മലയാള ചലചിത്രങ്ങളിലെ സംഘട്ടനരം‌ഗങ്ങൾക്ക് ഒരു പുതിയ മാനം നൽകിയ ഒരു നടനാണ് ബാബു ആന്റണി. ഭരതൻ സം‌വിധാനം ചെയ്ത ചിലമ്പ് എന്ന സിനിമയിലൂടെയാണ് ബാബു മലയാള സിനിമയിലേക്ക് എത്തുന്നത്. ആദ്യം വില്ലൻ വേഷങ്ങളിൽ പ്രത്യക്ഷപ്പെട്ട ഇദ്ദേഹം പിന്നീട് കുറേ ചിത്രങ്ങളിൽ നായകനായും അഭിനയിച്ചു. സൂപ്പർ ആക്ഷൻ ഹിറോ ആയി തിളങ്ങിയിട്ടും താൻ പരാജയപ്പെട്ടുപോയത് ഒരു സ്ത്രീ കാരണമെന്നാണ് ബാബു ആന്റണി പറയുന്നത്. എന്നാൽ ആ സ്ത്രീയുടെ പേര് നടൻ വെളിപ്പെടുത്തിയിട്ടില്ല.

'അതാരാണെന്ന് മലയാള സിനിമയെ കഴിഞ്ഞ ഇരുപത് വർഷമായി അറിയാവുന്ന എല്ലാവർക്കുമറിയാം. സിനിമയിൽ നിന്ന് തന്നെ ഇല്ലാതാക്കാൻ ശ്രമങ്ങൾ നടന്നു. അതിനുവേണ്ടി പല പ്രചാരണങ്ങളും നടത്തി. ഇന്നത്തെ പോലെയായിരുന്നില്ല അന്ന് സിനിമാ ലോകം. പലരും കള്ളക്കഥകൾ വിശ്വസിച്ചു. അവസരങ്ങൾ കുറഞ്ഞു. ഇരുപതിലധികം ബിഗ് ബജറ്റ് ചിത്രങ്ങളാണ് ഒറ്റയടിക്ക് നഷ്ടപ്പെട്ടത്.

ജനങ്ങൾക്കിടയിൽ തന്റെ പ്രതിച്ഛായയ്ക്ക് കോട്ടം വന്നുവെന്നായിരുന്നു അന്ന് സംവിധായകരും നിർമാതാക്കളും പറഞ്ഞത്. അത് കുറെയൊക്കെ ശരിയായിരുന്നു. ഞാൻ തെറ്റൊന്നും ചെയ്തിട്ടില്ലെങ്കിലും കള്ളപ്രചാരണങ്ങൾ ശരിയാണെന്ന് പലരും വിശ്വസിച്ചു. അതിനെ പ്രതിരോധിക്കാൻ ഞാനല്ലാതെ മറ്റാരുമുണ്ടായില്ല. വൈകാതെ സിനിമയിൽ നിന്ന് പൂർണമായി ഇല്ലാതാകുന്നതാണ് കണ്ടത്. ഉത്തമനിലൂടെ ശക്തമായ തിരിച്ചു വരവിന് ശ്രമിച്ചു. പക്ഷെ അതിനു ശേഷവും ഇടവേളയുണ്ടായി. ഇക്കാലയളവിലാണ് വിവാഹിതനാകുന്നതും വിദേശത്തേയ്ക്ക് താമസം മാറ്റുന്നതും. അതും അവസരങ്ങൾ നഷ്ടപ്പെടുന്നതിന്റെ വ്യാപ്തി വർദ്ധിപ്പിച്ചു.

ഒരിടവേളയ്ക്ക് ശേഷം സജീവമാകാൻ ശ്രമിച്ചപ്പോൾ അവർ വീണ്ടും രംഗത്തിറങ്ങിയിട്ടുണ്ട്. എന്റെ കുടുംബ ജീവിതം പോലും ഇല്ലാതാക്കാൻ ശ്രമം നടക്കുന്നുണ്ട്. എന്താണ് അവരുടെ ലക്ഷ്യമെന്ന് അറിയില്ല. പക്ഷെ ഒരുനാൾ അവർക്കിതിന് കണക്ക് പറയേണ്ടി വരുമെന്നാണ് ഉറച്ച വിശ്വാസം. അന്ന് അവർ തന്റെ കാലിൽ വീണ് മാപ്പു ചോദിക്കുന്നത് എല്ലാവർക്കും കാണാനാകും'- ബാബു പറഞ്ഞു.