വംശീയാധിക്ഷേപത്തിന് ഇരയായിട്ടുണ്ടെന്ന വെളിപ്പെടുത്തലുമായി ബോളിവുഡിന്റെ പ്രിയതാരം പ്രിയങ്ക ചോപ്ര. ബോളിവുഡിൽ നിന്നും ഹോളിവുഡിലേക്ക് ചേക്കേറിയ പ്രിയങ്ക ചോപ്ര ഇന്‍സ്റ്റൈല്‍ എന്ന മാധ്യമത്തിന് നല്‍കിയ അഭിമുഖത്തിലാണ് ഇക്കാര്യം വെളിപ്പെടുത്തിയത്. അമേരിക്കയിലും ഇന്ത്യയിലും സിനിമയില്‍ സ്ത്രീകള്‍ക്കും പുരുഷന്മാര്‍ക്കും രണ്ടു വേതനമാണ് ഇക്കാലത്ത് പോലും നല്‍കുന്നതെന്നും താരം വ്യക്തമാക്കി.

തന്റെ തൊലിയുടെ നിറം തവിട്ടായതിനാല്‍ കഴിഞ്ഞ വര്‍ഷം ഹോളിവുഡ് സിനിമ നഷ്ടമായിട്ടുണ്ടെന്നാണ് പ്രിയങ്കയുടെ വെളിപ്പെടുത്തല്‍. അഭിമുഖത്തിൽ താരം പറയുന്നത് ഇങ്ങനെ ; ‘കഴിഞ്ഞ വര്‍ഷമാണ് അത് നടന്നത്. ഒരു സിനിമയുടെ ചിത്രീകരണവുമായി ബന്ധപ്പെട്ട് പോയതാണ് താന്‍. അപ്പോള്‍ സ്റ്റുഡിയോയില്‍ നിന്ന് പുറത്തുവന്ന ഒരു വ്യക്തി തന്റെ ഏജന്റിനോട് തന്റെ ശരീരത്തിന് എന്തോ കുഴപ്പമുണ്ടെന്ന് പറഞ്ഞു. എന്താണ് ശരിക്കും അയാള്‍ ഉപയോഗിച്ച വാക്കെന്ന് തനിക്കറിയില്ല.’

‘അതുകൊണ്ടുതന്നെ താന്‍ ചോദിച്ചുകൊണ്ടേയിരുന്നു, താന്‍ ഇനിയും മെലിയണമോ, ശരീരത്തിന്റെ ഷെയ്പ് മെച്ചപ്പെടുത്തണമോ, എന്നൊക്കെ ആവര്‍ത്തിച്ച് ചോദിച്ചു. അപ്പോഴാണ് തന്റെ ശരീരത്തിന്റെ തവിട്ട് നിറമാണ് പ്രശ്‌നമെന്ന് ഏജന്റ് പറഞ്ഞത്. അതുകേട്ടപ്പോള്‍ താന്‍ തകര്‍ന്ന് പോയി’- എന്ന് പ്രിയങ്ക വെളിപ്പെടുത്തുന്നു.