വടക്കന്‍ കലിഫോര്‍ണിയയിലെ റെഡ്ഡിംഗ് നഗരത്തില്‍ പടര്‍ന്ന കാട്ടുതീ ശമിക്കുന്നില്ല. ഇതേത്തുടര്‍ന്ന് അമേരിക്കന്‍ പ്രസിഡന്റ് ഡോണള്‍ഡ് ട്രംപ് കലിഫോര്‍ണിയയില്‍ അടിയന്തരാവസ്ഥ പ്രഖ്യാപിച്ചു. ആഭ്യന്തര സുരക്ഷാ മന്ത്രാലയമാണ് ഇത് സംബന്ധിച്ച വിവരങ്ങള്‍ പുറത്ത് വിട്ടത്. തീ ശമിക്കാത്തതിനേത്തുടര്‍ന്ന് മേഖലയിലെ 40,000 പേരെ ഒഴുപ്പിച്ചു.
തിങ്കളാഴ്ച ആരംഭിച്ച കാട്ടുതീ 80,906 ഏക്കര്‍ മേഖലയെയാണ് ബാധിച്ചത്. നാലായിരത്തോളം അഗ്‌നിശമന സേനാംഗങ്ങള്‍ വിമാനങ്ങളും ഹെലികോപ്റ്ററുകളും ഉപയോഗിച്ച് തീ അണയ്ക്കാന്‍ ശ്രമിക്കുകയാണ്. എന്നാല്‍, പത്തില്‍ താഴെ ശതമാനം മേഖലയിലെ തീയണയ്ക്കാന്‍ മാത്രമേ ഇതുവരെ കഴിഞ്ഞിട്ടുള്ളൂവെന്നാണ് വിവരം. അഞ്ഞൂറോളം കെട്ടിടങ്ങളും ആയിരത്തോളം ഭവനങ്ങളും തീയില്‍ നശിച്ചു.