കൊറോണ വ്യാപനത്തിന്റെ നാളുകൾ പിന്നിട്ട പ്രവാസലോകം സജീവമാകുമ്പോൾ തട്ടിപ്പുകളും കൂടുകയാണ്. ഇപ്പോഴിതാ ഖത്തർ എയർവേയ്‌സിന്റെ പേരിൽ ജോലി വാഗ്ദാനം ചെയ്തുകൊണ്ടുള്ള വ്യാജ ഇ–മെയിലുകളിലും പരസ്യങ്ങളിലും ജാഗ്രത പുലർത്തണമെന്ന് ഖത്തർ എയർവേയ്‌സ് അധികൃതർ നിർദ്ദേശം നൽകുകയുണ്ടായി. അംഗീകാരമില്ലാതെ പ്രവർത്തിക്കുന്ന തൊഴിൽ ഏജൻസികളും വ്യാജ ഡൊമെയ്‌നുകളിൽ നിന്നുള്ള ഇ–മെയിലുകൾ വഴിയും ഉദ്യോഗാർഥികളുടെ വ്യക്തിഗത വിവരങ്ങൾ തേടുകയും ജോലി വാഗ്ദാനം ചെയ്ത് പണം തട്ടുന്നതായും ശ്രദ്ധയിൽപ്പെട്ടതിനെ തുടർന്നാണ് അധികൃതരുടെ മുന്നറിയിപ്പ്. തൊഴിൽ തേടി പ്രതീക്ഷയോടെ എത്തുന്ന പലരും ഇത്തരം തട്ടിപ്പുകളിൽ അകപ്പെട്ടുപോകുന്നത് സജീവമാകുകയാണ്.

ഖത്തർ എയർവേയ്‌സിന്റെ തൊഴിൽ സംബന്ധിച്ചുള്ള എല്ലാ ഇ–മെയിലുകളും qatarairways.com.qa അല്ലെങ്കിൽ qatarairways.com എന്നിവ മുഖേന മാത്രമേ ലഭിക്കുകയുള്ളു. ഖത്തർ എയർവേയ്‌സിന്റെ ഔദ്യോഗിക വെബ്‌സൈറ്റുകളിലും സമൂഹമാധ്യമങ്ങളിലെ അക്കൗണ്ടുകളിലൂടെയുമാണ് പ്രസിദ്ധീകരിക്കുന്നത് എന്നും അധികൃതർ അറിയിക്കുകയുണ്ടായി. റിക്രൂട്ട്‌മെന്റ് നടപടികൾക്കായി ഉദ്യോഗാർഥികളുടെ പക്കൽ നിന്നു ഖത്തർ എയർവേയ്‌സ് പണം ഈടാക്കുകയില്ലെന്നും കമ്പനി വ്യക്തമാക്കിയിരിക്കുകയാണ്. തൊഴിലവസരങ്ങൾ സംബന്ധിച്ച വ്യാജ ഇ–മെയിലുകളും മറ്റും ലഭിക്കുന്നവർ reportfraud@qatarairways.com.qa എന്ന ഇ–മെയിലിലൂടെ അറിയിക്കണമെന്നും അധികൃതർ നിർദേശിക്കുകയുണ്ടായി.