വന്യജീവികള്‍ക്കുള്ള പ്രധാന്യം വിളിച്ചോതുന്ന ഒരു വീഡിയോയാണ് ഇപ്പോള്‍ ട്വിറ്ററില്‍ തരംഗമാകുന്നത്. ഇന്ത്യന്‍ ഫോറസ്റ്റ് സര്‍വീസ് ഓഫീസറായ പ്രവീണ്‍ കസ്‌വാന്‍ പങ്കുവെച്ച ഈ വീഡിയോയില്‍ റോഡ് മുറിച്ച് കടക്കുന്ന വരയന്‍ കടുവയാണ് താരം. റോഡരികില്‍ കടുവ നില്‍ക്കുന്നത് ശ്രദ്ധയില്‍പ്പെട്ടതോടെ സമയോചിതമായി കൈകാര്യം ചെയ്യുന്ന ട്രാഫിക്ക് പോലീസ് ഓഫീസറേയും വീഡിയോയില്‍ കാണാം. രണ്ടറ്റത്ത് നിന്നും വരുന്ന വാഹനങ്ങളെ മീറ്ററുകള്‍ക്ക് മുമ്ബ് തന്നെ ട്രാഫിക്ക് പോലീസ് ഓഫീസര്‍ തടഞ്ഞു. ഇതോടെ ഹൈവേ മുറിച്ചു കടക്കാനുള്ള വഴി കടുവയ്ക്ക് മുന്നില്‍ തെളിഞ്ഞു.

സിനിമകളില്‍ 'മാസ്' രംഗം കഴിഞ്ഞ് നായകന്മാര്‍ 'സ്ലോമോഷനില്‍' നടന്നുവരുമ്‌ബോള്‍ ആരാധകര്‍ക്ക് തോന്നുന്ന അതേ മതിപ്പാണ് ദൃശ്യങ്ങള്‍ കാണുന്ന ഓരോ കാഴ്ചക്കാരനുമുണ്ടാകുക എന്നതാണ് പ്രത്യേകത. മുന്നില്‍ ശൂന്യമായി കിടക്കുന്ന ഹൈവേയിലൂടെ വളരെ സാവധാനം ഇരുവശത്തേയും വാഹനങ്ങള്‍ നോക്കി റോഡ് മുറിച്ച് കടക്കുന്ന കടുവയെ കണ്ടപ്പോള്‍ സിനിമയിലെ മാസ് രംഗങ്ങളെ ഓര്‍മ്മിപ്പിച്ചുവെന്നാണ് സോഷ്യല്‍മീഡിയയില്‍ നിന്നുയരുന്ന പ്രതികരണം.

കടുവയ്ക്ക് വിശപ്പില്ലാതിരുന്നതിനാലാണോ മനുഷ്യന്റെ സാന്നിധ്യം അസ്വസ്ഥമാക്കാത്തതിനാലാണോ ആക്രമിക്കാത്തതെന്ന് പറയാനാകില്ലെന്നും ആളുകള്‍ അഭിപ്രായപ്പെട്ടു. അതേസമയം ഇത് എവിടെ നടന്ന സംഭവമാണെന്ന് ഇതുവരെ തിരിച്ചറിയാനായിട്ടില്ലെന്ന് വീഡിയോ പങ്കുവെച്ച പ്രവീണ്‍ കസ്‌വാന്‍ പറയുന്നു. മഹാരാഷ്ട്രയില്‍ ബ്രഹ്മപുരിനാഗ്ഭിര്‍ ഹൈവേയാണെന്നും ചന്ദ്രപൂര്‍ എന്ന സ്ഥലമാണെന്നുമാണ് സൂചന.