വാഷിംഗ്ടണ്‍: അമേരിക്കയിലെ ഇന്ത്യാന മാളില്‍ നടന്ന വെടിവയ്പ്പില്‍ മൂന്ന് പേര്‍ കൊല്ലപ്പെടുകയും രണ്ട് പേര്‍ക്ക് ഗുരുതരമായി പരിക്കേല്‍ക്കുകയും ചെയ്തു. ഞായറാഴ്ച വൈകിട്ടായിരുന്നു സംഭവം. ഇന്ത്യാനയിലെ ഗ്രീന്‍വുഡ് പാര്‍ക്ക് മാളിലെത്തിയ അക്രമി ഫുഡ് കോര്‍ട്ടില്‍ വച്ചാണ് വെടിയുതിര്‍ത്തത്.

വിവരമറിഞ്ഞ് വൈകിട്ട് ആറോടെയാണ് പൊലീസ് സംഭവസ്ഥലത്തെത്തിയത്. ആയുധധാരിയായ മറ്റൊരാള്‍ അക്രമിയെ കൊലപ്പെടുത്തിയതായും അക്രമിയുടെ കൈ വശം തോക്കും നിരവധി വെടിമരുന്നുകളുണ്ടായിരുന്നതായും ഗ്രീന്‍വുഡ് പൊലീസ് മേധാവി ജിം ഐസണ്‍ പറഞ്ഞു. അതേസമയം, കൊല്ലപ്പെട്ടവരുടെയോ അക്രമിയുടെയോ പേരുവിവരങ്ങള്‍ വെളിപ്പെടുത്താന്‍ പൊലീസ് തയ്യാറായിട്ടില്ല.