ബോളിവുഡില്‍ മാത്രമല്ല, ഹോളിവുഡിലും നിരവധി ചിത്രങ്ങളില്‍ വേഷമിട്ട താരമാണ് പ്രിയങ്ക ചോപ്ര. അമേരിക്കന്‍ ടി വി ഷോയില്‍ അഭിനയിക്കുന്ന ആദ്യ ദക്ഷിണേഷ്യന്‍ താരം കൂടിയാണ് പ്രിയങ്ക. പക്ഷേ, ഇത്രയൊക്കെ അറിയപ്പെടുന്ന താരമായിട്ടും തനിക്കും വംശീയാധിക്ഷേപത്തില്‍ നിന്നും രക്ഷയുണ്ടായില്ലെന്ന് വെളിപ്പെടുത്തുകയാണ് പ്രിയങ്ക. ഇന്‍സ്‌റ്റൈലിന് നല്‍കിയ അഭിമുഖത്തിലാണ് തന്റെ തൊലിയുടെ നിറം തവിട്ടായതിന്റെ പേരില്‍ കഴിഞ്ഞ വര്‍ഷം ഒരു ഹോളിവുഡ് ചിത്രം നഷ്ടമായ കാര്യം പ്രിയങ്ക വെളിപ്പെടുത്തിയത്.

'കഴിഞ്ഞ വര്‍ഷമാണ് അത് സംഭവിച്ചത്. ഞാന്‍ ഒരു സിനിമയുടെ ചിത്രീകരണത്തിനായി പോയതാണ്. അപ്പോള്‍ സ്റ്റുഡിയോയില്‍ നിന്നും ഒരാള്‍ പുറത്തു വന്നു. അയാള്‍ എന്റെ ഏജന്റിനോട് പറഞ്ഞത് എന്റെ ശരീരത്തിന് എന്തോ കുഴപ്പമുണ്ട് എന്നാണ്. ഇതിനെ എതിര്‍ക്കാനായി, ഇനിയും മെലിയണോ നല്ല ഷേപ്പിലേയ്ക്ക് വരണമോ എന്നൊക്കെ ചോദിച്ചു.

എനിക്ക് മസിലുകള്‍ വേണോ? എന്താണ് എന്റെ ശരീരത്തിന് പ്രശ്‌നമുണ്ടെന്ന് പറയുന്നത്. അപ്പോഴാണ് എനിക്കെന്റെ ഏജന്റ് കാര്യം വിശദീകരിച്ചു തരുന്നത്. അവര്‍ക്ക് വേണ്ടത് തവിട്ടു നിറമല്ലാത്ത വ്യക്തിയെ ആണെന്നായിരുന്നു വിശദീകരണം. അതെന്നെ വല്ലാതെ ബാധിച്ചെന്ന് പ്രിയങ്ക പറഞ്ഞു. സിനിമയില്‍ സ്ത്രീകള്‍ക്കും പുരുഷന്മാര്‍ക്കും രണ്ടു വേതനം നല്‍കുന്നത് അമേരിക്കയിലാണെങ്കിലും ഇന്ത്യയിലാണെങ്കിലും മാറ്റമൊന്നുമില്ലാത്ത സംഗതിയാണെന്നും പ്രിയങ്ക വെളിപ്പെടുത്തി.