60-ലക്ഷം രൂപ വിലവരുന്ന വജ്രം മോഷ്ടിച്ച ശേഷം ദൂബായ് വിട്ട ദമ്പതികള് ഇന്ത്യയില് പിടിയിലായി
300,000 ദിര്ഹം (ഏതാണ്ട് 59,65,840 രൂപ) വില വരുന്ന വജ്രം ദുബായിലെ ജ്വല്ലറിയില് നിന്നും മോഷ്ടിച്ച് രാജ്യം വിട്ട ദമ്പതികളെ 20 മണിക്കൂറിനപ്പുറം ഇന്ത്യയില് വച്ച് പിടികൂടി. 3.27 കാരറ്റ് വജ്രം ഏഷ്യന് ദമ്പതികളിലെ യുവതി വിഴുങ്ങുകയായിരുന്നു. മുംബൈ വിമാനത്താവളത്തില് നിന്നാണ് നാല്പ്പത് വയസ്സ് പ്രായം തോന്നുന്ന ഇവരെ പിടികൂടിയത്.
മുംബൈ വഴി ഹോങ്ങ്കോങ്ങിലേക്ക് കടക്കാനായിരുന്നു പദ്ധതി. ഇന്റര്പോളിന്റെയും ഇന്ത്യന് പൊലീസിന്റെയും സഹായത്തോടെയാണ് ദുബായ് പൊലീസ് പ്രതികളെ പിടികൂടിയത്. ഇവരെ തിരികെ യു എ ഇ-യില് എത്തിക്കാനും ഉടന് നിര്ദേശം നല്കി.
ദെയ്റയിലെ ഗോള്ഡ് സൂക്കിലുള്ള ജ്വല്ലറിയില് നടന്ന സംഭവത്തിന്റെ സിസിടിവി വിഡിയോ ദുബായ് പൊലീസ് പുറത്തുവിട്ടു. ചില പ്രത്യേക രീതിയിലുള്ള കല്ലുകളെ കുറിച്ച് പുരുഷന് ജ്വല്ലറിയിലെ സെയില്സ്മാനുമായി സംസാരിക്കുകയായിരുന്നു.
ഇതിനിടെ യുവതി പുറത്തേക്കുള്ള വാതിലിന് സമീപം നില്ക്കുകയും ഡിസ്പ്ലേയ്ക്ക് വച്ചിരുന്ന വജ്രം മോഷ്ടിക്കുകയുമായിരുന്നു. തുടര്ന്ന് ജാക്കറ്റിനുള്ളില് വജ്രം ഒളിപ്പിക്കുകയും പുരുഷനൊപ്പം പുറത്തേക്ക് പോവുകയും ചെയ്യുന്നതാണ് വിഡിയോയില് ഉള്ളത്. തുടര്ന്ന് ദമ്പതികള് ദുബായ് മാളിലേക്ക് പോയി. ഇവിടെയുള്ള സിസിടിവി ദൃശ്യങ്ങള് പരിശോധിച്ചപ്പോള് രണ്ടുപേരും മാളിലെ വിശ്രമമുറിയില് പ്രവേശിക്കുകയും പുതിയ വസ്ത്രങ്ങള് ധരിച്ച് പുറത്തേക്ക് വരികയുമായിരുന്നു. ദുബായ് വിമാനത്താവളത്തിലേക്ക് പോയ ഇവര് ഇന്ത്യയിലേക്ക് കടക്കുകയും ചെയ്തു.
മൂന്നു മണിക്കൂറിന് ശേഷമാണ് കടയുടമയ്ക്ക് മോഷണം നടന്നുവെന്ന കാര്യം തിരിച്ചറിയാന് സാധിച്ചതെന്ന് ദുബായ് പൊലീസ് പറഞ്ഞു. ഉടന് തന്നെ സിസിടിവി ക്യാമറകള് പരിശോധിക്കുകയും പൊലീസില് വിവരം അറിയിക്കുകയുമായിരുന്നു. മോഷണം നടന്ന് മൂന്നു മണിക്കൂര് കഴിഞ്ഞതിനാല് പ്രതികള് രക്ഷപ്പെട്ടിരുന്നുവെന്ന് സിഐഡി ഡയറക്ടര് കേണല് അദേല് അല് ജോക്കര് പറഞ്ഞു. പ്രതികളെ തിരിച്ചറിഞ്ഞതിനാല് ഇവരുടെ വിമാന യാത്രയുടെ വിവരങ്ങള് പരിശോധിക്കുകയും ഇന്റര്പോള് വഴി ഇന്ത്യന് അധികൃതരെ ഇക്കാര്യം അറിയിക്കുകയുമായിരുന്നു.
മുംബൈ വിമാനത്താവളത്തില് എത്തിയ പ്രതികളെ പൊലീസ് കയ്യോടെ പിടികൂടി. അടുത്ത ദുബായ് വിമാനത്തില് ഇവരെ തിരികെ എത്തിക്കാനും നിര്ദേശം നല്കി. മോഷണം നടത്തിയെന്ന കാര്യം പ്രതികള് സമ്മതിച്ചു. എക്സറെ പരിശോധനയില് യുവതിയുടെ വയറിനുള്ളില് വജ്രമുണ്ടെന്ന് തെളിയുകയും ചെയ്തു. രാജ്യന്തര ബന്ധങ്ങള് ഉപയോഗിച്ച് പ്രതികളെ പിടികൂടിയ സംഘത്തെ ദുബായ് പൊലീസ് കമാന്ഡര് ഇന് ചീഫ് മേജര് ജനറല് അബ്ദുല്ല ഖലീഫ അല് മറി അഭിനന്ദിച്ചു. പ്രതികള്ക്കെതിരായ നിയമനടപടികള് ആരംഭിച്ചു.
https://www.facebook.com/Malayalivartha
