1998 ല്‍ കൃഷ്ണമൃഗത്തെ വേട്ടയാടിയ കേസിലാണ് ഇന്നലെ സല്‍മാന്‍ ഖാന് അഞ്ചു വര്‍ഷം തടവും പതിനായിരം രൂപ പിഴയും വിധി വന്നത്. 20 വര്‍ഷം പഴക്കമുള്ള കേസിലാണ് ജോധ്പൂര്‍ വിചാരണ കോടതി വിധി പ്രഖ്യാപിച്ചത്.

വിധി വന്നതോടെ ജോധ്പൂരിലെ സെന്‍ട്രല്‍ ജയിലിലേക്ക് ഇന്നലെ വൈകിട്ടത്തോടെ സുപ്പര്‍ സ്റ്റാറിനെ എത്തിച്ചു. 106-ാം നമ്പർ തടവുകാരനായാണ് ബോളിവുഡിന്റെ സൂപ്പര്‍ സ്റ്റാര്‍ സല്‍മാന്‍ ഖാന്‍ ജോധ്പൂര്‍ ജയിലില്‍ കഴിയുന്നത്. സെല്ലില്‍ തനിച്ചാണ് സല്‍മാന്‍ ഖാനെ ഇട്ടിരിക്കുന്നതെന്നും തറയില്‍ കിടന്ന് ഉറങ്ങാനായി നാലു പുതപ്പുകള്‍ നല്‍കിയതായും പോലീസ് ഓഫീസര്‍ വിക്രം സിങ് വ്യക്തമാക്കി. ജോധ്പൂര്‍ ജയിലില്‍ ഇതു നാലാം തവണയാണ് സല്‍മാന്‍ ഖാന്‍ തടവുകാരനായി എത്തുന്നത്.

1998, 2006, 2007 എന്നീ വര്‍ഷങ്ങളിലായി താരം ആകെ 18 ദിവസം ജയിലില്‍ കഴിഞ്ഞിരുന്നു. കറുത്ത ഷര്‍ട്ടും ജീന്‍സും ധരിച്ച്‌ രാജസ്ഥാന്‍ പോലീസിന്റെ വളയത്തിലാണ് സല്‍മാന്‍ ഖാന്‍ ജയിലിലേക്ക് എത്തിയത്. പിന്നാലെ പോലീസ് ഓഫീസര്‍ക്കു മുന്നില്‍ ക്ഷമയോടെ 52 കാരനായ താരം കാത്തിരിക്കുന്ന ചിത്രങ്ങളും ഇന്നലെ പുറത്തെത്തിയിരുന്നു.

ബാരാക് നമ്പർ രണ്ടിലാണ് സല്‍മാന്‍ ഖാന്‍ കിടക്കുന്നത്. സഹതടവുകാരനായി ആ ബാരകില്‍ ഉള്ളത് പീഡനകേസില്‍ ജയിലില്‍ കഴിയുന്ന ആള്‍ദൈവം ആസാറാം ബാപ്പുവാണ്.