ടോയ്‌ലറ്റില്‍ പോയ യുവതി പ്രസവിച്ചു, ഗര്‍ഭിണിയാണെന്നറിഞ്ഞില്ല, വയറു വേദന കാരണം ആശുപത്രിയില്‍ എത്തിയപ്പോള്‍ പ്രസവിച്ചു തുടങ്ങിയ വാര്‍ത്തകള്‍ കേട്ട് വാ പൊളിക്കാത്തവരായി ആരും തന്നെയുണ്ടാകില്ല. അതെങ്ങനെ എന്ന വലിയൊരു സംശയം ഉണ്ടാകാത്തവരായി ആരും തന്നെയുണ്ടാകില്ല. സാധരണ ഗർഭാവസ്ഥയിൽ സ്ത്രീകൾക്ക് ഉണ്ടാകുന്ന പല തരത്തിലുള്ള ലക്ഷണങ്ങൾ ഉണ്ട്. പക്ഷേ അതൊന്നും തന്നെ ഉണ്ടാകില്ല ഈ പ്രസവത്തിന്. അതിനെ ക്രിപ്റ്റിക് പ്രെഗ്‌നന്‍സിയെന്നാണ് പറയുന്നത്.

ഒന്‍പതു മാസവും വയറ്റില്‍ പേറുന്ന ഗര്‍ഭം, വയറു വലുതാകുക തുടങ്ങിയ ലക്ഷണങ്ങള്‍ കാണിയ്ക്കുന്ന ഗര്‍ഭം തിരിച്ചറിയപ്പെടാതെ പോകുന്നതെങ്ങനെയെന്ന് നാം പലപ്പോഴും ചിന്തിക്കാറുണ്ട്. ഗര്‍ഭം അറിഞ്ഞാലും മനപൂര്‍വം ഒളിപ്പിച്ചു പിടിയ്ക്കുന്നവരുണ്ട്. അവരെ മാറ്റി നിർത്തൂ . എന്നാല്‍ ഒളിച്ചിരിയ്ക്കുന്ന ഗര്‍ഭവുമുണ്ട്, ക്രിപ്റ്റിക് പ്രെഗ്‌നന്‍സി എന്നതാണ് ഇതിന്റെ മെഡിക്കല്‍ നാമം. സാധാരണ ഗര്‍ഭധാരണത്തില്‍ ആര്‍ത്തവം നിലയ്ക്കുക, സ്‌കാനിംഗില്‍ ഭ്രൂണം ദൃശ്യമാകുക, ഗര്‍ഭിണിയില്‍ കണ്ടു വരുന്ന ഛര്‍ദി, മനംപിരട്ടല്‍, മാറിടങ്ങളിലെ വ്യത്യാസം എന്നിവയെല്ലാം സാധാരണയാണ്. എന്നാല്‍ ക്രിപ്റ്റിക് ഗര്‍ഭധാരണത്തില്‍ ഇതില്‍ മിക്കവാറും കാര്യങ്ങള്‍ ഉണ്ടാകില്ല. പ്രഗ്‌നന്‍സി ടെസ്റ്റും നെഗറ്റീവാകുമെന്നതാണ് കാരണം. ഇതാണ് ഈ ക്രിപ്റ്റിക് പ്രഗ്‌നന്‍സിയുടെ പ്രത്യേകത. ഈ പ്രത്യേക ഗര്‍ഭധാരണത്തില്‍ ഹോര്‍മോണ്‍ വ്യത്യാസങ്ങള്‍ കാരണം ആര്‍ത്തവം സംഭവിയ്ക്കില്ലെങ്കിലും ഇതിനോടു സമാനമായ, ചെറിയ തോതില്‍ ബ്ലീഡിംഗ് ഉണ്ടാകും. ഇത് ആര്‍ത്തവമെന്നു നാം കരുതുകയും ചെയ്യും. ഇതു കൊണ്ടു തന്നെ ഗര്‍ഭധാരണമെന്ന സംശയവും തോന്നില്ല. 2,500 പ്രസവങ്ങളില്‍ ഒരെണ്ണം ഇത്തരത്തില്‍ നടക്കും. അറിയാതെയുള്ള ഗര്‍ഭമാകാം എന്നാണ് ഡോക്ടർമാര്‍ പറയുന്നത്. യുകെയില്‍ മാത്രം ഏതാണ്ട് നൂറുകണക്കിന് കുഞ്ഞുങ്ങള്‍ ഇങ്ങനെ പിറന്നിട്ടുണ്ട്.