അമേരിക്കയുടെ സൈന്യം പിന്മാറും മുന്നേ തന്നെ താലിബാൻ അഫ്ഗാൻ പിടിച്ചെടുത്തതോടെ കടുത്ത പ്രതിസന്ധിയാണ് രൂപപ്പെട്ടത്. പിന്നാലെ സുരക്ഷാസ്ഥാനത്തേക്ക് ജീവൻ കയ്യിലേന്തി രക്ഷപ്പെടുന്നവരുടെ കാഴ്ചയാണ് ലോകം കണ്ടത്. ഉള്ളുലയ്ക്കുന്ന വാർത്തകൾക്ക് പിന്നാലെ ഏവരെയും അമ്പരപ്പിലാഴ്ത്തുന്ന ഒരു വാർത്തയാണ് പുറത്ത് വരുന്നത്. അഫ്ഗാനിസ്ഥാനിൽ നിന്നു കഴിഞ്ഞ ശനിയാഴ്ച അഭയാർഥികളുമായി ഉയർന്നു പൊങ്ങിയ യുഎസ് എയർഫോഴ്സിന്റെ ഗ്ലോബ്മാസ്റ്റർ സി 17 വിമാനത്തിൽ ഒരു യാത്രക്കാരി പൂർണ ഗർഭിണിയായിരുന്നു. ജർമനിയിലേക്കുള്ള അഭയാർഥിസംഘമായിരുന്നു ഇതിൽ ഉണ്ടായിരുന്നത്. യാത്രയ്ക്കിടെ തന്നെ ഗർഭിണിക്ക് പ്രസവ ലക്ഷണങ്ങൾ കണ്ടുതുടങ്ങി. രക്തസമ്മർദം ഉയർന്നു. അവർ തീർത്തും അവശയായിരുന്നു.

എന്നാൽ കാത്ത് നിൽക്കാതെ തന്നെ യുഎസ് അധികൃതർ ഉണർന്നു പ്രവർത്തിച്ചു. വിമാനത്തിലുണ്ടായിരുന്ന സൈനിക ഡോക്ടർമാരും നഴ്സുമാരും മറ്റ് ആരോഗ്യപ്രവർത്തകരും ഗർഭിണിയെ സഹായിക്കാനായി ഓടിയെത്തുകയായിരുന്നു. ഗ്ലോബ്മാസ്റ്ററിന്റെ പൈലറ്റ് ഗർഭിണിയുടെ രക്തസമ്മർദം കുറയ്ക്കാനായി വിമാനം താഴ്ത്തി പറത്തി. യാത്രക്കാരായുണ്ടായിരുന്ന അഫ്ഗാൻ വനിതകൾ തങ്ങളുടെ സ്കാർഫുകൾ കൂട്ടിക്കെട്ടി ഗർഭിണിക്കൊരു പ്രസവമുറി ഒരുക്കുകയും ചെയ്തു... ആശങ്കാഭരിതമായ നിമിഷങ്ങൾക്കൊടുവിൽ ഒടുവിൽ വിമാനത്തിനുള്ളിൽ തന്നെ ആ ഗർഭിണി ഒരു പെൺകുഞ്ഞിനെ പ്രസവിച്ചു.

അങ്ങനെ അഫ്ഗാനിൽ താലിബാൻ ആധിപത്യത്തെത്തുടർന്നുണ്ടായ സമാനതകളില്ലാത്ത കൂട്ടപ്പലായനത്തിന്റെയും പ്രതിസന്ധിയുടെയും ആശങ്കകളുടെയും കുത്തൊഴുക്കിൽ പ്രതീക്ഷയുടെ ഒരു നുറുങ്ങുവെളിച്ചമായും പ്രതീക്ഷയാണ് മാറി പെൺകുട്ടിയുടെ ജനനം . ലോകമെങ്ങും ആ അമ്മയുടെയും ശിശുവിന്റെയും ചിത്രങ്ങൾ ശ്രദ്ധനേടുകയും ചെയ്തു. ഇപ്പോൾ ആ പെൺകുട്ടിക്ക് പേരു നൽകിയിരിക്കുകയാണ് മാതാപിതാക്കൾ. ആശങ്കയുടെ തീക്കടലിൽ നിന്നു തങ്ങളെ രക്ഷിച്ച യുഎസ് എയർഫോഴ്സ് വിമാനത്തിന്റെ കോൾ സൈൻ റീച്ച് 828 എന്നാണെന്ന് അവർ ശ്രദ്ധിച്ചിരുന്നു. ആ പേര് തന്നെ തങ്ങളുടെ മകൾക്ക് അവർ നൽകി... പേര് റീച്ച്.

അതേസമയം സംഭവത്തിൽ അത്യാഹ്ലാദം രേഖപ്പെടുത്തിയ യുഎസ് വ്യോമസേനാ ജനറൽ ടോഡ് വോൾട്ടേഴ്സ് റീച്ചിനെ അഭിനന്ദിക്കുകയുണ്ടായി. റീച്ച് വളർന്നു വലുതായി, യുഎസ് പൗരത്വം നേടി, വ്യോമസേനയിൽ അംഗമായി തനിക്കു ജന്മമേകിയ വിമാനം തന്നെ പറത്താൻ ഇടവരട്ടെയെന്നു താൻ ആശിക്കുന്നതായി ടോഡ് വോൾട്ടേഴ്സ് പറയുകയുണ്ടായി.