കാലടി സംസ്‌കൃത സർവകലാശാലാ വിദ്യാർഥികളുടെ പരീക്ഷാ അനുമതി റദ്ദാക്കണം എന്നാവശ്യപ്പെട്ട് നൽകിയ അപ്പീലിൽ ഹൈക്കോടതി ഡിവിഷൻ ബെഞ്ച് ഇന്ന് വിധി പറയും.

വൈസ് ചാൻസലർ സിസ തോമസ് നൽകിയ അപ്പീലിൽ ജസ്റ്റിസുമാരായ അനിൽ കെ.നരേന്ദ്രൻ, എസ്.മുരളീകൃഷ്ണ എന്നിവർ ഉൾപ്പെട്ട ഡിവിഷൻ ബെഞ്ച് ഉച്ചയ്ക്ക് രണ്ട് മണിക്കാണ് വിധി പറയുക. സിംഗിൾ ബെഞ്ചിൻറെ ഇടക്കാല ഉത്തരവ് ഡിവിഷൻ ബെഞ്ച് റദ്ദാക്കിയില്ലെങ്കിൽ വിസിക്ക് തിരിച്ചടിയാകുകയും ചെയ്യും.
മറുപടി നൽകാനായി അവസരം ലഭിക്കാതെ ഉപഹർജിയിൽ സിംഗിൾ ബെഞ്ച് തീരുമാനമെടുത്തുവെന്നാണ് വിസിയുടെയും സർവകലാശാലയുടെയും വാദം. അപ്പീൽ നൽകിയ വിദ്യാർഥികളിൽ പലർക്കും പരീക്ഷ എഴുതാനായി മതിയായ അറ്റൻഡൻസില്ല. പരീക്ഷയ്ക്ക് സൂപ്പർ ഫൈൻ അടച്ച് അപേക്ഷിക്കാനുള്ള സമയപരിധിയും അവസാനിച്ചു.

വിസിയെ ആക്രമിച്ച കേസിലെ പ്രതികൾക്ക് പരീക്ഷ എഴുതാനായി അവസരം നൽകുന്നത് അന്വേഷണത്തെയും സർവകലാശാലയിലെ അന്തരീക്ഷത്തെയും ബാധിക്കുമെന്നുമാണ് സർവകലാശാല ഉയർത്തിയ വാദം. പരീക്ഷ എഴുതാനായി മതിയായ ഹാജർ ഉണ്ടായിരുന്നുവെന്നാണ് വിദ്യാർഥികൾ നൽകിയ മറുപടി.

ജയിലിൽ കഴിയുന്നവരെ പോലും പരീക്ഷ എഴുതാനായി അനുവദിക്കാറുണ്ട്. എങ്ങനെയാണ് ഒരു സർവകലാശാലക്ക് ഇങ്ങനെ ചെയ്യാൻ കഴിയുക. വിദ്യാർഥികൾ അക്രമം നടത്തിയതിന് തെളിവില്ലെന്നാണ് അന്വേഷണ റിപ്പോർട്ട് എന്നും വിദ്യാർഥികൾ ഹൈക്കോടതിയെ അറിയിക്കുകയും ചെയ്തു.