കാമുകിമാരെ തന്റെ നിയന്ത്രണ വലയത്തിലാക്കാന്‍ ശ്രമിക്കുന്ന കാമുകന്‍മാര്‍ നമ്മുടെ നാട്ടില്‍ മാത്രമല്ല, അങ്ങ് ദൂരെ അമേരിക്കയിലുമുണ്ട്. അത്തരത്തിലൊരു കാര്യമാണ് സാമൂഹ്യ മാധ്യമങ്ങളില്‍ ഇപ്പോള്‍ ചര്‍ച്ചാ വിഷയം.

നല്ലൊരു കോളജില്‍ അഡ്‌മിഷന്‍ ലഭിച്ച്‌ പഠിക്കാനായി മറ്റൊരു സ്ഥലത്തേക്ക് പോകുന്ന യുവതിക്ക് കാമുകന്‍ കൊടുത്ത 11 'ഉപദേശങ്ങളാണ്' ശ്രദ്ധയാകര്‍ഷിച്ചത്. യുവതി തന്നെയാണ് ഇതിന്റെ സ്ക്രീന്‍ഷോട്ട് സമൂഹ മാധ്യമങ്ങളില്‍ പങ്കുവച്ചത്.

അമേരിക്കയിലെ കരോളിന്‍ എന്ന യുവതിക്കാണ് കാമുകന്റെ 11 കല്പനകള്‍ ലഭിച്ചത്. അനാവശ്യമായ നിബന്ധനകളും നിയന്ത്രണങ്ങളുമാണ് കാമുകന്‍ യുവതിയുടെ മേല്‍ അടിച്ചേല്‍പ്പിക്കാന്‍ ശ്രമിക്കുന്നതെന്നാണ് വീഡിയോ കണ്ടവരില്‍ പലരും അഭിപ്രായപ്പെടുന്നത്.

കാമുകന്റെ 11 കല്‍പനകള്‍ ഇവയാണ്: 'ഈ ലിസ്റ്റ് വായിച്ച ശേഷം എന്നെ അവഗണിക്കരുത്, നിന്റെ ഫോണിന്റെ ലൊക്കേഷന്‍ അറിയാനുള്ള സംവിധാനം ഓഫ് ചെയ്ത് വെക്കരുത്,

ഞാനോ എന്റെ അമ്മയോ അംഗീകരിക്കാത്ത വസ്ത്രങ്ങള്‍ ധരിക്കരുത്, മറ്റുള്ള ആണ്‍കുട്ടികളുമായി 25 അടിയില്‍ കൂടുതല്‍ അടുത്തേക്ക് ചെല്ലരുത്, മദ്യപാനം തീര്‍ത്തും ഒഴിവാക്കണം, നീളം കുറഞ്ഞതോ ഇറുകിയതോ ആയ വസ്ത്രങ്ങള്‍ ഒന്നും തന്നെ ധരിക്കരുത്,

രാത്രി ഒമ്പത് മണിയോടെ ഹോസ്റ്റലില്‍ തിരിച്ചെത്തി എന്നോട് വീഡിയോ ചാറ്റ് ചെയ്തു കൊള്ളണം, രാത്രി മറ്റാരുടെയും കൂടെ ഇല്ല എന്ന് എനിക്കുറപ്പാക്കണം, കൂടെ പഠിക്കുന്നവരുടെ കൂടെ നൈറ്റ് ക്ലബില്‍ പോവുകയോ അവരുടെ വീട്ടില്‍ നടക്കുന്ന

പാര്‍ട്ടികളില്‍ പങ്കെടുക്കുകയോ ഒന്നും ചെയ്യരുത്, മറ്റുളളവരുടെ വസ്ത്രങ്ങള്‍ ഒരു കാരണവശാലും ധരിക്കരുത്, മറ്റുള്ള പയ്യന്മാരെ കെട്ടിപ്പിടിക്കുകയോ, ഉമ്മവെക്കുകയോ അരുത്, ഞാന്‍ കയ്യില്‍ ഇടീച്ചിട്ടുള്ള മോതിരം ഒരിക്കലും ഊരി മാറ്റരുത്.'

25 ലക്ഷത്തിലധികം ആളുകളാണ് ഇതിനോടകം പോസ്റ്റ് കണ്ടത്. ഈ പ്രണയ ബന്ധത്തില്‍ യുവതി ചൂഷണം ചെയ്യപ്പെടുകയാണെന്നും എത്രയും പെട്ടെന്ന് തന്നെ ഈ കാമുകനുമായുള്ള ബന്ധം വേര്‍പ്പെടുത്തി രക്ഷപ്പെടണമെന്നും കമന്റിലൂടെ ചിലര്‍ യുവതിയെ ഉപദേശിക്കുന്നു.