അപൂർവമായ ഒരു സ്നേഹബന്ധത്തിന് സാക്ഷിയായിരിക്കുകയാണ് സൈബർ ലോകം. ഫ്രെഡ് എന്ന നായയുടെയും താറാവു കുഞ്ഞുങ്ങളുടെയും അത്ഭുത സൗഹൃദ ബന്ധത്തിന് എന്ത് വിശേഷണം നൽകണമെന്ന് സൈബർ ലോകത്തിന് അറിയില്ല. അമ്മ നഷ്ടപ്പെട്ട താറാവ് കുഞ്ഞുങ്ങള്‍ക്ക് അച്ഛനായിരിക്കുകയാണ് ഫ്രഡ് എന്ന പത്തുവയസുകാരന്‍ നായ.

യുകെയിലെ എസക്‌സിലുള്ള ഒരു കോട്ടയിലാണ് ഫ്രഡിന്റെ താമസം. കോട്ടയ്ക്കരികിലുള്ള തടാകത്തിലായിരുന്നു അമ്മ താറാവും കുഞ്ഞുങ്ങളും കഴിഞ്ഞിരുന്നത്. അമ്മ ചത്തതോടെ കുഞ്ഞുങ്ങള്‍ക്ക് തീറ്റയൊന്നും കിട്ടാതായതോടെ കോട്ടയിലെ ജീവനക്കാര്‍ താറാവു കുഞ്ഞുങ്ങളെ കോട്ടയ്ക്കുള്ളിലേക്ക് കൊണ്ടുവന്നു. അന്നുമുതല്‍ ഫ്രഡ് താരാകുഞ്ഞുങ്ങൾക്ക് സംരക്ഷണം നൽകിപ്പോരുന്നു. ഭക്ഷണം കഴിക്കുന്നതും ഉറങ്ങുന്നതും ഇവരെ കുളത്തില്‍ നീന്താന്‍ കൊണ്ടുപോകുന്നതും ഫ്രഡ് തന്നെ.

ഫ്രഡിന്റെ തലയിലും മുതുകത്തുമൊക്കെ കയറി ഇരുന്ന് കളിക്കാന്‍ താറാവുകുഞ്ഞുങ്ങള്‍ക്ക് വളരെ ഇഷ്ടമാണ്. എത്ര ശല്യപ്പെടുത്തിയാലും താറാവുകുഞ്ഞുങ്ങളെ ഫ്രഡ് ഉപദ്രവിക്കാറില്ല എന്നുള്ളതാണ് അതിശയം. അമ്മ ചത്തുപോയ ഒമ്പത് താറാവു കുഞ്ഞുങ്ങളെ ‘ദത്തെടുത്ത’ ഫ്രഡ് ഇപ്പോൾ സൈബർ ലോകത്തെ താരമാണ്. ഈ അപൂർവ സ്നേഹബന്ധം സമൂഹ മാധ്യമങ്ങളിൽ വൈറലായിരിക്കുകയാണ്.