ഇനി ഗൾഫ് മേഖലയിലേക്ക് പല ജോലികളിലും പ്രവേശിക്കാൻ പരീക്ഷ നിർബന്ധമാക്കി. കുവൈറ്റിൽ എൻജിനീറിംഗ് മേഖലയിൽ ജോലിക്ക് പ്രവേശിക്കാൻ അതാത് രാജ്യത്ത് വച്ച് തന്നെ പരീക്ഷ നിർബന്ധമാക്കിയിരുന്നു. ഇപ്പോഴിതാ ബഹ്‌റൈനും സമാനമായ നിലപാട് സ്വീകരിച്ചിരിക്കുകയാണ്. മെഡിക്കല്‍ മേഖലയിലെ 38 തൊഴിലുകളില്‍ പരീക്ഷ പാസാകാതെ ബഹ്റൈനിലേക്ക് പോകാന്‍ സാധിക്കില്ല എന്നാണ് ലഭ്യമാകുന്ന വിവരം.

നാഷനല്‍ ഹെല്‍ത്ത് റെഗുലേറ്ററി അതോറിറ്റിയാണ് ഈ പുതിയ നിര്‍ദ്ദേശം പുറത്തിറക്കിയിരിക്കുന്നത്. ഇതുമായി ബന്ധപ്പെട്ട നിയമത്തില്‍ കഴിഞ്ഞ ദിവസം ആരോഗ്യ കാര്യ സുപ്രീം കൗണ്‍സില്‍ ചെയര്‍മാന്‍ ശൈഖ് മുഹമ്മദ് ബിന്‍ അബ്ദുല്ല ആല്‍ ഖലീഫ ഒപ്പുവയ്ക്കുകയുണ്ടായി. ഈ മേഖലയില്‍ ജോലിക്ക് എത്തുന്നവര്‍ പ്രത്യേക ടെസ്റ്റ് പാസായിരിക്കണം എന്നാണ് നിബന്ധന നൽകിയിട്ടുള്ളത്.

ലാബ് ടെക്നീഷ്യന്‍, ന്യൂക്ലിയര്‍ മെഡിസിന്‍ ടെക്നോളജിസ്റ്റ്, റെസ്പിറേറ്ററി എക്യുപ്മെൻറ് സ്പെഷലിസ്റ്റ്, ഒക്യൂപേഷണല്‍ തെറപ്പി ടെക്നീഷ്യന്‍, ഒപ്റ്റോമെട്രിസ്റ്റ്, ഇ.സി.ജി ടെക്നീഷ്യന്‍, ഓഡിയോളജിസ്റ്റ്, ഫിസിയോ തെറപ്പി ടെക്നീഷ്യന്‍, പ്രോസ്തെക്റ്റിസ് ആൻഡ് ഓര്‍ത്തോട്ടിക്സ് ടെക്നീഷ്യന്‍,ന്യൂട്രീഷന്‍ ടെക്നീഷ്യന്‍, സൈക്കോളജിസ്റ്റ്, ക്ലിനിക്കല്‍ സൈക്കോളജിസ്റ്റ്, സ്റ്റെറിലൈസേഷന്‍ ടെക്നീഷ്യന്‍, സ്റ്റെറിലൈസേഷന്‍ ടെക്നിക്കല്‍ അസിസ്റ്റൻറ്, അഡ്വാന്‍സ്ഡ് പാരാമെഡിക്കല്‍ സ്റ്റാഫ്, ഡയാലിസിസ് ടെക്നീഷ്യന്‍, പാരാമെഡിക്കല്‍ നഴ്സ് എന്നിവര്‍ക്കാണ് ഇത്തരത്തിൽ പുതിയ നിയമം ബാധമാകുന്നത്.