ഇസ്രയേല്‍-ഇറാന്‍ പോര് കത്തിനില്‍ക്കെ മറ്റൊരു വിവാദം ആളിപ്പടരുന്നു. ബൈഡന്‍ ഇസ്രയേല്‍ പ്രധാനമന്ത്രിയെ തെറിപറഞ്ഞുവെന്ന് ആരോപണം. അമേരിക്കന്‍ പ്രസിഡന്റ് പദത്തിലെ 4 വര്‍ഷ കാലാവധി പൂര്‍ത്തിയാക്കി പടിയിറങ്ങാനുള്ള തയ്യാറെടുപ്പിലാണ് ജോ ബൈഡന്‍. അതിനിടയിലാണ് യു എസ് പ്രസിഡന്റ് കാലയളവില്‍ ബൈഡന്, മറ്റ് ലോക നേതാക്കളോടുള്ള ബന്ധം എങ്ങനെയായിരുന്നുവെന്ന് വിരല്‍ ചൂണ്ടുന്ന 'വാര്‍' എന്ന പുസ്തകം വലിയ ചര്‍ച്ചയാകുന്നത്. ബെഞ്ചമിന്‍ നെതന്യാഹു മുതല്‍ വ്‌ളാഡിമിര്‍ പുടിന്‍ വരെയുള്ള ലോക നേതാക്കളുമായുള്ള ഇടപെടലുകളുടെയും തിരശ്ശീലയ്ക്ക് പിന്നില്‍ നടന്ന കാര്യങ്ങളുടെയും വെളിപ്പെടുത്തല്‍ എന്ന നിലയിലാണ് 'വാര്‍' പുറത്തുവന്നിരിക്കുന്നത്. അമേരിക്കയിലെ പ്രശസ്ത മാധ്യമപ്രവര്‍ത്തകന്‍ ബോബ് വുഡ്!വാര്‍ഡിന്റെ പുതിയ പുസ്തകമായ 'വാറി'ല്‍, അമേരിക്കന്‍ പ്രസിഡന്റ് കാലയളവില്‍ ജോ ബൈഡന്‍ സഹായികളും മറ്റുള്ളവരുമായി നടത്തിയ സ്വകാര്യ സംഭാഷണത്തിലെ പരാമര്‍ശങ്ങളുടെ വെളിപ്പെടുത്തലാണുള്ളത്.

ഇസ്രയേല്‍ ?പ്രധാനമന്ത്രി ബെഞ്ചമിന്‍ നെതന്യാഹുവിനെയും റഷ്യന്‍ പ്രസിഡന്റ് വ്‌ളാഡ്മിര്‍ പുടിനെയും മുന്‍ അമേരിക്കന്‍ പ്രസിഡന്റ് ഡൊണാള്‍!ഡ് ട്രംപിനെയും കുറിച്ചുള്ള ബൈഡന്റെ നിരവധി പരാമര്‍ശങ്ങള്‍ അടങ്ങുന്നതാണ് പുസ്തകം. ഇസ്രയേല്‍ ?പ്രധാനമന്ത്രിയുമായുള്ള അവിശ്വാസവും അസ്വാരസ്യവും പരസ്യമാക്കുന്ന നിരവധി വെളിപ്പെടുത്തലുകളാണ് പുസ്തകത്തിലുള്ളത്. പുസ്തകത്തിന്റെ ഒരു ഭാഗത്ത് നെതന്യാഹുവിനെതിരെ ബൈഡന്‍ നടത്തിയ കടുത്ത ആരോപണങ്ങളെ കുറിച്ചാണ് വെളിപ്പെടുത്തിയിട്ടുള്ളത്. നെതന്യാഹുവിനെ 'സണ്‍ ഓഫ് എ ബിച്ച്' എന്നും പെരുംനുണയനെന്നും തന്റെ സഹായിയുമായി നടത്തിയ സ്വകാര്യ സംഭാഷണത്തിനിടെ ബൈഡന്‍ വിശേഷിപ്പിച്ചിട്ടുണ്ടെന്നാണ് പുസ്തകം വെളിപ്പെടുത്തുന്നത്. ഇസ്രയേല്‍ ഗാസയില്‍ ആക്രമണം തുടങ്ങിയപ്പോളാണ് ബൈഡന്‍, നെതന്യാഹുവിനെ ഇങ്ങനെ വിശേഷിപ്പിച്ചതെന്നും 'വാര്‍' പറയുന്നു. നെതന്യാഹുവിന് വേണ്ടി പ്രവര്‍ത്തിക്കുന്ന 19 ല്‍ 18 സഹായികളും പെരുംനുണയന്‍മാരാണെന്നും ബൈഡന്‍ പറഞ്ഞിട്ടുണ്ടെന്നും വെളിപ്പെടുത്തലുണ്ട്.

റഷ്യന്‍ പ്രസിഡന്റ് വ്‌ളാഡ്മിര്‍ പുടിനെ ബൈഡന് തീരെ ഇഷ്ടമായിരുന്നില്ലെന്നും പുസ്തകം വ്യക്തമാകുന്നുണ്ട്. പുടിനെ വൃത്തികെട്ട മനുഷ്യനെന്നും പിശാചെന്നും ബൈഡന്റെ അഭിപ്രായപ്പെട്ടിരുന്നുവെന്നാണ് 'വാര്‍' വിവരിക്കുന്നത്. യുക്രെയ്‌നില്‍ ആക്രമണം തുടങ്ങിയ റഷ്യന്‍ നടപടിക്ക് പിന്നാലെ ഉപദേഷ്ടാക്കളുമായി നടത്തിയ ചര്‍ച്ചയില്‍ പുടിനെതിരെ ബൈഡന്‍ രൂക്ഷമായ അധിക്ഷേപങ്ങള്‍ നടത്തിയിട്ടുണ്ടെന്നും പുസ്തകത്തിലുണ്ട്. അതേസമയം ബൈഡനെ കുറിച്ചുള്ള വെളിപ്പെടുത്തല്‍ നിഷേധിച്ച് വൈറ്റ് ഹൗസ് രംഗത്തെത്തി. വൈറ്റ് ഹൗസ് ഡെപ്യൂട്ടി പ്രസ് സെക്രട്ടറി എമിലി സിമണ്‍സാണ് 'വാറി'ലെ ആരോപണങ്ങള്‍ നിഷേധിച്ച് വാര്‍ത്താക്കുറിപ്പിറക്കിയത്. ബൈഡനും നെതന്യാഹുവും തമ്മില്‍ ദീര്‍ഘകാലത്തെ സൗഹൃദമുണ്ടെന്നും വളരെ വിശ്വസ്തവും ഗാഢവുമായ ബന്ധമാണ് ഇരുവരും തമ്മിലുള്ളതെന്നും വൈറ്റ് ഹൗസ് വിവരിച്ചിട്ടുണ്ട്.

മുന്‍ അമേരിക്കന്‍ പ്രസിഡന്റും റിപ്പബ്ലിക്കന്‍ പാര്‍ട്ടിയുടെ ഇത്തവണത്തെ സ്ഥാനാര്‍ഥിയുമായി ഡോണള്‍ഡ് ട്രംപും പുടിനും തമ്മിലുള്ള രഹസ്യ ഇട?പാടുകളെ കുറിച്ചുള്ള വെളിപ്പെടുത്തലുകളോടെയാണ് 'വാര്‍' ആഗോളതലത്തില്‍ ആദ്യം ശ്രദ്ധനേടിയത്. കൊവിഡ് കാലത്ത് പുടിനു വേണ്ടി ട്രംപ് രഹസ്യമായി പരിശോധനാ ഉപകരണങ്ങള്‍ അയച്ചെന്ന് പുസ്തകത്തില്‍ വെളിപ്പെടുത്തലുണ്ടായിരുന്നു. ഇക്കാര്യം രഹസ്യമായിരിക്കണമെന്ന് ട്രംപിനോട് പുടിന്‍ നിര്‍ദേശിച്ചിരുന്നു എന്നും പുസ്തകത്തില്‍ വെളിപ്പെടുത്തിയിരുന്നു. പ്രസിഡന്റ് കാലാവധി കഴിഞ്ഞ ശേഷവും ട്രംപ് ഇടയ്ക്കിടെ പുടിനുമായി ഫോണില്‍ സംസാരിക്കാറുണ്ടായിരുന്നുവെന്ന് വെളിപ്പെടുത്തലുണ്ടായിരുന്നു. ട്രംപിന്റെ സഹായിയെ ഉദ്ധരിച്ചുള്ള ബോബ് വുഡ്‌വാര്‍ഡിന്റെ 'വാറി'ലെ ആരോപണങ്ങള്‍ ട്രംപ് നിഷേധിച്ചിരുന്നു.