ഇറാന് വീണ്ടും മുന്നറിയിപ്പുമായി ഇസ്രയേൽ. യുദ്ധമുഖത്തെ നീക്കങ്ങള്‍ അവസാനിപ്പിച്ചിട്ടില്ലെന്നും മാരകമായ പ്രഹരമേല്‍പ്പിക്കുമെന്നുമാണ് ഇറാന് മുന്നറിയിപ്പ് നൽകിയിരിക്കുന്നത്. ഇസ്രയേലിനുമേല്‍ ഒരു മിസൈല്‍ കൂടി തൊടുക്കാന്‍ തുനിഞ്ഞാല്‍ തങ്ങളുടെ എല്ലാ ശക്തിയുമെടുത്ത് പ്രതികരിക്കും എന്നാണ് ഇസ്രയേലിന്റെ സൈനിക തലവൻ ഹെര്‍സി ഹവേലി   മുന്നറിയിപ്പ് നൽകിയിരിക്കുന്നത്. 

ഹിസ്ബുല്ലയ്‌ക്കെതിരെ  ഭീഷണിയുയർത്തി  ഇസ്രയേല്‍ പ്രതിരോധമന്ത്രി യോവ് ഗാലന്റ്. ഹിസ്ബുല്ലയുടെ പുതിയ തലവൻ നയിം ഖാസിമിന്റെ നിയമനം താൽക്കാലികമാണെന്നും ഏറെക്കാലം നീണ്ടുനില്‍ക്കില്ലെന്നുമാണ്   യോവ് ഗാലന്റ്   മുന്നറിയിപ്പ് നല്‍കിയത്.എക്സിലൂടെയായിരുന്നു മുന്നറിയിപ്പ്. ഹിസ്ബുല്ലയുടെ പരമോന്നത സമിതിയായ ഷൂറ കൗണ്‍സില്‍ ഇന്നലെയാണ് പുതിയ തലവനായി ഖാസിമിനെ തിരഞ്ഞെടുത്തത്. നസറുള്ളയുടെ വധത്തിനുശേഷം നേതൃസ്ഥാനത്തേക്ക് പരിഗണിച്ചത് ഹാഷിം സഫിദ്ദീനെയായിരുന്നു  .

എന്നാൽ ഹാഷിമും കൊല്ലപ്പെട്ടതോടെ നേതൃസ്ഥാനത്തേക്ക്  ഖാസിമിലേക്ക് എത്തുകയായിരുന്നു.  ഒരു മാസത്തോളമായി ഇസ്രയേലിന്റെ ശക്തമായ സൈനിക നടപടി തുടരുന്ന വടക്കന്‍ ഗാസയില്‍ ചൊവാഴ്ച രാവിലെയുണ്ടായ വ്യോമാക്രമണത്തില്‍ 93 പേര്‍ കൊല്ലപ്പെട്ടു. നാൽപതോളം പേർ അവശിഷ്ടങ്ങൾക്കിടയില്‍ കുടുങ്ങിക്കിടക്കുന്നതായാണ് റിപ്പോർട്ടുകൾ.