തുർക്കിയിലെ ഇസ്തംബൂളിലുണ്ടായ ബോംബ് സ്ഫോടനം. അപകടത്തെ തുടർന്ന് ആറു മരണം റിപ്പോർട്ട് ചെയ്‌തു, 81 പേര്‍ക്ക് പരുക്കേറ്റു. പരിക്കേറ്റവരിൽ പലരുടെയും നില ഗുരുതരമാണെന്നാണ് സൂചന. നിലവിൽ ഔദ്യോഗികമായി ആറ് മരണമാണെങ്കിലും അനൗദ്യോഗികമായി 10 പേരെങ്കിലും കൊല്ലപ്പെട്ടിട്ടുണ്ടെന്നാണ് റിപ്പോർട്ടുകൾ.

അതേസമയം ഇസ്തിക്‌ലിലെ തിരക്കേറിയ തെരുവിലാണ് സംഭവം. വൈകിട്ട് പ്രാദേശിക സമയം 4.20 നാണ് സ്ഫോടനമുണ്ടായത്. മാത്രമല്ല വിനോദ സഞ്ചാരികള്‍ ഉള്‍പ്പെടെ ഒട്ടേറെ പേര്‍ സംഭവസമയത്ത് സ്ഥലത്തുണ്ടായിരുന്നു. ഇതുവരെയും ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല.

റിപ്പോർട്ടുകൾ പ്രകാരം ഭീകരാക്രമണം ആണ് നടന്നതെന്നും ചാവേര്‍ സ്ഫോടനമാണോ നടന്നത് എന്നും സംശയമുണ്ട്. സ്ഥിരമായി പൊലീസ് നിരീക്ഷണവും സി.സി.ടി.വി ക്യാമറകളും ഉള്ള തെരുവാണ് ഇസ്തിക്‌ലല്‍. സ്ഫോടനം നടത്തിയ കുറ്റക്കാരെ കണ്ടെത്തി ശിക്ഷിക്കുമെന്ന് പ്രസിഡന്റ് തയീപ് എര്‍ദോഗന്‍ പറഞ്ഞു. സംഭവത്തിൽ ഇന്ത്യ തുർക്കി പ്രസിഡന്റിനെ അനുശോചനം അറിയിച്ചു.