സൗദിയിൽ ചെറുകിട സ്ഥാപനങ്ങൾക്ക് ലെവി ഇളവ്; അടുത്ത വർഷം ജനുവരി ഒന്നുമുതൽ പ്രാബല്യത്തിൽ; തൊഴില്‍-സാമൂഹിക വികസന മന്ത്രാലയം അറിയിച്ചു
അഞ്ചില്‍ താഴെ ജീവനക്കാരുള്ള ചെറുകിട സ്ഥാപനങ്ങള്‍ക്ക് ലെവി ഇളവ് അനുവദിക്കാന്‍ തീരുമാനമായി. സൗദി തൊഴില്‍-സാമൂഹിക വികസന മന്ത്രാലയം ആണ് അറിയിപ്പ് പുറപ്പെടുവിച്ചത്. അടുത്ത വര്‍ഷം ജനുവരി ഒന്നുമുതല്‍ ഇളവ് പ്രാബല്യത്തില്‍ വരും എന്നാണ് റിപ്പോർട്ട്. ഒന്‍പതോ അതില്‍ കുറവോ ജീവനക്കാരുള്ള സ്ഥാപനങ്ങളിലെ നാല് ജീവനക്കാര്‍ക്കും ലെവി ഇളവ് അനുവദിക്കുമെന്നും വെളിപ്പെടുത്തൽ . ഉടമയായ സ്വദേശി പൗരന്‍ മുഴുവന്‍ സമയ അടിസ്ഥാനത്തില്‍ സ്ഥാപനത്തിന്റെ നടത്തിപ്പ് ചുമതല നിര്‍വഹിച്ചിരിക്കണമെന്നതാണ് ഇളവ് ലഭിക്കുന്നതിനുള്ള നിബന്ധന.
ഗാര്‍ഹിക തൊഴിലാളികളെ താല്‍കാലികാടിസ്ഥാനത്തില്‍ കൈമാറുന്ന റിക്രൂട്ടിങ് സ്ഥാപനങ്ങളിലെ ജീവനക്കാരെയും ലെവിയില്‍ ഉൾപ്പെടുത്തില്ല . ഇതോടൊപ്പം ഗള്‍ഫ് പൗരന്മാര്‍, സൗദി സ്ത്രീകളുടെ ഭര്‍ത്താക്കന്മാരായ വിദേശികള്‍, സൗദി പൗരന്മാരുടെ ഭാര്യമാരായ വിദേശികള്‍, വിദേശികളെ വിവാഹം കഴിച്ച സൗദി സ്ത്രീകളുടെ സൗദി പൗരത്വം ലഭിക്കാത്ത മക്കള്‍ എന്നിവര്‍ക്കും ലെവി ഇളവ് ലഭിക്കുമെന്ന് തൊഴില്‍-സാമൂഹിക വികസന മന്ത്രലയം അറിയിക്കുന്നു.
വ്യവസായ സ്ഥാപനങ്ങള്‍ക്ക് അഞ്ച് വര്‍ഷത്തേക്ക് ലെവി ഇളവ് നേരത്തെ തന്നെ അനുവദിച്ചിരുന്നു . വ്യവസായ മേഖലയിലെ നിക്ഷേപങ്ങള്‍ പ്രോത്സാഹിപ്പിക്കുന്നതിനായാണ് ഇളവ് അനുവദിച്ചത്. കഴിഞ്ഞ ഒക്ടോബര്‍ ഒന്നിന് ഈ തീരുമാനം നിലവില്‍ വന്നിരുന്നു . വ്യവസായ മന്ത്രാലയത്തിന്റെ ലൈസന്‍സോടെ പ്രവര്‍ത്തിക്കുന്ന സ്ഥാപനങ്ങള്‍ക്ക് ഈ ഇളവ് ലഭിക്കാനും നിശ്ചിത സ്വദേശിവത്കരണ മാനദണ്ഡങ്ങള്‍ പാലിക്കേണ്ടതുണ്ട്.
https://www.facebook.com/Malayalivartha
