"സുഡാനി ഫ്രം നൈജീരിയ' എന്ന ചിത്രത്തെ പ്രശംസിച്ച് നടൻ സുരാജ് വെഞ്ഞാറമൂട് കഴിഞ്ഞ ദിവസം ഫേസ്ബുക്കിൽ കുറിപ്പ് ഇട്ടിരുന്നു. എന്നാൽ കുറിപ്പിൽ മുസ്ലിം ലീഗിനെയും പി.കെ കുഞ്ഞാലികുട്ടിയെയും പരാമർശിച്ചതോടെ ഇത് വലിയ വിവാദം ആവുകയായിരുന്നു. നിരവധി പാർട്ടി പ്രവർത്തകരും മറ്റും വിമർശനങ്ങളുമായി രംഗത്ത് എത്തിയതോടെ മാപ്പു പറഞ്ഞു തടി ഊരിയിരിക്കുകയാണ് താരം.

"ലീഗും കുഞ്ഞാലിക്കുട്ടിയും കോണി ചിഹ്നവും ഒന്നും ഇല്ലാത്ത കൊതിപ്പിക്കുന്ന യഥാർഥ മലപ്പുറത്തിന്‍റെ ഭംഗി. അങ്ങനെ എല്ലാം കൊണ്ടും ഒരു ആസ്വാദകന്റെ മനസ് നിറയ്ക്കുന്ന,കണ്ണ് നിറയ്ക്കുന്ന ഒരു ബഹളവും ഇല്ലാത്ത ഒരു കൊച്ചു ഗംഭീര സിനിമ" എന്നായിരുന്നു സുരാജിന്റെ പരാമർശം. ഇതോടെ സുരാജ് മുസ്ലിം ലീഗിനെയും കുഞ്ഞാലികുട്ടിയെയും വിമർശിക്കുന്ന തരത്തിലാണ് പരാമർശം നടത്തിയത് എന്ന പേരിലാണ് വിവാദം ഉയർന്നത്. ഇതിൽ ഖേദം പ്രകടിപ്പിച്ചു കൊണ്ടാണ് സുരാജ് വീണ്ടും ഫേസ് ബുക്ക് പോസ്റ്റ് ചെയ്തിരിക്കുന്നത്.

"മലപ്പുറത്തിന്റെ സ്നേഹവും, ഫുട്ബോളും ലാളനയും എല്ലാ അർത്ഥത്തിലും കാണിച്ചു തന്ന ഒരു സിനിമ എന്ന് മാത്രമാണ് ഇന്നലെ എഴുതിയ നിരൂപണത്തിൽ ഉദ്ദേശിച്ചത്, മലപ്പുറത്തിന്റെ സ്നേഹവും കരുത്തും എല്ലാമാണ് മുസ്ലിം ലീഗും കുഞ്ഞാലി കുട്ടി സാഹിബും എല്ലാം, സുഡാനി എന്ന സിനിമയിലൂടെ മലപ്പുറത്തിന്റെ സ്നേഹവും മറ്റൊരു ജീവനോടുള്ള കരുതലും വേറെ ഒരു ആംഗിളിൽ പ്രേക്ഷകർക്ക് കാണിച്ചു സുഡാനി ഫ്രം നൈജീരിയ എന്ന് മാത്രമാണ് ഉദ്ദേശിച്ചത്... ഞാൻ എഴുതിയതിൽ ഏതെങ്കിലും രീതിയിൽ ആർക്കെങ്കിലും മനപ്രയാസം നേരിട്ടതിൽ ഖേദം പ്രകടിപ്പിക്കുന്നു...
സുരാജ് !!!