കുളിക്കുമ്പോൾ കൈ എത്തും ദൂരത്തുള്ള ഷാംപൂ എടുത്തു തലയിൽ തേച്ചു പിടിപ്പിച്ച ശേഷം ഒരു കഴുകൽ. ഇങ്ങനെ ഷാംപൂ ചെയ്യലാണ് പലരുടെയും പതിവ്. പലരും തലയിൽ തേച്ച ഷാംപൂ നന്നായി കഴുകി കളയുക പോലുമില്ല. മുടി വൃത്തിയാക്കാൻ ഷാംപൂ ചെയ്തിട്ട് അതിനെ പഴയതിനെക്കാൾ മോശമായ അവസ്ഥയിലേക്ക് തള്ളി വിടുകയാണ് ഇങ്ങനെ ചെയ്യുന്നവർ. നിങ്ങളുടെ മുടി ശുചിയായി സൂക്ഷിക്കുന്നതിന് അവലംമ്പിക്കേണ്ടുന്ന മാർഗങ്ങളാണ് ഇനി പറയാൻ പോകുന്നത്. മുടി ഷാംപൂ ചെയ്യുമ്പോൾ ഇങ്ങനെ തന്നെ ചെയ്താൽ മുടിയെ സൂക്ഷിക്കാവുന്നതാണ്.ഷാംപൂ ചെയ്യുന്നതിനു മുൻപുള്ള ആദ്യ പടി തല മുടി നന്നയി ചീകി വൃത്തിയാക്കുക. മുടി ചീകുന്നത് വഴി രക്തചംക്രമണം വര്‍ദ്ധിക്കുകയും സുഷിരങ്ങള്‍ തുറക്കുകയും ചെയ്യും. ശിരോചര്‍മ്മത്തില്‍ എണ്ണ അടിഞ്ഞു കൂടുന്നത് തടയാൻ കുളിക്കുന്നതിനു മുമ്പായി തല മുടി ചീകി മുടിയിലെ ചുരുളും കെട്ടും മാറ്റുക. . തലമുടിയിലെ ചുരുളഴിക്കുന്നത്തിലൂടെ തലയുടെ മുകൾ ഭാഗം മുതൽ മുടിയുടെ താഴെ വരെ ഒരേ രീതിയില്‍ ഷാംപൂ പുരളുവാൻ ഇടയാകുന്നു.

ഷാംപൂ ഉപയോഗിക്കുന്നതിനു മുമ്പായി മുടി നന്നായി കഴുകുകയാണ് അടുത്ത പടി. മുടി കഴുകുന്നതിനായി ചെറുചൂടുവെള്ളം ഉപയോഗിക്കുക. ഇങ്ങനെ ചെയ്യുന്നത് വഴി മുടിയിലെ ക്യൂട്ടിക്കിളുകള്‍ തുറക്കും. മാത്രമല്ല മുടിയിൽ അടിഞ്ഞു കൂടിയിട്ടുള്ള പൊടിയും മറ്റ് വസ്തുക്കളും മാറ്റം ചെയ്യാനും കഴിയും. ഇത് വഴി കണ്ടീഷണറില്‍ ഉള്ള എണ്ണകള്‍ വേഗത്തിൽ ആഗിരണം ചെയ്യപ്പെടും. നമ്മൾ ഉപയോഗിക്കുന്ന വെള്ളം കാഠിന്യമുള്ളതാണെങ്കില്‍ ആ വെള്ളത്തിൽ നിന്നും മുടിക്ക് കേടു വരുത്തുന്ന ധാതുക്കള്‍ അരിച്ചു മാറ്റുവാൻ പാകത്തിന് ഫില്‍റ്റര്‍ ഉപയോഗിക്കാവുന്നതാണ്. കാഠിന്യം കുറഞ്ഞ വെള്ളം മുടി നല്ല രീതിയില്‍ വൃത്തിയാക്കുവാന്‍ സഹായകമാണ്.

നേരിട്ട് ഷാംപൂ ഉപയോഗിക്കുന്നത് മുടിയുടെ ആരോഗ്യത്തിനു നല്ലതല്ല. നമ്മുടെ കയ്യില്‍ അല്പം ഷാംപൂ എടുത്ത് തലയോട്ടിയില്‍ നന്നയി തേച്ചു പിടിപ്പിക്കുക. ശേഷം നന്നായി തലയോട്ടിയില്‍ മസാജ് ചെയ്യുക. മുടിയുടെ താഴെ വരെ മസാജ് ചെയ്യാവുന്നതാണ്. നമ്മുടെ കഴുത്തിന്റെയും ചെവിയുടേയും പിന്നിലുള്ള ഭാഗം ഉള്‍പ്പെടെ തലയുടെ എല്ലാ ഭാഗത്തും ഷാംപൂ എത്തുന്നുണ്ടെന്ന് ഉറപ്പ് വരുത്തുക. എന്നാല്‍ അമർത്തി തേയ്ക്കരുത്. അങ്ങനെ ചെയ്‌താൽ മുടിയുടെ ക്യൂട്ടിക്കിളുകൾ നശിച്ചു പോകും. നമ്മുടെ മുടിയുടെ വേരുകളാണ് എണ്ണയെ ശേഖരിക്കുന്നത്. അതുകൊണ്ടു ആ ഭാഗത്തു കൂടുതല്‍ ഷാംപൂ ഉപയോഗിക്കുക. മുടിയുടെ അഗ്രത്തില്‍ കുറച്ച്‌ മാത്രം ഷാംപൂതേച്ചാൽ മതിയാകും. കുറച്ചു നേരം ഷാംപൂ ശിരോചര്‍മ്മത്തില്‍ വച്ചിരിക്കുക. എന്നിട്ടു ഷാംപൂ അല്പം പോലും അവശേഷിക്കുന്നില്ല എന്ന് ഉറപ്പു വരുത്തുക. അത് ഉറപ്പാക്കുന്നതിനായി ചൂടുവെള്ളം ഉപയോഗിച്ച്‌ നന്നായി കഴുകുകയാണ് വേണ്ടത്. നീളൻ മുടി ഉള്ളവർ തണുത്ത വെള്ളം ഉപയോഗിച്ച്‌ മുടി കഴുകുക. കഴുകിയ മുടിയ്ക്കുള്ളില്‍ ക്യൂട്ടിക്കിളുകള്‍ അടയുവാനും ഈര്‍പ്പം പിടിച്ചു നിര്‍ത്തുവാനും ഇത് സഹായകമാണ്.

ഷാംപൂ ചെയ്ത ശേഷം കണ്ടീഷണർ ഉപയോഗിക്കാൻ മറക്കരുത്. ഷാംപൂ ചെയ്ത മുടിയില്‍ നിന്നും മുഴുവനായും വെള്ളം കളയുക. എന്നിട്ടു നമ്മുടെ മുടിയ്ക്ക് ഏറ്റവും അനുയോജ്യമായ കണ്ടീഷണര്‍ തെരഞ്ഞെടുക്കുക. മുടിയിഴകളിലും മുടിയുടെ അറ്റത്തും മാത്രം കണ്ടീഷണര്‍ ഉപയോഗിക്കുക. ശിരോചര്‍മ്മത്തില്‍ ഒരിക്കലും കണ്ടീഷണര്‍ ഉപയോഗിക്കരുത്. കുറെ നേരം വച്ചതിന് ശേഷം തണുത്ത വെള്ളം കൊണ്ടു കഴുകുക. കണ്ടീഷണർ മുഴുവനായും മുടിയില്‍ നിന്നും കഴുകി കളയുക. കണ്ടീഷണർ മുടിയിൽ പറ്റിപ്പിടിച്ചിരിക്കാതെ ശ്രദ്ധിക്കണം. കാരണം ഇത് അമിതമായി എണ്ണ അടിഞ്ഞു കൂടുന്നതിലേക്ക് നയിക്കും.

ഷാംപൂ ചെയ്തതിന് ശേഷം മുടി നന്നായി ഉണക്കുക. മുടിയില്‍ നിന്നും വെള്ളം കളഞ്ഞതിന് ശേഷം തലയ്ക്ക് ചുറ്റും ഒരു ടവല്‍ പൊതിഞ്ഞ് കുറച്ചു നേരം വയ്ക്കുക. അകലമുള്ള പല്ലുകളുള്ള ചീപ്പ് കൊണ്ട് മുടിയുടെ ചു രുളുകൾ അഴിക്കുക. നനഞ്ഞ മുടി പൊട്ടാനുള്ള സാധ്യതയുള്ളതിനാൽ വേഗത്തിൽ ചീകരുത്. മുടി ഉണങ്ങുവാനായി ടവല്‍ ഉപയോഗിച്ച്‌ ശക്തിയായി മുടി തുടയ്ക്കരുത്. നനഞ്ഞ തലമുടികളിലെ കെട്ടുകള്‍ അഴിക്കുന്നതിനായി സാവകാശം മുകളില്‍ നിന്നും താഴേക്ക് മുടി തുടയ്യ്ക്കുക. മുടി സ്വാഭാവികമായി ഉണങ്ങാൻ അനവദിക്കുക.