മണിരത്‌നത്തിന്റെ സെക്ക സിവന്ത വാനം സിനിമയുടെ തിരക്കിലാണ് സിമ്പു ഇപ്പോൾ. തുടർച്ചയായ പരാജയത്തിന് ശേഷം തമിഴകത്തെ സിമ്പുവിന്റെ മടങ്ങിവരവിന് ഈ ചിത്രം കളമൊരുങ്ങുമെന്നാണ് ആരാധകര്‍ പ്രതീക്ഷിക്കുന്നത്.

സിനിമയില്‍ വലിയ രീതിയിൽ സജീവമല്ലെങ്കിലും ടെലിവിഷന്‍ പരിപാടികളിൽ നിറ സാനിധ്യമാണ് ചിമ്പു. സീ തമിഴ് ചാനലിലെ ഡാന്‍സ് ജോഡി ഡാന്‍സ് ഷോയുടെ ഗ്രാന്റ് ഫിനാലെയില്‍ അതിഥിതി സിമ്പു ആയിരുന്നു. ഷോയില്‍ സിമ്പുവിന്റെ കണ്ണുകളെ ഈറനണിയിച്ചത് ഒരു കൊച്ചുപെൺകുട്ടിയുടെ സാന്നിധ്യമായിരുന്നു.

മുൻപ് സംസാരശേഷി നഷ്ടപ്പെട്ട ഒരു കുട്ടിയുടെ ചികില്‍സാ ചെലവ് ചിമ്പു ഏറ്റെടുത്തിരുന്നു. തന്റെ ഒരു ആരാധകന്‍ മുഖേനയാണ് ചിമ്പു കുട്ടിയുടെ അസുഖത്തെക്കുറിച്ചുളള വിവരം അറിഞ്ഞതും ചികില്‍സാ ചെലവ് ഏറ്റെടുത്തതും. എന്നാൽ ഏറെ അപ്രതീക്ഷിതമായി ആ പെണ്‍കുട്ടിയെ ഷോയില്‍ എത്തിച്ച് അണിയറപ്രവര്‍ത്തകര്‍ സിമ്പുവിനെ ഞെട്ടിക്കുകയാണ്. സംസാരശേഷി വീണ്ടെടുത്ത കുട്ടി സിമ്പുവിനെ പേര് ചൊല്ലി വിളിക്കുകയായിരുന്നു. ഇത് കേട്ട നടന്‍ പൊട്ടിക്കരഞ്ഞുപോയി.