അംബാനി പുത്രന്റെ പ്രീവെഡ്ഡിങ് ആഘോഷങ്ങൾക്ക് സ്വിറ്റ്സർലൻഡില് ഒരുക്കിയത് അദ്ഭുതങ്ങൾ നിറഞ്ഞ ‘വിന്റർ വണ്ടർലാൻഡ്" എന്ന ചെറുനഗരം...
വീണ്ടും ആഘോഷത്തില് ആറാടിച്ച് ആകാശ് അംബാനി- ശ്ലോക മേത്ത പ്രീവെഡ്ഡിങ് ആഘോഷങ്ങൾക്കു സ്വിറ്റ്സർലൻഡില് തുടക്കമായി. ബോളിവുഡ് താരങ്ങൾ ഉൾപ്പടെയുള്ള അതിഥികളാണു പാർട്ടിയിൽ പങ്കെടുക്കുന്നത്. സ്വിറ്റ്സർലൻഡിലെ സെന്റ് മോറിറ്റ്സില് മൂന്നു ദിവസമാണ് ആഘോഷപരിപാടികൾ. പ്രീവെഡ്ഡിങ് ആഘോഷങ്ങൾക്ക് വേണ്ടി മഞ്ഞു പൊഴിയുന്ന സെന്റ് മോറിറ്റ്സിലെ അദ്ഭുതങ്ങൾ നിറഞ്ഞ ‘വിന്റർ വണ്ടർലാൻഡ്" എന്ന ചെറുനഗരം തന്നെ മുകേഷ് അംബാനി ഒരുക്കിയിരിക്കുകയാണ്. ലണ്ടനിൽ നിന്നുള്ള ഇവന്റ് മാനേജ്മെന്റ് കമ്പനിക്കാണു പ്രീവെഡ്ഡിങ്ങ് ആഘോഷങ്ങളുടെ ചുമതല. ആഡംബര റിസോർട്ടുകൾക്കു പ്രശസ്തമാണ് സെന്റ് മേറിറ്റ്സ്. സൂറിക്ക് എയർപോർട്ടിൽ നിന്നു സെന്റ് മോറിറ്റ്സിലെത്താൻ 200 കിലോമീറ്റർ യാത്ര ചെയ്യണം.
പലവർണങ്ങളിലുള്ള പ്രകാശ സംവിധാനങ്ങളാൽ അലംകൃതമായ വേദി. കൂറ്റൻ യന്ത്ര ഊഞ്ഞാൽ ഉൾപ്പടെ വിനോദത്തിനായി പലവിധ സംവിധാനങ്ങൾ. ചുറ്റിലും പരിചാരകരുടെ വമ്പൻ പടയുമുണ്ട്. ഡ്രോൺ ഷോയും രാത്രി കാഴ്ചകളെ വിസ്മയമാക്കി മാറ്റി. വർണാഭമായ വെടിക്കെട്ടിനും സെന്റ് മോറിറ്റ്സ് സാക്ഷിയായി. രാജകീയത നിറയുന്ന മുച്ചക്ര വാഹനത്തിലാണ് ആകാശും ശ്ലോകയും വേദിയിലെത്തിയത്. ഈ ചിത്രം നിത അംബാനി ഇൻസ്റ്റാഗ്രാമിൽ പങ്കുവച്ചിരുന്നു.
സ്വിറ്റ്സർലന്ഡ് കേന്ദ്രീകരിച്ചു പ്രവർത്തിക്കുന്ന പ്രഫഷനൽ മേക്കപ്പ് സർവീസിന്റെ ഇൻസ്റ്റാഗ്രാമിൽ വിന്റർ വണ്ടർലാൻഡിലെ കാഴ്ചകൾ പങ്കുവച്ചിട്ടുണ്ട്. ‘ഇതെല്ലാം കാണുമ്പോൾ വാൾട്ട് ഡിസ്നി സിനിമകളിലെ അത്ഭുതലോകം പോലെ തോന്നുന്നു’ എന്നാണു ചിത്രത്തിനൊപ്പം കുറിച്ചിരിക്കുന്നത്. ഈ വർഷം ഇതിനേക്കാൾ വലിയൊരു പരിപാടിയിൽ പങ്കെടുക്കാനാവുമെന്നു കരുതുന്നില്ലെന്നും പറയുന്നു.
അമേരിക്കൻ ബാൻഡ് ഗ്രൂപ്പായ മെറൂൺ 5 ന്റെ പ്രകടനം ഒരുക്കിയിട്ടുണ്ടെന്നു റിപ്പോർട്ടുകളുണ്ട്. ആകാശും ശ്ലോകയും ഈ ബാന്ഡിന്റെ ആരാധകരാണ്. അതിനാലാണ് മെറൂണ് 5ന്റെ പ്രകടനം ഉൾപ്പെടുത്തിയത്. ഇരുവർക്കും ഇഷ്ടപ്പെട്ട ഗാനങ്ങള് ഉൾപ്പടെ 40 മിനിറ്റ് നീളുന്ന പ്രകടനമാണ് മെറൂൺ 5 നടത്തുക. സ്വകാര്യ പരിപാടികൾക്ക് 1.5 മില്യൻ ഡോളർ വരെയാണ് ഈ ബാന്ഡിന്റെ പ്രതിഫലം. ഇന്ത്യൻ രൂപയിൽ 10 കോടിയോളം.
ഐശ്വര്യ റായ്, അഭിഷേക് ബച്ചൻ, റൺബീർ കപൂർ, ആലിയ ബട്ട്, വിദ്യാ ബാലൻ, കരൺ ജോഹർ എന്നിവരുൾപ്പെടുന്ന താരനിരയാണു സെന്റ് മോറിറ്റ്സിൽ എത്തിയിരിക്കുന്നത്. സ്വിറ്റ്സർലൻഡിലേക്കു പുറപ്പെടാൻ മുംബൈ വിമാനത്താവളത്തിൽ താരങ്ങൾ എത്തിയ ചിത്രങ്ങൾ സമൂഹമാധ്യമങ്ങളിൽ വൈറലായിരുന്നു. മാർച്ച് 9,10,11 തീയതികളിലാണ് ആകാശിന്റെ വിവാഹം. മുംബൈയിലെ അംബാനിയുടെ വസതിയായ ആന്റിലയിലാണു ചടങ്ങുകൾ. റോസ ബ്ലൂ ഡയമണ്ട്സ് ഉടമ റസല് മേത്തയുടെ മകളാണു ശ്ലോക മേത്ത. ആകാശിന്റെ ആദ്യ വിവാഹക്ഷണക്കത്ത് മുംബൈയിലെ സിദ്ധിവിനായക ക്ഷേത്രത്തിൽ അംബാനികുടുംബം നേരിട്ടെത്തി സമർപ്പിച്ചിരുന്നു. ഈ വിവാഹക്ഷണക്കത്തും സമൂഹമാധ്യമങ്ങളിൽ തരംഗമായിരുന്നു.
https://www.facebook.com/Malayalivartha