കോവിഡ് ബാധ ലോകത്താകമാനം അനിയന്ത്രിതമായി തുടരുമ്പോൾ കേരളത്തിന് പുറത്ത് മരിക്കുന്ന മലയാളികളുടെ എണ്ണത്തിലും വർദ്ധനവുണ്ടാകുന്നത് ആശങ്ക വർദ്ധിപ്പിക്കുകയാണ് . കഴിഞ്ഞ രണ്ട് ദിവസത്തിനിടെ പത്തിലധികം മലയാളികളാണ് കോവിഡ് ബാധയുടെ പശ്ചാത്തലത്തിൽ ലോകത്തിന്റെ വിവിധ ഭാഗങ്ങളിൽ മരിച്ചത്.ന്യൂയോർക്കിൽ കോവിഡ് ബാധിച്ച് നാലു മലയാളികൾ കൂടി മരിച്ചു. കൊട്ടരക്കര കരിക്കം സ്വദേശി ഉമ്മൻ കുര്യൻ (70), ജോസഫ് തോമസ്, ഏലിയാമ്മ ജോൺ, ശിൽപാ നായർ എന്നിവരാണ് മരിച്ചത്. ഇതോടെ അമേരിക്കയിൽ മരിച്ച മലയാളികളുടെ എണ്ണം എട്ടായി.ഗൾഫ് രാജ്യങ്ങളിൽ സൗദിയിൽ രണ്ട് മലയാളികൾ മരിച്ച വാർത്തകൾക്ക് പിന്നാലെയാണ് അയർലന്‍ഡില്‍ നിന്നും ന്യൂയോർക്കിൽ നിന്നും മരണ വാർത്തകൾ പുറത്ത് വരുന്നത്.

ന്യൂയോര്‍ക്കില്‍ മരണസംഖ്യ ഉയരുകയാണ്. കഴിഞ്ഞ 24 മണിക്കൂറിനിടയില്‍ 630 പേരാണ് മരണത്തിന് കീഴടങ്ങിയത്. അടുത്ത ഏഴു ദിവസത്തിനകം കൊറോണ വൈറസ് വ്യാപനം ശക്തമാകുമെന്ന സൂചനയാണ് ന്യൂയോര്‍ക്ക് ഗവര്‍ണര്‍ നല്‍കുന്നത്. രണ്ടര മിനിറ്റില്‍ ഒരാള്‍ എന്ന നിരക്കിലാണ് ന്യൂയോര്‍ക്കില്‍ മരണം നടക്കുന്നത്.ന്യൂയോര്‍ക്കിലും ലൂസിയാനയിലുമാണ് രോഗം അതിവേഗം പടരുന്നത്. ആശുപത്രികളില്‍ ആവശ്യത്തിന് സുരക്ഷാമാര്‍ഗങ്ങളില്ലാത്തതിനാല്‍ മലയാളികള്‍ ഉള്‍പ്പെടെയുള്ള ആരോഗ്യപ്രവര്‍ത്തകര്‍ കടുത്ത ആശങ്കയിലാണ്.അമേരിക്കയില്‍ കോവിഡ് രോഗബാധിതരുടെ എണ്ണം രണ്ടരലക്ഷത്തിലേക്കെത്തുമ്പോള്‍ രാജ്യം കടുത്ത ഭീതിയിലാണ്. ഇപ്പോഴത്തെ നിയന്ത്രണ നടപടികള്‍ ഫലപ്രദമായാല്‍പോലും മരണസംഖ്യ ഒരു ലക്ഷത്തിനും രണ്ടുലക്ഷത്തിനുമിടയിലാകും എന്നാണ് റിപ്പോർട്ടുകൾ..പ്രതിരോധ നടപടികള്‍ പാളിയാല്‍ മരണ സംഖ്യ 15 ലക്ഷം മുതല്‍ 22 ലക്ഷം വരെ ഉയര്‍ന്നേക്കുമെന്നാണ് വൈറ്റ് ഹൗസ് കോവിഡ് പ്രതിരോധ സംഘത്തിലെ വിദഗ്ദ ഡോ. ഡെബറ ബേര്‍ക്‌സ് നല്‍കിയിരിക്കുന്ന മുന്നറിയിപ്പ്. അതേസമയം, കൊറോണയെ നേരിടുന്നതില്‍ ട്രംപ് ഭരണകൂടം പൂര്‍ണപരായജമെന്ന വിലയിരുത്തലിലാണ് ജനങ്ങള്‍. ലോക പോലീസും സാമ്രാജ്യത്വ ശക്തിയുമായ അമേരിക്കക്ക് മികച്ച ആരോഗ്യ സംവിധാനങ്ങളുണ്ടായിട്ടും കൊലയാളി വൈറസിന് ജനങ്ങളെ എറിഞ്ഞ് കൊടുക്കേണ്ടി വന്നത് ട്രംപിന്റെ പിടിപ്പുകേടാണെന്ന വിലയിരുത്തലുകളാണ് രാജ്യവ്യാപകമായി ഉയരുന്നത്.അതെ സമയം കൊറോണ വൈറസ് മഹാമാരിയുടെ 'ഏറ്റവും കഠിനമായ ആഴ്ച' വരാനിരിക്കുന്നതേയുള്ളുവെന്നാണ് പ്രസിഡന്റ് ഡൊണാള്‍ഡ് ട്രംപ് അമേരിക്കക്കാര്‍ക്ക് നൽകുന്ന മുന്നറിയിപ്പ്

കേരളവും ഇന്ത്യയും കോവിഡിനെ ചെറുത്ത് തോൽപ്പിക്കാൻ സാധ്യമായതെല്ലാം ചെയ്യുമ്പോഴും നമ്മു ടെ രാജ്യത്തിന് പുറത്ത് പ്രവാസികളായ നിരവധിപേർ നിസ്സഹായരായി നിൽക്കുകയാണ് എന്ന വാർത്ത അത്ര ആശ്വാസകരമല്ല . നിരവധി സ്വപ്നങ്ങളും പേറി പ്രവാസലോകത്തേക്കു പോയവരാണവർ. കോവിഡ് എന്ന മഹാമാരി അതിന്റെ സർവ ശക്തിയും സംഭരിച്ചു മരണം വിതക്കാനിറങ്ങുമ്പോൾ , ഹൃദയം തകർന്നു നിസ്സഹായതയോടെ നിൽക്കുകയാണ് പ്രവാസലോകം