അതിതീവ്ര കൊവിഡ് വൈറസ് പടര്‍ന്നതിനെ തുടര്‍ന്ന് നിര്‍ത്തലാക്കിയ ഇന്ത്യ-യു കെ വ്യോമഗതാഗതം പുനരാരംഭിക്കുന്നതിന്റെ ഭാഗമായി എയര്‍ ഇന്ത്യ ബുക്കിംഗ് ആരംഭിച്ചതായി റിപ്പോർട്ട്. വിമാന കമ്പനി ട്വിറ്റര്‍ വഴി ഇക്കാര്യം അറിയിക്കുകയുണ്ടായി. എയര്‍ ഇന്ത്യ വെബ്‌സൈറ്റ്, ബുക്കിംഗ് ഓഫീസുകള്‍, കോള്‍ സെന്റര്‍, അംഗീകൃത യാത്രാ ഏജന്‍സികള്‍ എന്നിവ മുഖേന ടിക്കറ്റുകള്‍ ബുക്ക് ചെയ്യാൻ സാധിക്കും.

മുംബൈ-ലണ്ടന്‍ ഹെത്രോ, ഡല്‍ഹി-ലണ്ടന്‍ ഹെത്രോ, ലണ്ടന്‍ ഹെത്രോ-മുംബൈ, ലണ്ടന്‍ ഹെത്രോ -ഡല്‍ഹി എന്നീ സര്‍വീസുകളാണ് ആദ്യഘട്ടത്തില്‍ ഉണ്ടാകുക. സാധാരണ വിമാന സര്‍വീസുകള്‍ക്ക് പുറമെയാണിത് പ്രഖ്യാപിച്ചിട്ടുള്ളത്. ഇന്ത്യ-യു കെ വ്യോമഗതാഗതം ജനുവരി ആറുമുതല്‍ ഇന്ത്യയില്‍ നിന്ന് യു കെയിലേക്കും എട്ടുമുതല്‍ തിരിച്ചും സര്‍വീസുകള്‍ ആരംഭിക്കുമെന്ന് കേന്ദ്ര വ്യോമയാന മന്ത്രി ഹര്‍ദീപ് സിംഗ് പുരി അറിയിക്കുകയുണ്ടായി.

അതേസമയം താൽക്കാലികമായി നിർത്തലാക്കിയ ലണ്ടൻ-കൊച്ചി ഡയറക്ട് വിമാന സർവീസ് ഉടൻ പുന:രാരംഭിക്കില്ല എന്ന വാർത്ത പ്രവാസികൾക്ക് നിരാശയാകുകയാണ്. ജനുവരി എട്ടിന് പുന:രാരംഭിക്കുന്ന ബ്രിട്ടനിലേക്കുള്ള 15 പ്രതിവാര സർവീസുകളിൽ നിന്നും കൊച്ചിയെ ഒഴിവാക്കിയതായി കേന്ദ്ര വ്യാമയാന മന്ത്രി ഹർദീപ് സിംങ് പുരിയുടെ ട്വിറ്റർ സന്ദേശത്തിലൂടെ വ്യക്തമാക്കുകയുണ്ടായി. നിലവിലെ തീരുമാനപ്രകാരം ജനുവരി എട്ടു മുതൽ 23 വരെയാണ് ആഴ്ചയിൽ 15 സർവീസുകൾക്ക് വ്യോമയാന മന്ത്രാലയം അനുമതി നൽകിയിരിക്കുന്നത്. ഇതിൽ ഉൾപ്പെടാത്ത സാഹചര്യത്തിൽ ജനുവരി 23നു ശേഷമേ കൊച്ചിയിൽ നിന്നു നേരിട്ടുള്ള സർവീസ് പുന:രാരംഭിക്കാൻ എന്തെങ്കിലും സാധ്യതയുള്ളൂ.