വടക്കൻ ഗാസയിലെ അൽ-ഷിഫ ആശുപത്രിയിൾ നവജാതശിശു വിഭാഗത്തിൽ മൂന്ന് കുഞ്ഞുങ്ങൾ മരിച്ചതായി റിപ്പോർട്ട്. ഇസ്രയേലിന്റെ ആക്രമണത്തിൽ അൽശിഫയുടെ "സേവനം നിർത്തിയാതായി ഹമാസിന്റെ നിയന്ത്രണത്തിലുള്ള ആരോഗ്യ മന്ത്രാലയത്തെ ഉദ്ധരിച്ച് സിഎൻഎൻ റിപ്പോർട്ട് ചെയ്തു. നവജാത ശിശുക്കളുടെ വാർഡിലെ ഡോക്ടർമാർ ഇപ്പോൾ ചികിത്സിക്കുന്ന 36 കുഞ്ഞുങ്ങൾക്ക് കൈകൊണ്ട് കൃത്രിമ ശ്വാസോഛ്വാസം നടത്താൻ നിർബന്ധിതരാകുകയാണെന്ന് ഹമാസ് നിയന്ത്രണത്തിലുള്ള ആരോഗ്യ മന്ത്രാലയം ഡയറക്ടർ ജനറൽ മുനീർ അൽ ബുർഷിനെ ഉദ്ധരിച്ച് റിപ്പോർട്ട് ചെയ്തു.

400 പേർ ആശുപത്രിയിൽ ചികിത്സയിലുണ്ടെന്നും 20,000 ത്തോളം ആളുകൾ ആശുപത്രി സമുച്ചയത്തിൽ അഭയം തേടുന്നുണ്ടെന്നും കണക്കാക്കുന്ന ആശുപത്രി “നാലു ദിശകളിൽ നിന്നും സൈന്യത്തെക്കൊണ്ടു ചുറ്റപ്പെട്ടിരിക്കുന്നു” എന്നും ബർഷ് പറഞ്ഞു. തുടർച്ചയായ ആക്രമണവും ഇന്ധനമില്ലായ്മയും കാരണം ഗാസയിൽ 22 ആശുപത്രികളുടെയും 49 ഹെൽത്ത് സെൻററുകളുടെയും പ്രവർത്തനമാണ് നിലച്ചത്. നിരവധി പേർ ചികിത്സയിൽ കഴിയുന്ന അൽശിഫ ആശുപത്രിയിലെ തീവ്രപരിചരണവിഭാഗവും മറ്റും തകർത്ത ഇസ്രായേൽ കൂടുതൽ ആക്രമണം നടത്താനുള്ള നീക്കത്തിലാണ്.

ആശുപത്രി പരിസരത്ത് ഇന്ന് വെളുപ്പിനും ആക്രമണം തുടർന്നു. ചികിത്സയിലുള്ള നൂറുകണക്കിന് രോഗികളുടെ ജീവൻ അപകടത്തിലാണ്. ആശുപത്രിയിലെ ഹൃദ്രോഗ വാർഡ് നേരത്തെ തകർത്തിരുന്നു. വടക്കൻ ഗാസയിലെ ഏറ്റവും വലിയ ആശുപത്രി കൂടിയായ അൽ ശിഫയുമായി ആശയവിനിമയ ബന്ധം പൂർണമായും തകർന്നതിനാൽ എന്താണ് സംഭവിക്കുന്നതെന്നു പോലും വ്യക്തമല്ലെന്ന് യു.എൻ ഏജൻസികൾ അറിയിച്ചു.

അൽ റൻതീസി ഉൾപ്പെടെ മറ്റു ആശുപത്രികളും ഇസ്രായേൽ സൈന്യം പൂർണമായി വളഞ്ഞിരിക്കുകയാണ്. ആശുപത്രിയിൽ നിന്ന് പുറത്തിറങ്ങുന്നവരെ ചുറ്റും നിലയുറപ്പിച്ച ഇസ്രായേൽ സൈന്യത്തിലെ ഷൂട്ടർമാർ വെടിവെച്ചിടുകയാണെന്ന് ഫലസ്തീൻ ആരോഗ്യ മന്ത്രാലയം അറിയിച്ചു.

ആശുപത്രികൾ ഉൾപ്പടെയുള്ള ആരോഗ്യ സംവിധാനങ്ങൾക്കെതിരായ ഇസ്രായേൽ ആക്രമണത്തിന് ഒരു ന്യായീകരണവുമില്ലെന്ന് യു.എൻ സെക്രട്ടറി ജനറൽ അൻറോണിയോ ഗുട്ടറസ് വീണ്ടും പ്രതികരിച്ചു. ബന്ദികളെ കൈമാറാതെ വെടിനിർത്തലിന് ഒരുക്കമല്ലെന്നും, എന്നാൽ ബന്ദികളെ കൈമാറുന്ന കരാറിന് സാധ്യതയുണ്ടെന്നും നെതന്യാഹു വ്യക്തമാക്കി.