പുതുവത്സരം ആഘോഷിക്കാന്‍ മുഖ്യാതിഥിയായി സണ്ണിലിയോണ്‍. ബോളിവുഡ് താരവും മുന്‍ പോണ്‍ താരവുമായ സണ്ണി ലിയോണിനെ ഒരു സ്വകാര്യ കമ്പനി സംഘടിപ്പിക്കുന്ന ചടങ്ങിലാണ് ക്ഷണിച്ചിരിക്കുന്നത്. ബംഗളുരുവിലെ സ്വകാര്യ കമ്പനിയാണ് സംഘാടകര്‍. ചില ഐടി സ്ഥാപനങ്ങള്‍ വഴിയാണ് പരിപാടിയുടെ ടിക്കറ്റ് വിതരണം ചെയ്യുന്നത്. താരത്തിന്റെ വരവിനായി ആവേശത്തോടെ കാത്തിരിക്കുകയാണ് കര്‍ണാടകയിലെ ആരാധകര്‍.

അതേസമയം സണ്ണി ലിയോണിനെതിരെ പ്രതിഷേധവുമായി ഒരു വിഭാഗം രംഗത്ത് വന്നിട്ടുണ്ട്. കര്‍ണാടകയുടെ സംസ്‌കാരത്തേയും പാരമ്പര്യത്തേയും കുറിച്ച് യാതൊരു അറിവുമില്ലാത്ത നടിയെ സംസ്ഥാനത്ത് നടക്കുന്ന പരിപാടിയില്‍ പങ്കെടുക്കാന്‍ അനുവദിക്കില്ലെന്നാണ് പ്രതിഷേധക്കാരുടെ നിലപാട്. രക്ഷണ വേദിക യുവസേനയാണ് പ്രതിഷേധവുമായി രംഗത്തുള്ളത്.

സണ്ണി ലിയോണിനെപ്പോലെ ഒരു പോണ്‍ താരത്തെ വരവേറ്റ് പുതുവര്‍ഷം ആഘോഷിക്കുന്നതിനെതിരെ ശക്തമായി പ്രതികരിക്കുമെന്ന് രക്ഷണ വേദിക യുവസേനയുടെ സംസ്ഥാന പ്രസിഡന്റ് ആര്‍ ഹരീഷ് പറഞ്ഞു.