വിവിധ രാജ്യങ്ങളിൽ റിപ്പോർട്ട് ചെയ്ത മങ്കി പോക്‌സ് കുറച്ച് ദിവസങ്ങൾക്ക് മുമ്പാണ് ഇന്ത്യയിൽ സ്ഥിരീകരിച്ചത്. ഇപ്പോഴിതാ ഇതുമായി ബന്ധപ്പെട്ട് പുറത്ത് വരുന്ന പഠനങ്ങളിൽ തെളിയുന്നത് കുരങ്ങുപനി കേസുകളില്‍ തൊണ്ണൂറ്റി അഞ്ച് ശതമാനവും ലൈംഗിക പ്രവര്‍ത്തനത്തിലൂടെയാണ് പകരുന്നുവെന്നാണ്. ന്യൂ ഇംഗ്ലണ്ട് ജേണല്‍ ഓഫ് മെഡിസിനില്‍ വ്യാഴാഴ്ചയാണ് ഗവേഷണം പ്രസിദ്ധീകരിച്ചത്. ക്യൂന്‍ മേരി യൂണിവേഴ്‌സിറ്റിയിലെ ശാസ്ത്രജ്ഞരുടെ നേതൃത്വത്തില്‍, 2022 ഏപ്രില്‍ 27 നും ജൂണ്‍ 24 നും ഇടയില്‍ 16 രാജ്യങ്ങളിലായി സ്ഥിരീകരിച്ച 528 അണുബാധകളെ പരിശോധിച്ചാണ് ഗവേഷണം തയ്യാറാക്കിയത്.

എന്നാൽ കുരങ്ങുപനി ലൈംഗിക ബന്ധത്തിലൂടെ മാത്രം പകരുന്ന രോഗമല്ലെന്നും ഏത് തരത്തിലൂടെ ശരീരിക ബന്ധത്തിലൂടെയും ഈ രോഗം പകരാമെന്നുമാണ് ഗവേഷണ പഠനം പറഞ്ഞുവയ്ക്കുന്നത്. സ്ഥിരീകരിച്ച ഭൂരിഭാഗം കേസുകളിലും രോഗം പടർന്നത് ലൈംഗിക ബന്ധത്തിലൂടെയാണെന്ന് പഠനം വ്യക്തമാക്കുന്നു.

രോഗബാധിതരില്‍ 98 ശതമാനവും സ്വവര്‍ഗാനുരാഗികളോ ബൈസെക്ഷ്വല്‍ പുരുഷന്മാരോ ആയിരുന്നു. 41 ശതമാനം പേര്‍ക്ക് എച്ച് ഐ വി ഉണ്ടായിരുന്നു, ഇവരുടെയൊക്കെ ശരാശരി പ്രായം 38 ആയിരുന്നു. ശ്വസന തുള്ളി പോലുള്ള ഏതെങ്കിലും അടുത്ത ശാരീരിക സമ്പര്‍ക്കത്തിലൂടെയും വസ്ത്രങ്ങളിലൂടെയും മറ്റ് പ്രതലങ്ങളിലൂടെയും വൈറസ് പടരുമെന്ന് ഗവേഷകര്‍ പറയുന്നു.