ബ്രിട്ടനില് ആഘോഷം... ചാള്സ് മൂന്നാമന് രാജാവിന്റെ കിരീടധാരണചടങ്ങ് നാളെ ലണ്ടനിലെ വെസ്റ്റ്മിന്സ്റ്റര് ആബിയില് ഇന്ത്യന് സമയം വൈകിട്ട് 3.30ന് കാന്റര്ബറി ആര്ച്ച്ബിഷപ്പിന്റെ നേതൃത്വത്തില് നടക്കും, ബ്രിട്ടന്റെ അകത്തും പുറത്തും നിന്നായി 2,200 അതിഥികള്ക്കാണ് ചടങ്ങില് പങ്കെടുക്കാന് ക്ഷണം
ചാള്സ് മൂന്നാമന് രാജാവിന്റെ ( 74 ) കിരീടധാരണത്തിനൊരുങ്ങി ബ്രിട്ടണ്. നാളെ ലണ്ടനിലെ വെസ്റ്റ്മിന്സ്റ്റര് ആബിയില് ഇന്ത്യന് സമയം വൈകിട്ട് 3.30ന് കാന്റര്ബറി ആര്ച്ച്ബിഷപ്പിന്റെ നേതൃത്വത്തിലാണ് ചാള്സിന്റെയും പത്നി കാമിലയുടെയും കിരീടധാരണ ചടങ്ങുകള് നടക്കുക. കഴിഞ്ഞ സെപ്തംബറില് എലിസബത്ത് രാജ്ഞിയുടെ മരണത്തെ തുടര്ന്നാണ് മൂത്തമകനായ ചാള്സ് രാജസിംഹാസനത്തിന്റെ ഉടമയായത്.
രാജ്ഞിയുടെ മരണത്തിന് പിന്നാലെ കിരീടാവകാശിയായ ചാള്സ് സ്വാഭാവികമായി രാജാവായി മാറിയിരുന്നു. സെപ്തംബര് 10ന് ലണ്ടനിലെ സെന്റ് ജെയിംസ് കൊട്ടാരത്തില് വച്ച് ചാള്സ് മൂന്നാമന് ഔദ്യോഗികമായി അധികാരമേറ്റിരുന്നു.
രാജ്ഞിയുടെ മരണത്തിന്റെ പശ്ചാത്തലത്തിലും ഒരുക്കങ്ങള്ക്ക് കൂടുതല് സമയം വേണമെന്നതിനാലുമാണ് കിരീടധാരണ ചടങ്ങ് മേയില് നടത്താന് നിശ്ചയിച്ചത്.
ബ്രിട്ടന്റെ അകത്തും പുറത്തും നിന്നായി 2,200 അതിഥികള്ക്കാണ് ചടങ്ങില് പങ്കെടുക്കാന് ക്ഷണം. രാജകുടുംബാംഗങ്ങള്ക്കും പ്രധാനമന്ത്രി ഋഷി സുനകടക്കമുള്ള ബ്രിട്ടീഷ് നേതാക്കള്ക്കും പുറമേ ഫ്രഞ്ച് പ്രസിഡന്റ് ഇമ്മാനുവല് മാക്രോണ്, പോളിഷ് പ്രസിഡന്റ് ആന്ഡ്രെ ഡ്യൂഡ, ഓസ്ട്രേലിയന് പ്രധാനമന്ത്രി ആന്റണി ആല്ബനീസ്, സ്പെയിനിലെ ഫിലിപ് രാജാവ്, വിവിധ മത പുരോഹിതര് തുടങ്ങിയവര് പങ്കെടുക്കും.
യു.എസ് പ്രസിഡന്റ് ജോ ബൈഡന് പകരം പത്നി ജില് ബൈഡന് പങ്കെടുക്കും.ഇന്ത്യയെ പ്രതിനിധീകരിച്ച് ഉപരാഷ്ട്രപതി ജഗ്ദീപ് ധന്കര് പങ്കെടുക്കും. ബോളിവുഡ് നടി സോനം കപൂറാണ് ചടങ്ങിലേക്ക് ക്ഷണം ലഭിച്ച ഏക ഇന്ത്യന് സെലിബ്രിറ്റി. മുംബയില് ഓഫീസുകളിലും മറ്റും ജോലി ചെയ്യുന്നവര്ക്ക് വീടുകളില് നിന്ന് ഉച്ചഭക്ഷണം കൃത്യമായി എത്തിച്ച് നല്കി ആഗോളശ്രദ്ധ നേടിയ ഡബ്ബാവാലകളുടെ രണ്ട് പ്രതിനിധികള്, പൂനെ ആസ്ഥാനമായി പ്രവര്ത്തിക്കുന്ന ആര്ക്കിടെക്ട് സൗരവ് ഫഡ്കെ, ദ പ്രിന്സ് ട്രസ്റ്റ് ഗ്ലോബല് അവാര്ഡ് ജേതാവ് ഗുല്ഫ്ഷ, മലയാളി ഡോ. ഐസക് മത്തായി എന്നിവര്ക്കും ഇന്ത്യയില് നിന്ന് ചടങ്ങിലേക്ക് ക്ഷണമുണ്ട്.
"
https://www.facebook.com/Malayalivartha
