പെണ്‍കുട്ടികള്‍ ഇനി വിദേശത്ത് പോയി പഠിക്കണ്ട; ഉത്തരവുമായി താലിബാന്‍; അനുമതി ആണുങ്ങള്‍ക്ക് മാത്രം,
അഫ്ഗാനില്‍ വിദ്യാഭ്യാസത്തിനുവേണ്ടി രാജ്യത്തെ പെണ്‍കുട്ടികള്‍ വിദേശത്തേക്ക് പോകുന്നതിനെ വിലക്കി താലിബാന്‍ ഭരണകൂടം. ഖസാക്കിസ്ഥാന്‍, ഖത്തര്‍ എന്നിവിടങ്ങളില്‍ വിദ്യാഭ്യാസത്തിനായി രാജ്യത്തെ ആണ്‍കുട്ടികളും പെണ്‍കുട്ടികളും സമര്‍പ്പിച്ച അപേക്ഷയില്‍ ആണ്‍കുട്ടികള്‍ക്ക് മാത്രം അനുമതി നല്‍കിയ താലിബാന്‍ ഭരണകൂടം പെണ്‍കുട്ടികള്‍ക്ക് ആര്‍ക്കും അനുമതി നല്‍കിയില്ല.
2021 സെപ്തംബറില്‍ അമേരിക്കന്‍ സൈന്യം അഫ്ഗാന്‍ വിട്ടതിന് പിന്നാലെ ദിവസങ്ങള്‍ക്കകം അഫ്ഗാന്‍ ഭരണം പിടിച്ചെടുത്ത താലിബാന്‍ കടുത്ത മനുഷ്യാവകാശ ലംഘനമാണ് വനിതകള്‍ക്ക് നേരെ നടപ്പാക്കുന്നത്. അഫ്ഗാന്‍ വിദ്യാഭ്യാസ മന്ത്രാലയത്തിന് പുറത്ത് ഭക്ഷണം, ജോലി, സ്വാതന്ത്ര്യം എന്നീ ആവശ്യങ്ങളുന്നയിച്ച് അന്‍പതോളം വനിതകള്‍ നടത്തിയ പ്രതിഷേധത്തെ തോക്കിന്റെ പാത്തി ഉപയോഗിച്ചും മറ്റും മൃഗീയമായാണ് താലിബാന്‍ നേരിട്ടത്.
ആറാംക്‌ളാസിനപ്പുറം വിദ്യാഭ്യാസം നേടാന്‍ നിലവില്‍ വനിതകള്‍ക്ക് അനുവാദമില്ല. വീടിന് പുറത്ത് സ്ത്രീകള്‍ ജോലിയെടുക്കാന്‍ പാടില്ല. അവര്‍ക്ക് പൊതുഇടങ്ങളില്‍ മുഖം മറയ്ക്കണമെന്ന് നിബന്ധനയുണ്ട്. പാര്‍ക്കുകളടക്കം ഇടങ്ങളില്‍ അനുമതി നിഷേധിക്കുകയും ചെയ്തു. പൊതു ഇടങ്ങളില്‍ യാത്രചെയ്യാന്‍ പുരുഷന്‍ ഒപ്പം ഉണ്ടാകണം. മാത്രമല്ല സ്ത്രീകള്‍ മുഖം മറച്ചിരിക്കണമെന്നുമുളള നിയമങ്ങള്‍ താലിബാന്‍ നടപ്പാക്കിയിരുന്നു. ഇക്കൂട്ടത്തില്‍ ഏറ്റവും പുതിയതാണ് വിദ്യാര്‍ത്ഥിനികള്‍ക്കുളള നിയന്ത്രണം.
https://www.facebook.com/Malayalivartha
