ഇന്ത്യന്‍ സ്‌കൂളുകള്‍ തുറക്കുന്നത് സംബന്ധിച്ച്‌ അറിയിപ്പ് പുറത്തിറക്കി ഒമാന്‍. വിദ്യാലയങ്ങളിലെ പ്രവര്‍ത്തന സമയം രാവിലെ 7 മുതല്‍ 10:30 വരെയും, 11:30 മുതല്‍ 3:15 വരെയുമാണ്.

വാക്സിനെടുത്തിട്ടുള്ള വിദ്യാര്‍ത്ഥികള്‍ക്ക് മാത്രമാണ് പ്രവേശനം അനുവദിക്കുന്നത്. വിദ്യാര്‍ത്ഥികള്‍ തങ്ങളുടെ കൈവശം വാക്സിനേഷന്‍ സര്‍ട്ടിഫിക്കറ്റുകള്‍ കരുതേണ്ടതാണ്.

പുതിയ അറിയിപ്പ് പ്രകാരം മസ്‌കറ്റിലെ ഇന്ത്യന്‍ സ്‌കൂളിലെ പന്ത്രണ്ടാം ക്ലാസ് വിദ്യാര്‍ത്ഥികള്‍ക്ക് 2021 ഒക്ടോബര്‍ 3 മുതല്‍ വിദ്യാലയത്തില്‍ നിന്ന് നേരിട്ടുള്ള അധ്യയനം ആരംഭിക്കുന്നതാണ്. ഒമ്പത്, പത്ത്, പതിനൊന്ന് ഗ്രേഡുകളിലെ വിദ്യാര്‍ത്ഥികളുടെ അധ്യയനം ഇതിന് ശേഷം ആരംഭിക്കുന്നതാണ്.

പന്ത്രണ്ടാം ക്ലാസ് വിദ്യാര്‍ത്ഥികള്‍ക്ക് ഞായര്‍, ചൊവ്വ, വ്യാഴം ദിവസങ്ങളില്‍ വിദ്യാലയങ്ങളില്‍ നിന്ന് നേരിട്ടും, തിങ്കള്‍, ബുധന്‍ ദിനങ്ങളില്‍ ഓണ്‍ലൈനിലൂടെയും അധ്യയനം ആരംഭിക്കുന്നതാണ്.

ദാര്‍സൈത്തിലെ ഇന്ത്യന്‍ സ്‌കൂളിലെ 7 മുതല്‍ 12 വരെയുള്ള ക്ലാസ്സുകളിലെ വിദ്യാര്‍ത്ഥികള്‍ക്ക് നേരിട്ടുള്ള പഠനം ഘട്ടം ഘട്ടമായി നടപ്പിലാക്കുമെന്നാണ് അധികൃതര്‍ അറിയിച്ചിരിക്കുന്നത്.

പത്ത്, പന്ത്രണ്ട് ക്ലാസ്സുകളിലെ വിദ്യാര്‍ത്ഥികള്‍ക്ക് 2021 ഒക്ടോബര്‍ 3 മുതല്‍ അധ്യയനം ആരംഭിക്കുന്നതാണ്. ഒമ്പത്, പതിനൊന്ന് ക്ലാസ്സുകള്‍ക്ക് ഒക്ടോബര്‍ 17 മുതലും, ഏഴ്, എട്ട് ക്ലാസ്സുകള്‍ക്ക് നവംബര്‍ 1 മുതലും നേരിട്ടുള്ള അധ്യയനം ആരംഭിക്കുന്നതാണ്.