തിരുവനന്തപുരം രാജ്യാന്തര ചലച്ചിത്രമേളയില്‍ പ്രതിഷേധം. കൈരളി തിയറ്ററില്‍ പ്രദര്‍ശിപ്പിക്കാനിരുന്ന ക്ലാഷ് എന്ന സിനിമയുടെ രാവിലത്തെ പ്രദര്‍ശനത്തിനിടെയാണ് പ്രതിഷേധം. മൊഹമ്മദ് ദിയാബ് സംവിധാനം ചെയ്ത ക്ലാഷ് മത്സരവിഭാഗത്തില്‍ ഏറെ ആകര്‍ഷിക്കപ്പെട്ട ചിത്രമാണ്. ഈ സിനിമയുടെ രണ്ടാമത്തെ പ്രദര്‍ശനമാണ് കൈരളിയില്‍ നടക്കാനിരുന്നത്.

നീണ്ട ക്യൂവിന് ശേഷം കാണികള്‍ തിയറ്റര്‍ പ്രവേശിച്ചപ്പോള്‍ മറ്റൊരു വാതിലിലൂടെ നേരത്തെ തന്നെ കുറേ പേര്‍ തിയറ്ററില്‍ പ്രവേശിച്ചെന്ന് ആരോപിച്ചും റിസര്‍വേഷന്‍ അട്ടിമറിച്ചെന്ന വാദമുയര്‍ത്തിയും ഒരു വിഭാഗം പ്രതിഷേധിച്ചതോടെ സിനിമയുടെ പ്രദര്‍ശനം മുടങ്ങി. സിനിമ വൈകുന്നേരം ആറ് മണിക്ക് നിശാഗന്ധിയില്‍ പ്രദര്‍ശിപ്പിക്കുമെന്ന് ചലച്ചിത്ര അക്കാദമി ചെയര്‍മാന്‍ കമലും ആര്‍ട്ടിസ്റ്റിക് ഡയറക്ടര്‍ ബീനാ പോളും അറിയിച്ചു.