ചിരിക്കുകയാണ്. ഒരു യെസ് കുട്ടികളുടെ വ്യക്തിത്വത്തിലും അമ്മയും കുഞ്ഞും തമ്മിലുള്ള ബന്ധത്തിലും വലിയ മാറ്റങ്ങള്‍ കൊണ്ടുവരുമെന്നാണ് സുസ്മിത പറയുന്നത്.

'മാതൃത്വം നിങ്ങളെ മാറ്റിമറിക്കും. നിങ്ങള്‍ ഭാവനയില്‍ കാണുന്നതിന് മുൻപേ തന്നെ. അത് നിങ്ങളെ കൂടുതല്‍ വാത്സല്യമുള്ളവരും സ്നേഹനിര്‍ഭരരും ഉത്കണ്ഠാകുലരുമാക്കും. ചിലപ്പോള്‍ അമിത ഉത്കണ്ഠയുള്ളവരും. ശരിയാണ് കുഞ്ഞുങ്ങളെ കുറിച്ചോര്‍ത്ത് അമ്മമാര്‍ക്ക് ആകുലതകളാണ്.

തണുപ്പുകാലത്ത് അവരെ പുറത്തിറങ്ങാന്‍ അനുവദിക്കുക തന്നെയില്ല. തണുപ്പ് ശക്തമല്ലെങ്കില്‍ കൂടി അവരെ സ്കാര്‍ഫ് അണിയാന്‍ നിര്‍ബന്ധിക്കും. നീന്തലാണെങ്കിലോ, കുട്ടികള്‍ക്കത് വളരെ ഇഷ്ടമാണ്. എന്നാല്‍ അതിനോട് പൂര്‍ണമായ ഒരു നോ ആയിരിക്കും അമ്മമാരുടെ പ്രതികരണം.

യെസ് മോം മനോഹരമായ ഒരു ചലനമാണ്. കുട്ടികളോട് യെസ് പറയാം. കുട്ടികളെ അവരുടെ കുട്ടിക്കാലം അതിന്റെ പൂര്‍ണതയില്‍ ആസ്വദിക്കാന്‍ അനുവദിക്കാം. കുട്ടിക്കാലമാണ് അവരിലെ വ്യക്തിയെ വളര്‍ത്തുന്നത്. അവരുടെ ഇഷ്ടങ്ങളോട് യെസ് പറഞ്ഞു നോക്കൂ. അത് അവരില്‍ വലിയ മാറ്റങ്ങള്‍ ഉണ്ടാക്കിയേക്കാം, നിങ്ങളും അവരും തമ്മിലുള്ള ബന്ധത്തിലും വലിയ മാറ്റങ്ങള്‍ കൊണ്ടുവന്നേക്കാം.' - സുസ്മിത പറയുന്നു.