ലേഡി സൂപ്പര്സ്റ്റാറിന്റെ പിറന്നാളാഘോഷത്തിന് കൂറ്റന് കേക്ക്; അണിയറപ്രവര്ത്തകര് താരത്തെ ഞെട്ടിച്ചു
ലേഡി സൂപ്പര്സ്റ്റാര് നയന്താര അഥര്വയ്ക്കും അനുരാഗ് കശ്യപിനും ഒപ്പം ബര്ത്ത്ഡേ ആഘോഷിച്ചു. ഇമയ്ക്ക നൊടികള് എന്ന ചിത്രത്തിന്റെ ലൊക്കേഷനിലായിരുന്നു വ്യത്യസ്തമായ ആഘോഷം. സംവിധായകന് അജയ് ഗണമുത്തുവും നിര്മാതാവ് ജയകുമാറും രാജകുമാരിയുടെ കിരീടം പോലുള്ള കൂറ്റന് കേക്ക് എത്തിച്ചാണ് നയന്സിനെ വിസ്മയിപ്പിച്ചത്. മലയാളത്തില് നിന്ന് നടന് ദേവന് ലൊക്കേഷനിലുണ്ടായിരുന്നു. രാത്രി കാമുകന് വിഘ്നേഷിനൊപ്പമായിരുന്നു ആഘോഷം. 33 വയസെത്തിയ താരം അത് മറച്ചുവയ്ക്കാന് ശ്രമിക്കുന്നില്ല എന്നത് ശ്രദ്ധേയമാണ്. കേക്ക് മുറിച്ച് നായകനായ അഥര്വയ്ക്കും പ്രധാനകഥാപാത്രത്തെ അവതരിപ്പിക്കുന്ന ബോളിവുഡ് സംവിധായകന് അനുരാഗ് കശ്യപിനും കൈമാറി. ലൈറ്റ് ബോയിസിന് ഉള്പ്പെടെ താരം കേക്ക് നല്കി.
ലൊക്കേഷനില് പ്രത്യേകം പാര്ട്ടി ഒരുക്കാനും നയന്സ് മറന്നില്ല. രാത്രി ചെന്നൈയിലെ ഫഌറ്റില് കാമുകന് വിഘ്നേഷിനൊപ്പമായിരുന്നു താരം. ദുബയിലുള്ള സഹോദരനും കൊച്ചിയിലുള്ള മാതാപിതാക്കളും ശനിയാഴ്ച രാവിലെ താരത്തെ വിളിച്ച് ആശംസകള് അറിയിച്ചിരുന്നു. നവംബര് 18നാണ് താരത്തിന്റെ ജന്മനാള്. സിനിമയില് വന്നിട്ട് പതിനഞ്ച് വര്ഷം പിന്നിടുന്നു. ഇതുവരെ നടത്തിയതില് നിന്ന് വേറിട്ട ആഘോഷങ്ങളാണ് ഇക്കുറി നടത്തിയത്. 2003ല് സത്യന് അന്തിക്കാടിന്റെ മനസിനക്കരയിലൂടെയാണ് നയന്താര സിനിമയിലെത്തിയത്. പിന്നീട് രജനികാന്തിന്റെ ചന്ദ്രമുഖിയിലൂടെ തമിഴകത്ത് താരമായി.
ചിമ്പുവുമായുള്ള പ്രണയവും കലഹവുമാണ് നയന്സിനെ മാധ്യമശ്രദ്ധാകേന്ദ്രമാക്കിയത്. ഇരുവരും ഇടപഴകുന്ന വീഡിയോയും ഫോട്ടോസും ചിമ്പു പുറത്ത് വിട്ടു. എങ്കിലും തളരാതെ താരം മുന്നോട്ട് പോയി. 2007ല് അജിത്തിന്റെ ജില്ലയിലൂടെ വീണ്ടും തിളങ്ങി. തൊട്ടടുത്ത വര്ഷം ധനുഷിന്റെ യാരടി നീ മോഹിനിയിലെ കാമുകി വേഷം പ്രേക്ഷകരെ കരയിച്ചു. പിന്നീടാണ് കോറിയേഗ്രാഫര് പ്രഭുദേവയുമായി പ്രണയത്തിലായത്. തന്റെ പ്രണയം പരസ്യമാക്കാന് താരത്തിന് മടിയുണ്ടായിരുന്നില്ല. പ്രഭു എന്ന് തോളില് പച്ചകുത്തി താരം പൊതു സദസുകളിലെത്തി. ഇതിനിടെ 2011ല് സീതയായി അഭിനയിക്കുന്നതിന് നയന്സിനെതിരെ വിമര്ശനം ഉയര്ന്നു. മറ്റൊരാളുടെ ഭര്ത്താവുമൊത്ത് ജീവിക്കുന്ന താരം സീതയായി അഭിനയിക്കരുതെന്നായിരുന്നു ഹിന്ദു സംഘടനകളുടെ ആവശ്യം. പക്ഷെ, സിനിമ റിലീസായി.
പ്രഭുദേവയുമായുള്ള ബന്ധം അവസാനിച്ചപ്പോള് നയന്സിന്റെ കരിയര് അവസാനിച്ചെന്ന് കോടമ്പാക്കത്തെ പലരും വിധിയെഴുതി. എന്നാല് ആറ്റ്ലിയുടെ രാജറാണി എന്ന ചിത്രത്തിലൂടെ താരം തിരികെ വന്നു. അതുവരെ നയന്സ് ചെയ്തതില് നിന്നും വേറിട്ട് നിന്ന വേഷമായിരുന്നു. ഇതിനിടെ മമ്മൂട്ടിയുടെ നായികയായി പുതിയമുഖത്തിലും ഭാസ്ക്കര് ദ റസ്ക്കലിലും അഭിനയിച്ചു. മായ, ഡോറ, അറം തുടങ്ങി നായിക കേന്ദ്രീകൃത സിനിമകളിലും അഭിനയിച്ചു. തനി ഒരുവന്, നാനും റൗഡിതാന് എന്നീ സൂപ്പര്ഹിറ്റി സിനിമകളിലും നായികയായി. തിരുവല്ലാക്കാരി ഡയാനാ മറിയം കുര്യന് എന്ന നയന്സിനെ മറികടന്ന് നമ്പര് വണ്ണാകാന് തൃഷയും അനുഷ്കയും തമന്നയും കാജല് അഗര്വാളും ഒക്കെ ശ്രമിക്കുന്നുണ്ടെങ്കിലും ഫലിക്കുന്നില്ല.
https://www.facebook.com/Malayalivartha
