അമേരിക്കന്‍ പ്രസിഡന്റ് ജോ ബൈഡന് കൊവിഡ് സ്ഥരീകരിച്ചു. ബൈഡന് കൊവിഡ് പോസിറ്റീവ് ആയെന്നും, ചെറിയ തോതില്‍ രോഗത്തിന്റെ ബുദ്ധിമുട്ടുകള്‍ അനുഭവപ്പെടുന്നുണ്ടെന്നും വൈറ്റ് ഹൗസ് ആണ് അറിയിച്ചത്. 79കാരനായ ബൈഡന് ഇതാദ്യമായിട്ടാണ് കൊവിഡ് സ്ഥിരീകരിച്ചത്. രണ്ട് ബൂസ്റ്റര്‍ ഡോസുകളും ജോ ബൈഡന്‍ സ്വീകരിച്ചിട്ടുണ്ട്.

കൊവിഡില്‍ നിന്ന് ജോ ബൈഡന് എത്രയും വേഗം സുഖം പ്രാപിക്കാന്‍ സാധിക്കട്ടെ, അദ്ദേഹത്തിന്റെ നല്ല ആരോഗ്യത്തിനായി പ്രാര്‍ത്ഥിക്കുന്നുവെന്നും’ പ്രധാനമന്ത്രി നരേന്ദ്രമോദി ട്വിറ്ററില്‍ കുറിച്ചു. അതേസമയം വൈറ്റ് ഹൗസില്‍ ഇരുന്നുകൊണ്ട് തന്നെ ചുമതലകള്‍ നിര്‍വഹിക്കുന്നത് തുടരുമെന്നും വൈറ്റ് ഹൗസ് പ്രസ് സെക്രട്ടറി അറിയിച്ചു.

യു.എസിൽ കോവിഡ് രോഗികളുടെ എണ്ണത്തിൽ വർദ്ധിക്കുകയാണ്. കഴിഞ്ഞ ദിവസം 1,13,588 പേർക്ക് പുതിയതായി രോഗം സ്ഥിരീകരിച്ചതായും 367 പേർ മരിച്ചതായും വേൾഡോമീറ്റർ വെബ്സൈറ്റിലെ കണക്കുകൾ പറയുന്നു. 37 ലക്ഷത്തോളം പേരാണ് യു.എസിൽ നിലവിൽ കോവിഡ് ബാധിച്ച് ചികിത്സയിലുള്ളത്.