ന്യൂ ഇംഗ്ലണ്ട് ജേര്‍ണല്‍ ഓഫ് മെഡിസിനില്‍ പ്രസിദ്ധീകരിച്ച ഒരു റിപ്പോര്‍ട്ടില്‍ പല്ലുവേദന ചികിത്സിക്കാന്‍ മരവിപ്പിക്കുന്ന ക്രീം ഉപയോഗിച്ചതിന് ശേഷം ഒരു യുവതിയിലുണ്ടായ ഞെട്ടിക്കുന്ന ശാരീരികമാറ്റങ്ങളെ കുറിച്ച് പ്രതിപാദിക്കുന്നു.

ശ്വാസംമുട്ടലിനൊപ്പം ചര്‍മ്മത്തിന്റെ നിറം ഓരോ ദിവസം കഴിയുന്തോറും മാറാന്‍ തുടങ്ങിയതോടെയാണ് 25-കാരി ഡോക്ടറെ സമീപിച്ചത്. യുവതിയുടെ രക്തം പരിശോധിക്കാനെടുത്ത ഡോക്ടര്‍മാര്‍ അമ്പരന്നു പോയി. യുവതിയുടെ ശരീരത്ത് കണ്ടത് നീല രക്തമായിരുന്നു. തുടര്‍ന്നുള്ള ചികിത്സയില്‍ കണ്ടത് ഞെട്ടിക്കുന്ന വിവരങ്ങളായിരുന്നു.

ക്രീം പല്ലില്‍ പുരട്ടിയ ശേഷം ചര്‍മ്മം നീല നിറം ആകുന്നത് പോലെ തോന്നിയെന്ന് യുവതി പ്രൊവിഡന്‍സിലെ മിറിയം ഹോസ്പിറ്റലിലെ ഡോക്ടറിനോട് പറഞ്ഞു. ചര്‍മ്മത്തിനും നഖത്തിനും കടും നീല നിറമുണ്ടാവുന്നതായി കാണാന്‍ സാധിച്ചുവെന്നും യുവതി പറഞ്ഞു. എന്നാല്‍ അസുഖകാരണം വ്യക്തമാകണമെങ്കില്‍ രക്തപരിശോധന നടത്തണമെന്ന് ഡോക്ടര്‍ യുവതിയോട് പറഞ്ഞു. പ്രാഥമിക പരിശോധനയില്‍ യുവതിയുടെ രക്തത്തിലെ ഓക്‌സിജന്റെ അളവ് 88 ശതമാനമാണെന്നും മെത്തമോഗ്ലോബിനെമിയ എന്ന രോഗമാണ് പിടിപെട്ടതെന്നും ഡോക്ടര്‍ യുവതിയോട് പറഞ്ഞു.

രക്തത്തിലെയും ടിഷ്യു ഹൈപ്പോക്‌സിയയിലെയും (ശരീരത്തിലെ ടിഷ്യൂകളിലെ കുറഞ്ഞ ഓക്‌സിജന്റെ അളവ്) ഓക്‌സിഡൈസ്ഡ് ഹീമോഗ്ലോബിന്റെ (മെത്തമോഗ്ലോബിന്‍) ഉള്ളടക്കത്തിലെ വര്‍ദ്ധനവാണ് മെത്തമോഗ്ലോബിനെമിയ എന്ന സവിശേഷത. ഇതാണ് രക്തത്തിലെ നീല നിറത്തിന് കാരണമാക്കിയത്. യുവതിയുടെ ആരോഗ്യനില മെച്ചപ്പെട്ടു വരികയാണ്.