മികച്ച അവസരം ലഭിക്കുകയാണെങ്കിൽ സംയുക്താ വർമ്മ സിനിമയിൽ മടങ്ങിയെത്തുമെന്ന് ബിജു മേനോൻ. എന്നാൽ ഇപ്പോൾ അത്തരത്തിൽ ഒരു പദ്ധതിയില്ലെന്നും ഒരു ഇംഗ്ലീഷ് ദിനപത്രത്തിന് നൽകിയ അഭിമുഖത്തിൽ ബിജു പറഞ്ഞു.

സിനിമാ ദമ്പതിമാരിൽ എല്ലാവരും അനുകരണീയ മാതൃകയായി ചൂണ്ടികാണിക്കുന്നവരാണ് സംയുക്ത വർമ്മയും ബിജു മേനോനും. വർഷങ്ങൾ നീണ്ട പ്രണയത്തിനൊടുവിലാണ് ഇരുവരും വിവാഹിതരായത്. ജൂഡ് അട്ടിപ്പേറ്റി സംവിധാനം ചെയ്ത പുത്രൻ എന്ന സിനിമയിലൂടെയാണ് ബിജു മേനോൻ സിനിമയിലെത്തിയത്. സിനിമയിലെ സൗമ്യസാന്നിധ്യമാണ് ബിജു മേനോൻ. സംയുക്തയുമായുള്ള ബിജു മേനോന്റെ ദാമ്പത്യം എക്കാലത്തും അനുകരണീയ മാതൃകയായിരുന്നു.

സംയുക്തയും ബിജു മേനോനും പൊതുചടങ്ങുകളിലെ സജീവ സാന്നിധ്യമാണ്. സിനിമാക്കാരുടെയും അല്ലാത്തവരുടെയും ചടങ്ങുകളിൽ സംയുക്തയും ബിജുവും സ്ഥിരം സാന്നിധ്യമാണ്. ത്യശൂരിൽ വേരുള്ള കുടുംബങ്ങളാണ് സംയുക്തയുടെയും ബിജുവിന്റെയും. അതു കൊണ്ടു തന്നെ ത്യശൂരുകാരുടെ പ്രിയപ്പെട്ടവരാണ് ഇവർ.

ദിലീപ്-മഞ്ജു വാര്യർ ദാമ്പത്യത്തിലുണ്ടായ വിള്ളലുകളൊന്നും സംയുക്തയുടെയും ബിജുവിന്റെയും ജീവിതത്തിൽ ഉണ്ടാവുകയില്ല. ഇരുവരും തമ്മിലുള്ള പരസ്പര വിശ്വാസം പ്രസിദ്ധമാണ്. ഒരു കുടുംബസ്ഥനാണ് ബിജു മേനോൻ. തർക്കങ്ങളില്ലാതെ ജീവിക്കുന്നയാളാണ് ബിജു. ആരോടും മത്സരിക്കാനില്ല ബിജു.

സംയുക്ത സിനിമയിൽ വരുമോ എന്ന ചോദ്യം താൻ സ്ഥിരം അഭിമുഖീകരിക്കാറുള്ളതാണെന്ന് ബിജു പറഞ്ഞു. സംയുക്തയുടെ ആരാധകരാണ് ഇത്തരത്തിൽ ചോദ്യങ്ങൾ ചോദിക്കുന്നത്. അതിൽ ബിജുവിന് വിരോധമില്ല. കാരണം സംയുക്തയുടെ കഴിവ് ബിജുവിനറിയാം. സിനിമയിൽ അഭിനയിക്കുന്നത് സംയുക്തയുടെ വ്യക്തിപരമായ അഭിപ്രായമാണെന്നാണ് ബിജു എക്കാലവും പറഞ്ഞിട്ടുള്ളത്

സീനിയർ താരങ്ങളുമായുള്ള ചങ്ങാത്തമാണ് ബിജുവിന് ധാരാളം അവസരങ്ങൾ കൊണ്ടു കൊടുക്കുന്നത്. ആരോടും മത്സരിക്കാൻ താനില്ലെന്ന് ബിജു പറയുന്നത് അതുകൊണ്ടാണ്.

ഒരായിരം കിനാക്കൾ ആണ് ബിജുവിന്റെ പുതിയ ചിത്രം. നർമ്മ വഴിയിലൂടെ പറയുന്ന ഗൗരവമുള്ള കഥയാണ് ഒരായിരം കിനാക്കൾ. പ്രമോദ് മോഹൻ സംവിധാനം ചെയ്യുന്ന ചിത്രം ബിജുവിനെ തേടിയെത്തിയത് രണ്ടര വർഷം മുമ്പാണ്. തികച്ചും ഗൗരവമുള്ള കഥയാണ് പ്രമോദ് പറഞ്ഞത്. സീരിയസ് സിനിമകൾ ഇഷ്ടമാണെങ്കിലും അത് തന്റെ വഴിയിലൂടെ പറയാനാണ് ബിജു ആഗ്രഹിക്കുന്നത്. നിർമ്മാതാക്കൾക്ക് സാമ്പത്തിക നഷ്ടമുണ്ടാക്കുന്ന സിനിമകൾ എടുക്കാൻ ബിജു തയ്യാറല്ല.

കാര്യങ്ങൾ ഇങ്ങനെയൊക്കെയാണെങ്കിലും താൻ സിനിമയിലേക്കില്ലെന്ന നിലപാട് തന്നെയാണ് സംയുക്ത സ്വീകരിക്കുന്നത്. അത്തരം കാര്യങ്ങൾ തന്റെ ചിന്തയിലില്ല. കുറച്ചധികം നല്ല ചിത്രങ്ങൾ ചെയ്തു. അതോടെ സിനിമാകാലഘട്ടം കഴിഞ്ഞു എന്നാണ് സംയുക്തയുടെ നിലപാട്.