കൊറോണ വ്യാപനത്തിന് പിന്നാലെ ഗൾഫ് മേഖലയിൽ സംഭവിക്കുന്നത് വമ്പൻ മാറ്റങ്ങൾ. ഖത്തറിനേർപ്പെടുത്തിയ ഉപരോധം യുഎഇ, സൗദി ഉൾപ്പടെയുള്ള ഗൾഫ് രാഷ്ട്രങ്ങൾ പിൻവലിച്ചത് ഏറെ നിര്ണായകമാകുന്ന ഘട്ടത്തിൽ വീണ്ടും ഇതാ മറ്റൊരു വാർത്ത കൂടി. ഇറാന്‍ ആണവ വിഷയത്തില്‍ ഒരു വിധത്തിലുള്ള ചര്‍ച്ചയും പാടില്ലെന്നതായിരുന്നു സൗദിയുടെ ഇതുവരെയുള്ള നിലപാട്. ഇറാന്‍ ആണവ പദ്ധതി നിര്‍ത്തിവയ്ക്കുന്നതിനു പകരമായി ഇറാനെതിരായ ഉപരോധം പിന്‍വലിക്കുന്ന കരാര്‍ പിന്‍വലിച്ച ട്രംപ് ഭരണകൂടത്തിന്റെ നടപടി തുടരണമെന്നും സൗദി ആവശ്യപ്പെട്ടിരുന്നു.

എന്നാല്‍ ജോ ബെയ്ഡന്റെ നേതൃത്വത്തിലുള്ള യുഎസ്സിലെ ഡെമോക്രാറ്റിക് ഭരണകൂടം, ട്രംപ് സര്‍ക്കാര്‍ ഏകപക്ഷീയമായി റദ്ദാക്കിയ കരാര്‍ തിരികെ കൊണ്ടുവരുമെന്ന സൂചനകള്‍ക്കിടയിലാണ് സൗദിയുടെ നിലപാട് മാറ്റമെന്നാണ് ലഭ്യമാകുന്ന വിവരം. ആണവ വിഷയത്തില്‍ ഇറാനുമായുള്ള ചര്‍ച്ചയില്‍ യുഎസ്സിനെ സഹായിക്കാന്‍ സൗദി ഒരുക്കമാണെന്നായിരുന്നു വിദേശകാര്യമന്ത്രി പ്രസ്താവന നടത്തിയത്.

സൗദി അറേബ്യ ഇറാനിലെ ഒരു പ്രമുഖ പുരോഹിതനെ വധിച്ചതിന് പിന്നാലെയാണ് ഇരുരാജ്യങ്ങളും തമ്മിൽ സംഘർഷം കൂടുതൽ കനത്തത്. പുരോഹിതന്റെ കൊലപാതകത്തിൽ ടെഹ്റാനിലെ എംബസിക്ക് പുറത്ത് നടന്ന പ്രതിഷേധത്തെ തുടർന്ന് 2016 ജനുവരിയിലാണ് സൗദി അറേബ്യ ഇറാനുമായുള്ള നയതന്ത്രബന്ധങ്ങൾ പൂർണമായും വിച്ഛേദിക്കുന്നത് തന്നെ. അമേരിക്കൻ പ്രസിഡന്റ് ഡൊണാൾഡ് ട്രംപുമായി അടുത്ത ബന്ധം പുലർത്തിയിരുന്ന സൗദി അറേബ്യ ഇറാന് ഉപരോധമേർപ്പെടുത്തുന്നതുൾപ്പെടെയുള്ള വിഷയത്തിൽ പൂർണ പിന്തുണ അദ്ദേഹത്തിന് നൽക്യ്കയും ചെയ്തിരുന്നു. അതേസമയം അൽ അറേബ്യ ടിവിക്ക് നൽകിയ അഭിമുഖത്തിൽ സൗദി വിദേശകാര്യമന്ത്രിയായ ഫൈസൽ ബിൻ ഫർഹാൻ അൽ സൗദ് റിയാദുമായുള്ള ചർച്ചകൾ ടെഹ്റാൻ ​ഗൗരവകരമായി എടുക്കുന്നില്ലെന്ന് ആരോപിച്ചിരുന്നു.

'ഇറാനുമായി സമാധാനം സ്ഥാപിക്കുന്നതിന് ഞങ്ങൾ മുന്നോട്ട് വന്നിട്ടുണ്ട്. പക്ഷേ കരാറുകളിൽ ഏർപ്പെടാൻ ഇറാൻ തയ്യാറല്ല' -എന്നായിരുന്നു സൗദി വിദേശകാര്യമന്ത്രിയുടെ പ്രതികരണം. മിഡിൽ ഈസ്റ്റിൽ സമാധാനം പുനഃസ്ഥാപിക്കുന്നതിനും ഐക്യം നിലനിർത്തുന്നതിനും പേർഷ്യൻ ​ഗൾഫ് അറബ് രാഷ്ട്രങ്ങൾ ഇറാനുമായി ചർച്ച നടത്തണമെന്ന് ഇറാൻ വിദേശകാര്യമന്ത്രി ആവശ്യപ്പെട്ടതിന് പിന്നാലെയാണ് സൗദി വിദേശകാര്യമന്ത്രി ഇത്തരത്തിൽ പ്രതികരിച്ചുകൊണ്ട് രംഗത്ത് എത്തിയത്. അമേരിക്കയിൽ ജോ ബൈഡൻ സർക്കാർ ഇറാനുമായുള്ള ബന്ധം പുനഃസ്ഥാപിക്കുമെന്ന റിപ്പോർട്ടുകൾ പുറത്തുവരുന്നതിനിടിയിലാണ് സൗദി അറേബ്യയും ഇറാനോടുള്ള നയത്തിൽ അയയുന്നു എന്ന റിപ്പോർട്ടുകളും പുറത്തുവരുന്നത്.