റഷ്യൻ സൈന്യത്തിനുവേണ്ടി പോരാടുന്ന 22 കാരനായ ഇന്ത്യൻ പൗരൻ മജോതി സാഹിൽ മുഹമ്മദ് ഹുസൈനെ ഉക്രേനിയൻ സൈന്യം പിടികൂടിയതായി റിപ്പോർട്ട് . യുദ്ധക്കളത്തിൽ വെറും മൂന്ന് ദിവസങ്ങൾക്ക് ശേഷം 63-ാമത് മെക്കനൈസ്ഡ് ബ്രിഗേഡിന് കീഴടങ്ങിയതായി ഉക്രേനിയൻ സൈനിക ഉദ്യോഗസ്ഥർ പറഞ്ഞു. ഗുജറാത്തിലെ മോർബിയിൽ നിന്നുള്ള മജോതി സാഹിൽ മുഹമ്മദ് ഹുസൈൻ എന്ന് സ്വയം പരിചയപ്പെടുത്തിയ ഇന്ത്യൻ പൗരനെ ഉൾപ്പെടുത്തി ഉക്രേനിയൻ സൈന്യത്തിന്റെ 63-ാമത് മെക്കനൈസ്ഡ് ബ്രിഗേഡ് അവരുടെ ടെലിഗ്രാം ചാനലിൽ ഒരു വീഡിയോ പ്രസിദ്ധീകരിച്ചു. കീവിലെ ഇന്ത്യൻ മിഷൻ റിപ്പോർട്ടുകളുടെ സത്യാവസ്ഥ പരിശോധിച്ചുവരികയാണ്. ഇതുസംബന്ധിച്ച് ഉക്രേനിയൻ ഭാഗത്തുനിന്ന് ഇതുവരെ ഔദ്യോഗികമായ ഒരു അറിയിപ്പും ലഭിച്ചിട്ടില്ല.

ഉക്രേനിയൻ സൈന്യം അവരുടെ ടെലിഗ്രാം പോസ്റ്റിൽ ഹുസൈൻ ആദ്യം റഷ്യയിലേക്ക് പഠനത്തിനായി പോയിരുന്നെന്നും പിന്നീട് മയക്കുമരുന്നുമായി ബന്ധപ്പെട്ട കുറ്റങ്ങൾക്ക് അറസ്റ്റ് ചെയ്യപ്പെടുകയും ഏഴ് വർഷം തടവിന് ശിക്ഷിക്കപ്പെടുകയും ചെയ്തുവെന്ന് ആരോപിച്ചു. "ജയിലിൽ പോകുന്നത് ഒഴിവാക്കാൻ, അവൻ യുദ്ധത്തിന് പോയി," ബ്രിഗേഡ് ഒരു പ്രസ്താവനയിൽ പറഞ്ഞു.

ബ്രിഗേഡ് പുറത്തിറക്കിയ ഒരു വീഡിയോ ഇപ്പോൾ സോഷ്യൽ മീഡിയയിൽ പ്രചരിക്കുന്നുണ്ട്, അതിൽ ഹുസൈൻ റഷ്യൻ ഭാഷയിൽ സംസാരിക്കുന്നതും ജയിൽ ശിക്ഷ ഒഴിവാക്കാൻ വേണ്ടിയാണ് താൻ റഷ്യൻ സൈന്യത്തിൽ ചേർന്നതെന്ന് സമ്മതിക്കുന്നതും കാണാം. "എനിക്ക് ജയിലിൽ തുടരാൻ താൽപ്പര്യമില്ലായിരുന്നു, അതിനാൽ ഞാൻ 'പ്രത്യേക സൈനിക നടപടി'ക്കുള്ള കരാറിൽ ഒപ്പുവച്ചു," ഉക്രെയ്നിലെ അധിനിവേശത്തിന് മോസ്കോയുടെ പദം ഉപയോഗിച്ചുകൊണ്ട് അദ്ദേഹം ക്ലിപ്പിൽ പറയുന്നു. "പക്ഷേ എനിക്ക് അവിടെ നിന്ന് പുറത്തുകടക്കാൻ ആഗ്രഹമുണ്ടായിരുന്നു."

ഒക്ടോബർ 1 ന് മുൻനിരയിലേക്ക് അയയ്ക്കപ്പെടുന്നതിന് മുമ്പ്, വെറും 16 ദിവസത്തെ അടിസ്ഥാന പരിശീലനം മാത്രമാണ് തനിക്ക് ലഭിച്ചതെന്ന് ഹുസൈൻ അതേ വീഡിയോയിൽ വിവരിക്കുന്നു. തന്റെ കമാൻഡറുമായുള്ള അഭിപ്രായവ്യത്യാസത്തെത്തുടർന്ന്, കീഴടങ്ങാൻ തീരുമാനിച്ചതായി അദ്ദേഹം പറയുന്നു. "രണ്ടോ മൂന്നോ കിലോമീറ്റർ അകലെ ഒരു ഉക്രേനിയൻ ട്രെഞ്ച് പൊസിഷൻ ഞാൻ കണ്ടു," "ഞാൻ ഉടനെ എന്റെ റൈഫിൾ താഴെയിട്ടു, യുദ്ധം ചെയ്യാൻ ആഗ്രഹിക്കുന്നില്ലെന്ന് പറഞ്ഞു. എനിക്ക് സഹായം ആവശ്യമുണ്ട്." ഇയാൾ പറയുന്നത് കാണാം.

വാഗ്ദാനം ചെയ്ത പണം ഒരിക്കലും ലഭിച്ചിട്ടില്ലെന്ന് അവകാശപ്പെടുന്ന ഹുസൈൻ, റഷ്യയിലേക്ക് മടങ്ങാൻ ആഗ്രഹിക്കുന്നില്ലെന്നും പറഞ്ഞു. "അവിടെ സത്യമില്ല, ഒന്നുമില്ല. ഇവിടെ (ഉക്രെയ്നിൽ) ജയിലിൽ പോകുന്നതാണ് എനിക്ക് നല്ലത്," അദ്ദേഹം പറഞ്ഞു.

ഇന്ത്യൻ പൗരന്മാരെ - അവരിൽ ചിലർ വിദ്യാർത്ഥികളോ കുടിയേറ്റ തൊഴിലാളികളോ - റഷ്യൻ സേനയിൽ സേവനമനുഷ്ഠിക്കാൻ റിക്രൂട്ട് ചെയ്യുകയോ, നിർബന്ധിക്കുകയോ, തെറ്റിദ്ധരിപ്പിക്കുകയോ ചെയ്തിട്ടുണ്ടെന്ന് റിപ്പോർട്ടുകൾ ഉണ്ട്.

റഷ്യൻ സൈന്യത്തിൽ സേവനമനുഷ്ഠിക്കുന്ന 27 ഇന്ത്യൻ പൗരന്മാരെ മോചിപ്പിച്ച് തിരിച്ചയയ്ക്കണമെന്ന് ഇന്ത്യ റഷ്യയോട് ശക്തമായി ആവശ്യപ്പെട്ടിരുന്നതായി വിദേശകാര്യ മന്ത്രാലയം കഴിഞ്ഞ മാസം പറഞ്ഞിരുന്നു. 2024 ഏപ്രിലിൽ സായുധ സേനയിലേക്ക് ഇന്ത്യക്കാരെ റിക്രൂട്ട് ചെയ്യുന്നത് നിർത്തിയതായി മോസ്കോ അവകാശപ്പെട്ടിട്ടും, റഷ്യൻ സൈന്യത്തിൽ ജോലി വാഗ്ദാനം ചെയ്ത് ഇന്ത്യൻ പൗരന്മാരെ ആകർഷിക്കുന്ന പ്രശ്നം തുടരുകയാണ്.