ആഹാരത്തെ വേണ്ട വിധം ദഹിപ്പിച്ച ശേഷം അതിന്റെ അവശിഷ്ടത്തെ സുഖകരമായി പുറത്തു കളയുന്ന ദൗത്യത്തിലേർപ്പെട്ടിരിക്കുന്ന അവയവമാണ് മലദ്വാരം . മലത്തെ താല്‍ക്കാലികമായി തടഞ്ഞു നിര്‍ത്തുന്ന റെക്ടം എന്ന ഭാഗം മനുഷ്യരെ സംബന്ധിച്ചേടത്തോളം പ്രാധാന്യമുണ്ട് . ഇതില്ലായിരുന്നെങ്കില്‍ ആഹാരം കുടലിലൂടെ നീങ്ങി നീങ്ങി മറുവശത്തെത്തുമ്പോഴേക്കും നിയന്ത്രണമില്ലാതെ പുറത്തു പോയേനെ. കുടലിലെ അവശിഷ്ടത്തെ തടഞ്ഞു നിര്‍ത്തുന്ന സംരക്ഷണ അറയാണ് റെക്ടം. ഈ സംവ്വിധാനം ഇല്ലായിരുന്നെങ്കില്‍ പക്ഷികളെപ്പോലെ ഏത് നേരത്തും എവിടെ വെച്ചും മലം പോയെന്നിരിക്കും. ഇതോടെ മനുഷ്യ ജീവിതം ദുസ്സഹമാകുമെന്ന് പറയേണ്ടതില്ലല്ലൊ. എന്നാല്‍ മലം ഒട്ടും പുറത്ത് പോകാതിരുന്നാലോ പറഞ്ഞറിയിക്കാനാകാത്ത അസ്വസ്ഥതകള്‍ അനുഭവിക്കേണ്ടി വരും. പുറമെ മറ്റു രോഗങ്ങള്‍ക്ക് അത് കാരണമാകും .ഈ പ്രയാസങ്ങളൊന്നുമില്ലാതെ ആവശ്യമുള്ളത്ര സമയം മലത്തെ തടഞ്ഞു നിര്‍ത്തുകയും സമയാസമയം അതിനെ പുറം തള്ളുകയും ചെയ്യുന്ന സുപ്രധാനമായ ദൗത്യമാണ് മലദ്വാരം നിര്‍വ്വഹിക്കുന്നത്.

അത്‌കൊണ്ട് തന്നെ മലദ്വാരവുമായി ബന്ധപ്പെട്ട രോഗങ്ങള്‍ യാതൊരു കാരണവശാലും അവഗണിക്കരുത്.എന്നാൽ നിർഭാഗ്യവശാൽ പലർക്കും മലദ്വാരവുമായി ബന്ധപ്പെട്ട രോഗങ്ങള്‍ പലപ്പോഴും പുറത്തുപറയാന്‍ മടിയാണ്. പ്രധാനമായും പൈല്‍സ്,ഫിഷര്‍,ഫിസ്റ്റുല എന്നിങ്ങനെ മൂന്ന് രോഗങ്ങളാണ് മലദ്വാരത്തെ ബാധിക്കുന്നത്.അതിനു പുറമെ പോളിപ്പുകളും, അപൂര്‍വ്വമായി കാന്‍സറും ബാധിച്ചേക്കാം. അതിനാല്‍ കൃത്യമായ രോഗനിര്‍ണയവും ചികിത്സയും ഏറെ പ്രാധാന്യമര്‍ഹിക്കുന്നു . പലപ്പോഴും പലരിലും മലദ്വാരത്തിലൂടെ രക്തം പുറത്തേക്ക് പോകുന്ന അവസ്ഥ കാണാറുണ്ട് .പല കാരണങ്ങൾ കൊണ്ട് ഇങ്ങെന സംഭവിക്കാം . അതിൽ ഒരു കാരണം പൈൽസ് ആണ്. മല വിസര്‍ജ്ജനത്തിന് മുന്നോടിയായി വേദനയൊന്നും കൂടാതെ തന്നെ ടോയ്‌ലറ്റില്‍ രക്തം ചീറ്റി പോകുന്നത് കണ്ടാൽ അത് പൈൽസിന്റെ ലക്ഷണം ആയേക്കാം .ചികിത്സയിലൂടെ ഭേദമാക്കാവുന്ന രോഗമാണിത് . അടുത്ത കാരണം ഫിഷര്‍ ആകാം. ഫിഷര്‍എന്നാല്‍ മലദ്വാരത്തില്‍ വിള്ളലുണ്ടാകുന്ന അവസ്ഥയാണ്.

സ്ഥിരമായി മലബന്ധമുണ്ടാകുന്ന ആളുകള്‍ക്ക് ഫിഷര്‍ വരാനുള്ള സാധ്യത ഏറെയാണ്. മലത്തോടൊപ്പം രക്തം കാണുന്നതും, മലം പോയ ശേഷം അതിയായ നീറ്റല്‍ അനുഭവപ്പെടുന്നതും രോഗ ലക്ഷണങ്ങളാണ്. മലബന്ധമുള്ളപ്പോള്‍ മലം പുറത്തു കളയാനായി മുക്കേണ്ടി വരും (സ്‌ട്രെയ്‌നിംഗ്). അത്തരം അവസരങ്ങളില്‍ മലദ്വാരം അമിതമായി വികസിക്കുക വഴി അതിന്റെ ഉള്‍ഭിത്തിയില്‍ വിള്ളലുണ്ടാകുകയും ചെയ്യുന്നു.
ഫിസ്റ്റുല എന്നത് മലദ്വാരത്തിന് പുറത്തായി മറ്റൊരു ദ്വാരമുണ്ടാകുന്ന അവസ്ഥയാണ്. ഈ ദ്വാരത്തിലൂടെ മലമോ,അധോ വായുവോ,പഴുപ്പോ എല്ലാം അനിയന്ത്രിതമായി പുറത്തേക്ക് ഇറങ്ങി വരാം. പുറത്ത് കാണുന്ന ദ്വാരം ഒരു റ്റിയൂബ് പോലെ നീണ്ട് മറു വശം മലദ്വാരത്തിനകത്ത് തുറന്നിരിക്കും. അതു വഴിയാണ് ഇവ പുറത്തു വരുന്നത്.ഈ നാളിയുടെ ഉള്‍വശം നാരുകോശങ്ങള്‍ (ഫൈബ്രസ് റ്റിഷ്യൂ)വന്ന് അടിഞ്ഞു കൂടി ശരീരത്തിന് ഉണക്കിയെടുക്കാനാകാത്ത വിധം ഒരു ട്യൂബ്‌ആയിത്തന്നെ നിലനില്‍ക്കുന്നു. മലദ്വാരത്തില്‍ ഒരു സ്‌നിഗ്ദ്ധത നിര്‍മ്മിക്കുന്ന ആനല്‍ ഗ്ലാന്റ്‌സ് എന്ന് പേരുള്ള ഗ്രന്ഥികളില്‍ ഉണ്ടാകുന്ന അണുബാധയാണ് ഈ രോഗത്തിന് തുടക്കമിടുന്നത്.

മലത്തിലൂടെ രക്തം പോകാൻ മറ്റൊരു കാരണം പോളിപ്പുകള്‍ആകാം.പോളിപ്പുകള്‍ എന്നാല്‍ മലാശയത്തില്‍ നിന്നും ഒരു തണ്ടില്‍പുറത്തേക്ക് തൂങ്ങി നില്‍ക്കുന്ന പിണ്ഡമാണ്. ചിലപ്പോള്‍ മലാശയത്തില്‍ പറ്റിപ്പിടിച്ചിരിക്കുന്ന രീതിയിലും ആകാം. പലപ്പോഴും ഇത് ലക്ഷണങ്ങളൊന്നും കാണിക്കാറില്ല. എങ്കിലും ചിലര്‍ക്ക് മലത്തോടൊപ്പം രക്തം പോകാന്‍ കാരണമാകാറുണ്ട്. ഭാവിയില്‍ അര്‍ബുദമായി മാറാന്‍ സാധ്യതയുള്ളതിനാല്‍ എത്രയും പെട്ടെന്ന് നീക്കം ചെയ്യുന്നതാണ് നല്ലത്.അപൂര്‍വ്വമാണെങ്കിലും മലദ്വാരവുമായി ബന്ധപ്പെട്ട അര്‍ബുദത്തിന്റെ (കാന്‍സറിന്റെ)സാധ്യതയും തള്ളിക്കളയാനാകില്ല. അതുകൊണ്ടു തന്നെ ചികിത്സ നിശ്ചയിക്കുന്നതിന് മുമ്പുള്ള കൃത്യമായ രോഗ നിര്‍ണയം ഏറെ പ്രാധാന്യമര്‍ഹിക്കുന്ന ഒന്നാണ്. മേലിൽ പറഞ്ഞിരിക്കുന്നതെല്ലാം മലത്തിലൂടെ രക്തം പോകുന്നുണ്ടെങ്കിൽ എന്തൊക്കെ കാരണം കൊണ്ടാകാം അങ്ങനെ സംഭവിക്കുന്നത് എന്നതിനുള്ള കാരണങ്ങൾ മാത്രമാണ് .ഇത്തരത്തിൽ ഒരു അസ്വസ്ഥത നിങ്ങൾക്ക് ഉണ്ടെങ്കിൽ തീർച്ചയായും മറച്ച് പിടിക്കാതെ ഡോക്ടറെ കാണുക. കാരണം കണ്ടെത്തി അപകടകരമായ സ്ഥിതിയിലേക്ക് പോകുന്നതിന് തടയിടുക. വേണ്ടുന്ന ചികിത്സാ സ്വീകരിക്കുക .