2014- മാർച്ചിൽ 239 യാത്രക്കാരുമായി ക്വാലാലംപൂരില്‍ നിന്നും ബെയ്ജിങ്ങിലേക്കുള്ള യാത്രക്കിടെ കാണാതായ എം.എച്ച് 370 വിമാനത്തിനായുള്ള തെരച്ചില്‍ പുനരാരംഭിക്കാനൊരുങ്ങി മലേഷ്യ. ദുരൂഹ സാഹചര്യത്തില്‍ കാണാതായ വിമാനത്തിൻെറ അഞ്ചാം വാര്‍ഷികത്തിലാണ് മലേഷ്യ ഇക്കാര്യം അറിയിച്ചത്. തെരച്ചില്‍ തുടരണമെന്ന യാത്രക്കാരുടെ കുടുംബങ്ങളുടെ ആവശ്യത്തിന് പിന്നാലെയാണ് പ്രഖ്യാപനം.

ആദ്യം മലേഷ്യ, ചൈന, ഓസ്‌ട്രേലിയ തുടങ്ങിയ രാജ്യങ്ങളുടെ നേതൃത്വത്തിലും പിന്നീട് അമേരിക്കയിലെ ഓഷ്യന്‍ ഇന്‍ഫന്‍ട്രിയുടെ നേതൃത്വത്തിലും വിമാനത്തിനായി ഏറെക്കാലം തെരച്ചില്‍ നടത്തിയിരുന്നു .

അത്യാധുനിക സംവിധാനങ്ങള്‍ ഉപയോഗിച്ച് കടലിനടിയിലടക്കം പരിശോധന നടത്തിയിരുന്നു. എന്നാല്‍ ഫലം ലഭിക്കാതായതോടെ തെരച്ചില്‍ അവസാനിപ്പിക്കുകയായിരുന്നു . ഇതിനിടെയാണ് തെരച്ചിലിനുള്ള സന്നദ്ധത വീണ്ടും മലേഷ്യ അറിയിച്ചത്.

വിശ്വസനീയമായ തെളിവുകളുമായിവരുകയാണെങ്കിൽ തെരച്ചില്‍ പുനരാരംഭിക്കാമെന്നും വിമാനം കണ്ടെത്തിയാല്‍ മാത്രമേ പ്രതിഫലം ലഭിക്കുകയുള്ളൂവെന്നും അധികൃതര്‍ അറിയിച്ചു. നീക്കത്തോട് നേരത്തെ തെരച്ചില്‍ നടത്തിയ ഓഷ്യന്‍ ഇന്‍ഫന്‍ട്രി അനുകൂല നിലപാടാണ് സ്വീകരിച്ചിട്ടുള്ളത്. തെരച്ചിലിനായി പുതിയ ഉപകരണങ്ങള്‍ കൈവശമുണ്ടെന്നും കമ്പനി അറിയിച്ചു.